Digital Lamang

Kalipay, Gipadaghan: Usa ka Leksiyon sa Celestial nga Matematika

Ni David A. Edwards

Mga Magasin sa Simbahan

Ang usa ka pagbag-o sa panghunahuna kabahin sa kalamposan sa ubang mga tawo ug sa maayong kapalaran magdala kaninyo og dugang nga kalipay. Ug sa matematika sa Ginoo, nagpasabot kana nga milagro sa pagpadaghan.

Atong hisgotan ang mahitungod sa butang nga makahimo sa inyong kinabuhi nga mas maayo ug mas malipayon.

Apan una, hunahunaa unsay inyong buhaton sa mosunod nga sitwasyon:

Ang inyong higala mahinamong misulti kaninyo nga nakakuha sila og perpekto nga score sa ilang eksamin sa matematika. Kamo dugay nang ganahan nga maperpekto sa eksamin sa matematika, apan wala pa gayod ninyo kini mahimo. Unsay inyong reaksiyon?

Moingon ka ba og: (a) “Unta ako pod maperpekto sa eksamin, apan ang akong titser dili kaayo maayo nga mopasabot” o (b) “Pagkaanindot! Seguradong nakatuon ka gayod og maayo”?

Kon nahunahuna nimo, “Duh—(b),” kon ingon man niini anaa ka na sa posisyon aron madugangan ang kalipay sa imong kinabuhi ug ang kinabuhi sa uban. Apan posible usab nga wala nimo masayri kon unsa kadaghang tawo ang motubag og (a) kon nagmatinuoron pa sila—ug unsa kalisod ang (b) para sa ilaha diha sa usa ka tinuod nga sitwasyon sa kinabuhi.

Mao nga, aniay usa ka yawe alang sa mas maayo, mas malipayong kinabuhi: Kat-oni unsaon nga tinuorayng malipay alang sa kalamposan ug maayong kapalaran sa uban.

Kasagaran makadungog kita nga kita angay nga mosunod sa ehemplo sa Manluluwas ug magbaton og kaluoy ngadto sa uban. Apan adunay duha ka habig ang pagkamanggiluy-on. Oo, kinahanglan nga kita “[mo]hilak duyog sa mga nagapanghilak,” apan angay usab nga kita “[mag]lipay duyog sa mga nagakalipay” (Mga Taga-Roma 12:15). Ang paghimo sa ingon makahimo kanatong mas malipayon ug mas maayo nga tawo.

Kaabunda vs. Kanihit

Gihatagan kita sa Ginoo og usa ka baroganan nga may kalabotan sa materyal nga mga butang nga magamit usab sa ubang mga butang sama sa kamaya, pagdayeg, ug gugma: “Adunay igo ug sobra pa” (Doktrina ug mga Pakigsaad 104:17).

Dinhi ang Ginoo nagtudlo ngari nato og usa ka panghunahuna bahin sa kaabunda (“Adunay daghan alang sa matag usa—ug dayon adunay pipila pa”) kay sa usa nga nagnihit (“Walay igo alang sa tanan”).

Ang pag-usab sa atong hunahuna ngadto sa kaabunda makausab og dako sa atong kinaiya. Imbis magpundo og mga butang para sa atong kaugalingon, andam kitang mopakigbahin.

Tinuod gayod kini kon mahitungod sa mga butang sama sa kamaya, pagdayeg, ug paghigugma.

Siyempre, usahay makigtigi kita sa uban sa mao ra gihapon nga butang. Pero bisan ingon man niini, pwede gihapon tang makakita og kalipay sa kalamposan sa uban ug tingali atong ilhon ang kaugalingon natong kalamposan sa lahi nga paagi. Para sa usa ka personal nga kahulogan sa kalamposan, ang maayong dapit sa pagsugod tingali mao ang “Paghimo sa akong labing maayo ug pagkat-on gikan sa mga sayop ug sa mga hagit.”

Dili ka mous-os tungod kay ninglampos ang uban. Dili mamenosan ang imong kalipay kon ang kalipay sa uban modako. Adunay suplay sa kalipay nga walay pagkahurot nga alang sa tanan.

Celestial nga Matematika

Ang “celestial nga matematika” sa kalipay mas labaw pa kay sa basta lang magdugang; mahitungod kini sa pagpadaghan. Kon makakat-on kita sa pagpangita og kalipay diha sa kamaya sa ubang tawo, mahimo nato ang labaw pa kay sa pagdugang lamang sa atong kalipay; atong mapadaghan ang kalipay sa atong kaugalingon ug sa uban.

“Ang tinuod nga hingpit nga kalipay modaghan kon kini ipakigbahin.” Tinuod kana diha sa pagpakigbahin sa ebanghelyo ni Jesukristo, ug tinuod kini diha sa pagkahimong tinuod nga malipayon alang sa uban kon makaangkon sila og kalamposan o makadawat sa gikinahanglang mga panalangin sa Dios.

Pagmaya sa Pakigsaad

Para kanatong tanan kinsa nakahimo og mga pakigsaad sa Dios, ang pagkamalipayon alang sa uban usa ka kinaiya sa kasingkasing nga modagayday gumikan sa pagpaningkamot sa pagsunod sa Manluluwas ug sa ikaduhang dako nga sugo: “Higugmaa ang imong isigkatawo sama sa imong kaugalingon” (Mateo 22:39; Levitico 19:18).

Kon mohimo kita og mga pakigsaad, kita “andam sa pagbangotan uban niadtong nagbangotan; … ug sa paghupay niadtong nanginahanglan og kahupayan” (Mosiah 18:9). Sa natural nga paagi, niana, kita andam usab nga magmaya uban niadtong mga nagmaya sa maayong mga butang nga nanghitabo sa ilang kinabuhi.

Usa ka Pagtesting

Aniay pipila ka pangutana nga tingali imong ipangutana sa imong kaugalingon isip usa ka pagtesting kon asa ang imong gibarogan sa pagkahimong malipayon alang sa uban:

Kon dunay tawong nagmalamposon o nakaangkon og mga pagdayeg, unsay una nimong mahunahuna? Unsay imong bation bahin niini?
Masina ka ba sa gibati nga kalipay sa uban sama nga ikaw masina sa ilang mga kabtangan? Mangluod ka ba bahin niini?
Sa imong reaksiyon, daghan ba ang imong ihisgot sa imong kaugalingon o sa ubang tawo?

Kon giunsa nimo sa pagtubag kini nga mga pangutana makahimo kini og dako nga kalainan kon unsa kadako sa kalipay ang imong masinati (ug niadtong mga anaa sa imong palibot).

Mao nga, himoang mas maayo ug mas malipayon ang imong kinabuhi. Padak-a og maayo ang imong kalipay pinaagi sa pagpadaghan niini. Pagmalipayon alang sa uban. Yano ra kini, ug gamhanan kini.

Mga Ideya alang sa Kausaban

Kon ang tinuod nga pagkalipay alang sa uban lisod alang nimo, aniay pipila ka butang nga tingali makatabang sa pag-usab niana:

Motutok ngadto ni Jesukristo.
Himoa nga ang pagpasalamat usa ka mas dako nga bahin matag adlaw—pagpasalamat ngadto sa Dios ug sa uban.
Dayga ang usa ka tawo sa ilang pagkugi.
Sa sunod higayon nga dunay tawo nga makasinati og pipila ka kalamposan, himoa nga ikaw ang unang mopasidungog kanila.
Moadto sa usa ka kompetisyon o pasundayag sa usa ka higala o igsoon aron mosuporta ug modayeg kanila.
Kon mopasidungog o modayeg sa usa ka tawo, ayaw ihisgot ang inyong kaugalingon.
Hinumdomi unsay imong gibati dihang dunay midayeg kanimo o ingon og tinuorayng nahimuot sa imong kalamposan o mga panalangin, ug hunahunaa ang paghimo sa uban nga mobati og ingon niana.