Mihunong og Kadali sa Pag-Ballet

Malaomon kaayo ko nga makabalik ko sa pagsayaw kon mobalik na ang ting-eskwela inig tinglarag. Apan dihang miabot kini, nagpaayo pa gihapon ko. Pagka-Septiyembre, human sa hugot nga pag-ampo, mihimo ko sa labihan ka makahadlok nga desisyon nga moadto sa usa ka klinika aron matabangan ko sa akong kahimsog.

Nagsugod na sab ko sa pagtambong sa seminary. Maayo kaayo kini nga paagi sa pagsugod sa akong adlaw, nga malamdagan sa ebanghelyo. Wala pa gayod ako maanad sa pagtuon sa kasulatan. Ang paggahin sa maong oras sa adlaw nga isubsob alang sa mga kasulatan nagtabang nako nga makapalambo og mas lig-on nga relasyon sa Dios.

Sa wala pa ang akong mga hagit sa medikal, migahin ko og daghan kaayong panahon sa pagsayaw nga ang akong nailhan lamang sa kaugalingon mao ang pagkamananayaw. Ang pagkawala niini isip akong kasandigan atol niining malisod nga panahon naghimo kanako nga mobati nga nahisalaag ug ingon og adunay piraso nga nagkulang kanako. Apan akong namatikdan nga dihang nagsige ko og adto sa seminary, mibasa sa mga kasulatan, ug gipalibotan ang akong kaugalingon sa ubang mga batan-on nga naghimo sa samang butang, nagsugod ko nga mas nakaila sa akong kaugalingon isip anak sa Dios. Human sa pagbati nga nawala sulod sa dugayng panahon, kini nakatabang gayod kanako nga makakaplag og paglaom ug kahulogan.

Usa ka konsepto nga padayong mitumaw atol sa akong klase sa seminary nakatabang og dako kanako. Kini nga konsepto mao ang paagi ni Kristo sa paglig-on kanato atol sa atong mga pagsulay. Sa matag klase, ang akong titser sa seminary midasig namo sa pagsulat gamit ang sticky notes mahitungod sa butang nga “nagpatigbabaw kanamo.” Sa pagtan-aw sa nangagi, ang tanan sa akong sticky notes nagtutok kang Kristo nga anaa alang kanako ug pagpanalangin kanako sa akong mga pagsulay. Sama og nagdawat ko og inadlaw nga pahinumdom nga si Kristo anaa sa pagtabang kanako.

Human sa unom ka taas nga mga bulan, sa kataposan naayo na ko sa problema sa medikal nga makabalik na sa pagsayaw. Sa sinugdanan, ginerbiyos kaayo ko kay mibati ko nga ingon og nahutdan sa akong tanan nga kusog. Padayon ko nga naningkamot, nag-ampo, nagsimba, ug naglaom nga kon maningkamot gayod ako, tabangan ako sa Manluluwas. Sa akong pagbalik, bisan og dili ko sama kalig-on sa una, gidayeg sa akong titser ang akong kalig-on. Miingon siya nga mapasigarbohon siya kanako ug sa akong paglambo.

Bisan og naglisod kaayo ko, nagpasalamat ko nga ang akong mga hagit sa medikal naghatag nako og higayon nga malig-on ang akong relasyon uban sa Langitnong Amahan ug ni Jesukristo ug nakaplagan ang akong pagka-ako isip anak sa Dios.

Ngadto ni bisan kinsa nga nagsagobang og butang nga malisod, hibaloi nga ikaw sa kanunay adunay mga tawo nga naglibot sa pagsuporta kanimo, nakita man nimo sila o wala. Kamo anak sa Dios. Bisan og dili nato makita si Jesukristo o ang Langitnong Amahan, Sila nagbantay kanato ug nanalipod kanato. Ang Langitnong Amahan adunay plano alang kanato. Usahay tingali dili nimo masinati ang unsay imong ganahan, apan ang imong mga pagsulay makatabang nga mas malig-on ka.

Duna koy pagpamatuod nga kon mag-ampo kita ug mougmad og usa ka relasyon sa Dios, anaa Siya sa paggiya kanato, pagtabang kanato, ug paglig-on kanato.