20 ka Ideya alang sa usa ka Bulan nga Pagsaulog sa Pasko sa Pagkabanhaw

Ni Kate Stewart

Mga Magasin sa Simbahan

Ang mga tawo nagsaulog sa Pasko tibuok Disyembre. Unsa kaha kon magsaulog og usa ka bulan sa Pasko sa Pagkabanhaw aron mahinumdoman ang maulaong sakripisyo ni Kristo? Ania ang pipila ka ideya.

Atol sa Disyembre, daghang tawo ang nagsunod sa mga tradisyon sa Pasko ug naghatag og labing espesyal nga pagtutok sa Manluluwas sa tibuok bulan.

Karon nga bulan, pwede ka nga mosuway sa paghimo og usa ka butang nga lahi aron sa pagtukod og bag-ong mga tradisyon sa Pasko sa Pagkabanhaw. Ania ang 20 ka ideya, usa alang sa matag adlaw gikan sa Abril 1 hangtod Abril 20 (Pasko sa Pagkabanhaw). Pagmahimong gawasnon sa pagmugna og imong kaugalingon!

batan-ong lalaki nga nanuktok sa pultahan

Pagbisita og usa ka tawo nga taudtaod na nga wala nimo makita. Kini makapahinumdom nimo sa pagbisita ni Kristo kang Maria, sa Iyang Apostoles, ug daghang katawhan human sa Iyang Pagkabanhaw.
Paghimo og “Tungod Kaniya” nga journal. Matag adlaw, humana ang kapahayag nga “Tungod Kaniya …” diha sa journal og usa ka butang nga bag-o nga imong gipasalamatan sa Manluluwas.
Paminawa o kantaha ang mga himno ug mga awit mahitungod sa Manluluwas ug sa Pasko sa Pagkabanhaw.
Paghimo ug pagpalupad og tabanog. Sa Bermuda, kini usa ka komon nga tradisyon sa Pasko sa Pagkabanhaw ang pagsaulog sa pagbangon ni Kristo gikan sa lubnganan.
Pagbisita og sementeryo. Hunahunaa ang mahitungod sa gasa sa kinabuhing walay kataposan!
Hinuktoki ang Pag-ula ni Kristo atol sa sakramento. Hunahunaa kon unsa ang kahulogan sa Pag-ula ni Kristo ngadto kaninyo sa indibidwal nga paagi.
Pagserbisyo sa uban. Paggahin og panahon nga magserbisyo ug maningkamot nga mahimong mas sama ni Kristo.
Pagkat-on og luto og mga roll o pan. Samtang motubo ang pan, hunahunaa giunsa ni Kristo pagbangon gikan sa mga patay.
Tan-awa ang 2024 nga mensahe sa Pasko sa Pagkabanhaw gikan sa mga propeta ug apostoles. Pangitaa kini nga mga bidyo sa newsroom.churchofjesuschrist.org/article/apostles-jesus-christ-easter.
Paghimo og “kahoy sa itlog sa Pasko sa Pagkabanhaw.” Pagsulat og mga kinaiya ni Jesukristo diha sa mga gagmayng papel, ibutang kini sa plastik nga mga itlog, ug ibitay sa usa ka kahoy isip dayan-dayan.
Paglakaw subay sa usa ka tanaman o sa kinaiyahan. Samtang imo kining gibuhat, paghunahuna mahitungod ni Kristo nga nag-ampo, nag-antos, ug nagdala diha sa Iyang Kaugalingon sa mga sala sa kalibotan didto sa Tanaman sa Getsemani.
Pasayloa ang usa ka tawo. Hunahunaa kon giunsa paghangyo ni Kristo ang Langitnong Amahan sa pagpasaylo sa mga tawo nga mitraydor Kaniya samtang Siya gilansang sa krus.
Paghimo og papel nga dahon sa lukay. Kini makapahinumdom nimo sa Dominggo sa Lukay, ang madaogong pagsulod ni Kristo sa Jerusalem.
Pangita ug panindota ang usa ka bato ug ibutang kini sa usa ka dapit nga daling makit-an. Himoa kini aron makatabang nimo sa paghunahuna mahitungod sa bato nga gitabon sa lubnganan. Sa Pasko sa Pagkabanhaw, isibog ang bato aron isaulog ang lubnganan nga wala nay sulod!
Surprisaha ang usa ka sakop sa pamilya pinaagi sa paglimpyo sa usa ka butang alang kanila. Hugasi ang mga kinan-an, limpyohi ang banyo, o hiposa ang gihigdaan sa usa ka tawo! Hinumdomi giunsa sa Manluluwas paglimpyo ang templo.
Pagtuon sa mga panghitabo sa kataposang semana sa kinabuhi ni Kristo. Sa semana sa wala pa ang Pasko sa Pagkabanhaw, pagkat-on kauban sa imong pamilya mahitungod sa kataposang semana sa kinabuhi ni Kristo.
Kaon og panihapon nga nagsuga og kandila. Hunahunaa si Kristo ug ang Iyang Apostoles nga nalipay sa Kataposang Panihapon sa gabii tupad sa lampara.
Dasiga ang uban sa Biyernes Santo. Ang Biyernes sa wala pa ang Pasko sa Pagkabanhaw mao ang Biyernes Santo. Pagpakatap og daghang kaayo pinaagi sa pagserbisyo sa uban o pagpakigbahin og positibo nga mensahe diha sa social media!
Pagtuon sa 3 Nephi 11. Pagkat-on mahitungod sa pagbisita ni Kristo ngadto sa katawhan sa karaang Amerika human sa Iyang pagkabanhaw.
Dominggo sa Pasko sa Pagkabanhaw! Panahon sa pagpamalandong. Malingaw sa simbahan. Dayon mamalandong sa tanan nga imong gibuhat karong bulana aron motutok ni Jesukristo. Unsa nga mga kausaban ang imong mahimo aron mas makahinumdom ni Jesukristo sa tibuok tuig?