Usa ka Ten-edyer nga adunay Daghang Talento
Si J-Ephraim makahimo og daghang maayong mga butang—lakip ang pipila nga dili nimo mamatikdan sa sinugdanan.
Mga litrato pinaagi ni Leslie Nilsson
Si J-Ephraim usa ka umaabot nga chef!
Sa edad nga 14, si J-Ephraim nga taga-Manila, Pilipinas, pamilyar na kaayo sa buhat sa kusina lakip ang mga proseso sa pagluto. “Gusto nako nga mahimong usa ka chef ugma damlag,” misulti siya. Usa sa iyang paboritong putahe nga himoon mao ang sinigang, usa ka pagkaon nga nagsagol sa lain-laing karne ug mga utanon nga adunay suka aron mahatagan kini og aslom apan lamian nga templa.
Gusto usab siya nga magdula, mag-ehersisyo, makig-uban sa iyang mga higala, ug magdula og basketball.
Apan tingali ang pipila sa iyang labing maayo nga mga talento dili mao ang unsay inyong makita diha diha dayon.
Mga Hagit sa Pamilya
“Produkto ko sa usa ka broken family,” siya mipasabot. Sa dihang si J-Ephraim nuybe anyos, ang iyang amahan mibiya sa pamilya. Sa kalit lang ang inahan ni J-Ephraim kinahanglang mopadako kaniya ug sa iyang duha ka mga manghod nga nag-inusara. Ang mga panghitabo dili sayon alang sa bisan kinsa kanila.
“Mibati kog dakong kasuko sa sinugdanan,” miangkon si J-Ephraim. Wala usab siya nag-inusara. “Adunay daghang kasuko ug kasubo sa among tibuok pamilya.”
Ang matag usa kanila kinahanglang makakat-on sa pagkinabuhi nga walay amahan. Usahay, ang sobra nga kaugtas ug kaguol moresulta sa mga panaglalis. Mao nga si J-Ephraim nakahukom sa pagtrabaho sa usa pa ka talento: mahimong usa ka tigpasiugda sa kalinaw.
“Naningkamot ko nga mahimong tigpasiugda og kalinaw sa among balay, ilabina sa akong mga manghod.” Nagbunga usab ang iyang mga paningkamot. Samtang siya ang una nga miangkon nga ang mga panaglalis nagpadayon gihapon, silang tanan naghiusa isip usa ka pamilya nga mamenos ang panaglalis ug aron padayon nga mapalig-on ang ilang mga relasyon. “Suod kaayo kami isip pamilya!” Misulti si J-Ephraim.
Adunay usa pa ka sekreto sa ilang kalamposan. Gipasabot ni J-Ephraim ang usa ka yano apan lawom nga rason sa pagkasuod sa iyang pamilya: “Kami nagpadayon sa pagsunod sa mga pagtulun-an ni Jesukristo,” siya miingon.
Mga Kalamposan sa Pamilya
“Usa sa mga nag-unang rason nganong nagpabilin kaming nagkahiusa hangtod karon tungod kay nagpabilin kami sa Simbahan ug nagpadayon sa pagsunod ni Jesukristo,” mipasabot si J-Ephraim. “Kami motambong sa panagtigom alang sa sakramento kada Dominggo ug magpahigayon og family home evening kada semana.”
Ang paggahin ug panahon sa gawas nga magkauban usa lamang ka paagi nga kini nga pamilya nagpabiling suod.
Sila naggahin usab og kalidad nga panahon samtang magkauban matag adlaw. “Kanunay kaming nagsuporta sa usag usa sa mga talento nga naa kanamo ug sa mga pagpili nga among gihimo,” miingon siya. Maskin kana nagpasabot nga mag-uban sa parke, magtinabangay sa usag usa sa homework, magsimba isip usa ka pamilya, o mogahin og panahon sa kusina ug magdungan og pangatawa, sila nasayod sa kaimportante sa pagpalambo sa ilang pamilya bisan sa ginagmay lang matag adlaw.
Si J-Ephraim ug ang pamilya nakakat-on sa kabililhon sa pagkat-on nga magkauban—bisan kon homework man kana, kasulatan, o bag-ong mga kalingawan.
Kalig-on diha ni Kristo
“Sa paglabay sa panahon napasaylo nako ang akong amahan,” siya miingon. Kon bahin sa pagpasaylo, si J-Ephraim nakahunahuna og usa ka butang nga daghan nanglimbasog sa tibuok kinabuhi aron makat-on. “Kon pasayloon nako ang usa ka tawo, kana nga kasuko sa akong kasingkasing mawala, ug dili na nako kinahanglan nga hunahunaon pa kini.”
Karon, sa tinuod, kana ingon og mas sayon nga sultihon kaysa buhaton. Unsaon man nato sa pagpasaylo sa usa ka tawo kon kita morag walay kusog sa pagbuhat sa ingon? Sa makausa pa, gipasabot ni J-Ephraim si Jesukristo. “Ang gahom ni Jesukristo naghatag kanato og kalig-on ug giya sa pagbuntog sa atong mga babag sa kinabuhi,” miingon siya. “Sa atong kalibotan karon, adunay daghan kaayong mga hagit ug mga tentasyon nga daling makaguba kanato sa espirituwal, emosyonal, mental, ug pisikal. Si Kristo makahimo niini nga mas sayon alang kanato.”
Ang iyang kahanas sa kusina mahimong magtabang kaniya nga magmalamposon. Apan ang desisyon ni J-Ephraim nga mosalig kang Jesukristo ingon nga iyang kusog magdala kaniya hangtod sa hangtod.
Unsa ang Naghatag kang J-Ephraim og Paglaom
Sa milabay nga pipila ka tuig, si J-Ephraim nakakaplag og daghang paglaom ug pagdasig gikan sa samang kasulatan nga gigamit sa tema sa kabatan-onan sa 2023: “Mahimo ko ang tanang butang pinaagi kang Kristo nga nagpalig-on kanako” (Mga Taga-Filipos 4:13).
“Kon mahinumdom ko niana nga bersikulo, mahinumdom ko nga si Kristo makagiya nato sa bisan unsang mga hagit nga atong atubangon.”