“Mibati ko og ka bakikaw sa pagpakigbahin sa akong mga gituohan. Sa unsang paagi nga ako makahimo niini nga mobati nga mas normal?”

“Mahimo kong ehemplo sa tanang panahon pinaagi sa pagsul-ob sa medalyon sa Young Women, paglaylay [humming] sa mga himno sa eskwelahan, ug pag-post sa mga kasulatan ug mga litrato sa templo. Ang akong mga higala nahimong masusihon niini nga mga butang. Dayon pangutan-on nila ako mahitungod sa kon unsa diay kini, ug mobati ako nga komportable sa pagpakigbahin sa akong mga pagtuo kanila—kini makapalipay kaayo kanako!”

Marjorie Y., 12, Fortaleza, Brazil

“Usahay mobati ko og ka bakikaw sa pagpakigbahin sa akong mga gituohan kon makig-istorya ko sa uban. Hinoon, ang 1 Mga Taga-Corinto 2:13 nagpahinumdom nako nga atong ipakigbahin ang atong pagpamatuod ubos sa paggiya sa Espiritu Santo. Pinaagi sa pagdapit sa Espiritu, natural nga mahimo natong ipakigbahin ang atong mga pagtuo ug ang mga butang sa atong kasingkasing ngadto sa ubang mga tawo.”

Roshemin B., 18, Bauang, Pilipinas

“Naglisod ko sa pagpakigbahin sa akong mga gituohan tungod sa kahadlok nga isalikway o ibalewala. Kon moabot ang mga pangutana, maningkamot ko nga magmalipayon, modawat sa akong pagpamatuod, ug mosalig kang Jesukristo. Gitudloan ko sa akong inahan nga kon maningkamot ko nga mahisama kang Kristo, bisan kon dili ko makasulti og daghan, ang uban makakita sa akong gituohan pinaagi sa akong pagkinabuhi.”

Eddy A., 19, Villa Nueva, Guatemala

“Mas dali kong mosulti bahin sa akong mga pagtuo kon ang mga tawo sa akong palibot mangutana kanako bahin sa akong gisulti ug unsay akong gibuhat. Pananglitan, mangutana sila nako nganong dili ko mosulti og dili maayo nga mga pulong o ngano nga dili ko magdula sa ma-Dominggo o nganong akong piyongon akong mga mata ug moduko sa akong ulo sa dili pa mokaon sa cafeteria.”

Tomas H., 13, Cholet, France

“Ang pagpakigbahin sa ebanghelyo mahimong yano sama sa pagpakita og Kristohanong gugma ngadto niadtong anaa sa inyong palibot—pagpakigbahin og bersikulo sa kasulatan ngadto sa usa ka higala kinsa nag-antos sa kalisdanan o naglakip sa usa ka tawo. Pagmahimong maayong ehemplo ug sunda ang ehemplo ni Jesus ug mas komportable ka sa pagpakigbahin sa ebanghelyo kada adlaw.”

Mya S., 17, Texas, USA