Pinaagi sa Panan-aw sa Dios

Paghulagway pinaagi ni Katelyn Budge

Adunay panahon diin dili ko ganahan nga maduol sa usa ka batang babaye sa akong klase sa Mga Batan-ong Babaye. Ang uban niya nga kinaiya murag dili angay ngari nako. Nangutana ko sa akong kaugalingon, “Nganong ingon ana man siya?”

Dayon diha sa usa ka komperensiya, usa ka tawo ang naghisgot mahitungod kon unsaon nato nga dili motan-aw sa mga tawo kon unsa sila apan kon kinsa sila mamahimo. Kana midulot gayod kanako. Nakadesisyon ko nga mosulay ug motan-aw sa maayo nga mga butang mahitungod niini nga batan-ong babaye. Siya moapil sa klase. Siya andam nga moadto sa simbahan bisan kon siya lang ug ang iyang igsoong babaye ang aktibong miyembro sa ilang pamilya. Siya andam nga moadto sa mga kalihokan, bisan kon ang iyang igsoong babaye dili ganahan.

Sa dihang nagsugod ko sa pagtan-aw sa maayong mga butang mahitungod niining batan-on nga babaye, gibati nako nga wala na nako siya gitan-aw pinaagi sa akong kalibotanong mga mata. Gibati nako nga ako na siyang gitan-aw pinaagi sa mga mata sa Dios, sa paagi nga siya motan-aw kaniya.

Isip mga disipulo ni Kristo, atong buluhaton ang paghigugma sa usag usa. Nasayod ako nga kini dili sayon kanunay. Apan kon kita motan-aw sa mga tawo sa paagi nga ang Langitnong Amahan ug si Jesukristo motan-aw kanila, kita makahinumdom nga sila mga anak sa usa ka Hari, sama nato. Sila adunay ilang kaugalingon nga mga hagit. Unang higayon usab nila nga mopuyo sa kalibotan.

Ang paghigugma sa uban posible tungod kay mahimo natong maangkon ang tabang sa Langitnong Amahan ug ni Jesukristo. Atong mabati ang Ilang kalig-on ug mahinumdom sa pagtan-aw sa uban pinaagi sa Ilang mga mata, dili ang atong kaugalingon.