Ang Pag-ampo Makapildi sa Pagpanungog

Paghulagway pinaagi ni Katelyn Budge

Ako adunay daghang kabataan sa akong eskwelahan nga molihok sama sa peke nga mga higala. Diha sa mga hawanan, sila moingon og, “kumusta, amigo?” Ug dayon sila magkinataw-anay ug maghinunghongay bahin kanako. Ang ubang mga tawo nagbugal-bugal sa akong hitsura. Makapasapot gayod kadto ug mipabati nako og kabakikaw.

Kaniadto dili kaayo ako mag-ampo. Apan labi na sa dihang gisugdan na ako og sungog diha sa eskwelahan, nagsugod ko nga mag-ampo pa og dugang. Sa pagsugod, dili ko segurado unsa ang isulti. Apan sa kadugayan, mibati na ko og kakomportable nga makig-istorya sa Langitnong Amahan tungod kay nakaugmad na ako og relasyon uban Kaniya.

Karon kon adunay mahitabo sa eskwelahan, mosulti lang ko og pag-ampo sa akong hunahuna. Nakahibalo ko nga si Jesukristo nag-uban nako, ug Siya ang labing suod nga Higala nga maangkon nako. Ang pag-ampo ug paghinumdom ni Kristo nakatabang nako nga makaamgo nga ang mga isulti sa ubang tawo dili mahinungdanon. Ang mahinungdanon mao ang unsay gihunahuna sa Langitnong Amahan ug ni Jesukristo kanako.