Tabang gikan ni Jesukristo: Ang Ngano ug Unsaon

Ni Brynn Wengler

Mga Magasin sa Simbahan

Sabta kon nganong si Jesukristo mao ang tubag ug unsaon Niya sa pagtabang nimo.

“Gibati nako nga sige lang ko og kasayop. Lisod ang magpadayon sa pagpaningkamot.”

“Ang akong sitwasyon lisod. Dili ko segurado kon unsaon sa pagpadayon.”

“Nabalaka ko mahitungod sa umaabot. Wala ko kahibalo kon anaa ba kanako ang unsay gikinahanglan aron molampos.”

“Gikapoy na kaayo ko, apan anaa pay daghan nga kinahanglang buhaton.”

Nakakita ka ba og kalabotan sa bisan asa niini nga mga problema? Si Presidente Russell M. Nelson nagtudlo, “Bisan unsa nga mga pangutana o mga problema nga ikaw aduna, ang tubag kanunay nga makaplagan diha sa kinabuhi ug mga pagtulun-an ni Jesukristo” (“Ang Tubag sa Kanunay Mao si Jesukristo,” Abr. 2023 nga kinatibuk-ang komperensiya [Liahona, Mayo 2023, 127]).

Sayon ra ang pag-ingon, “Si Jesukristo mao ang tubag.” Nagkinahanglan og gamay nga dugang pang paningkamot aron masabtan ngano ug unsaon nga Siya mao ang tubag.

Ngano nga si Kristo ang Tubag?

Sa dihang Siya milahutay sa Iyang maulaong sakripisyo, ang Manluluwas mihimo ug tulo ka mahinungdanong butang:

Iyang gibuntog ang kamatayon, nagtugot nga kita mabanhaw.
Iyang gibayaran ang kantidad alang sa tanang sala, mihimong posible alang kanato nga maghinulsol, maglambo, ug makabalik ngadto sa Dios. Kana usab nagtabang kanato nga mopasaylo sa uban kon sila makasala, tungod kay si Kristo midala sa ilang mga sala diha sa Iyang Kaugalingon.
Iyang nasinati ang tanang mga sakit, mga kasakit, mga pagtental, mga balatian, ug mga kahuyang (tan-awa sa Alma 7:11–13). Kana nagpasabot nga Siya tukma gayod nga nasayod unsaon sa pagtabang ug pag-ayo nimo ug makalig-on nimo aron makalahutay sa mga pagsulay ug maningkamot nga mahimong mas maayo.

Pagpili og bisan unsa nga problema, ug imong makonektar ang solusyon balik ngadto sa usa o mas daghan pa niadtong tulo ka kamatuoran.

Kakabos? Tungod kay si Jesukristo nakasinati sa tanang butang, Siya tukma nga nasayod kon unsa kini. Dili Siya kanunay nga motangtang sa babag, apan Siya makalig-on sa katawhan nga nagpas-an niana nga mga palas-anon (tan-awa sa Mosiah 24:15).

Kapakyasan? Tungod kay nabuntog ni Kristo ang sala, ang atong mga kapakyasan dili kinahanglan nga permanente. Ang paghinulsol naglakip sa pagkahimong labaw pa sa tawo nga Siya nasayod nga kita mamahimo.

Sakit? Tungod kay nabuntog Niya ang kamatayon, kita mabanhaw nga adunay hingpit nga mga lawas nga dili mataptan sa sakit ug balatian. Si Kristo usab “[midawat] nganha kaniya sa … mga sakit” (Alma 7:11), naghimo Kaniya nga ang perpekto nga tawo nga maghatag og kahupayan ug suporta.

Unsaon ni Kristo sa Pagtabang?

Apan bisan kon kita nakahibalo ngano nga ang Manluluwas mao ang tubag (tungod sa kon kinsa Siya ug unsa ang Iyang gibuhat alang kanato), kita kinahanglan gihapon nga makahibalo unsaon nga kita makakuha og tabang ug kalig-on gikan Kaniya. Ania ang pipila ka paagi:

Pag-ampo. Pinaagi sa pag-ampo diha sa ngalan ni Jesukristo, ang dili perpekto nga mga tawo sama nato makaistorya sa usa ka perpekto nga Dios. Kita makaampo alang sa kalig-on nga atong gikinahanglan sa bisan unsa nga sitwasyon, ug ang Dios motubag—dili kanunay sa paagi nga atong gusto o gilaoman, apan diha sa paagi nga mopanalangin kanato. Ang pagdapit sa Manluluwas tinuod: “Pangayo, ug kamo hatagan” (Juan 16:24; 3 Nephi 27:29; Doktrina ug mga Pakigsaad 4:7).

Ang Gasa sa Espiritu Santo. Ang Langitnong Amahan, si Jesukristo, ug ang Espiritu Santo hingpit nga nagkahiusa sa katuyoan. Silang tanan nagkahiusa! Bisan unsang higayon nga inyong mabati ang giya o paghupay gikan sa Espiritu Santo, kamo makasabot niana nga si Kristo mitabang usab kaninyo.

Pagtuman sa mga Pakigsaad. Si Elder Dale G. Renlund sa Korum sa Napulog Duha ka Apostoles nagtudlo: “Ang pulong dalan sa pakigsaad nagpasabot sa daghang han-ay sa mga pakigsaad nga pinaagi niini makaduol kita kang Kristo ug masuod Kaniya. Pinaagi niining bugkos sa pakigsaad, makaangkon kita og pamaagi sa pagkab-ot sa Iyang mahangtoron nga gahom” (Abril 2023 nga kinatibuk-ang komperensiya [Liahona, Mayo 2023, 36]).

Grasya. Kon kita mopakita og hugot nga pagtuo ni Jesukristo ug maghinulsol, kita makadawat og dugang nga tabang ug kalig-on (nga gitawag usab og grasya) sa pagbuhat sa mga butang nga dili nato mahimo sa atong kaugalingon (tan-awa sa Giya ngadto sa mga Kasulatan, “Grasya”). Kini nga kalig-on, o grasya, mahimong moabot sa daghang paagi: gikan sa Espiritu Santo, usa ka higala, usa ka estranyo, usa ka pagbati. Sa sukaranan, bisan unsang butang nga maayo naggikan kang Kristo (tan-awa sa Moroni 7:22). Kon ikaw makakita og bisan gamay lang nga dugang nga pasensiya, gamay nga dugang nga kusog, gamay nga dugang nga kalig-on sa paglahutay, ilha kana nga si Kristo mitabang kanimo.

Hinumdomi Ngano ug Unsaon

Mao nga sa sunod higayon nga kamo nagkinahanglan og tubag sa usa ka pangutana o problema, tan-aw ngadto ni Kristo. Hinumdomi nga tungod sa Iyang kadaogan batok sa sala, kamatayon, ug tanang uban pa nga mga hagit sa pagka-mortal, walay imposible. Tan-awa kon unsaon Niya nga makapanalangin kanimo, ug imong makita ang Iyang impluwensiya sa imong kinabuhi. Nahigugma Siya kanimo og maayo!