Ikaw ba Naglaom og Mas Labaw Pa sa Imong Kaugalingon kay sa Manluluwas?
Alang sa kabatan-onan nga nakigbisog sa pagbati nga mahimong hingpit o sa relihiyosong kakuti.
Mibati ka ba nga ikaw napakyas sa pagsunod sa ebanghelyo? Nga mura ba og dili gayod mahimong igo ang imong kamaayo? Ang Langitnong Amahan naghangyo kanato sa pagtuman sa mga sugo ug sa paghimo ug pagtuman sa mga pakigsaad. Apan siya wala maglaom nga kita hingpit nga mobuhat niadto nga mga butang. Sa pagkatinuod, Siya nakahibalo nga dili kita mobuhat. Mao nga Iyang gipadala ang Manluluwas.
Tubaga ang mga pangutana niini nga artikulo, maghunahuna kon ikaw ba naglaom og mas labaw pa sa imong kaugalingon kay sa gibuhat sa Langitnong Amahan ug ni Jesukristo.
Ikaw ba nabalaka mahitungod sa pagkahimong igo nga takos?
-
Oo
-
Wala
-
Tingali
Mga Pananglitan: Ang pagkompisal sa gagmay nga mga sala o mga sala nga imo na nga gikompisal kaniadto. Pagduhaduha nga ikaw makasulod sa celestial nga gingharian. Mahadlok nga makabaton og “dili maayo nga mga hunahuna” o mahimong usa ka “dili maayo nga tawo.” Maghunahuna nga ang imong pagtuo ug pagpamatuod dili igo ang kalig-on.
Ang pagkahimong takos wala magpasabot nga dili na gayod makahimo og mga sayop. Kini wala magpasabot nga mahimong hingpit nga matarong sa tanang higayon. Kini hinuon nagpasabot nga ikaw naningkamot nga magpuyo sa imong mga pakigsaad ug misalig sa Manluluwas. Sama sa giingon ni Presidente Russell M. Nelson, “Pagmapainubsanon sa inyong kaugalingon. Ang pagka-perpekto dili pa mahitabo niining kinabuhia apan sa sunod nga kinabuhi.”
Gibati ba nimo nga dili ka angayan sa gugma sa Dios?
-
Oo
-
Wala
-
Tingali
Mga Pananglitan: Paglikay sa pag-ampo tungod kay wala ka magtuo nga ang Dios gusto nga makadungog gikan kanimo. Pagpalayo sa templo tungod kay gibati nimo nga dili ka takos. Naglisod sa kinatibuk-ang komperensiya o mga miting sa simbahan tungod kay kini nakapahimo nimo nga mobati nga nakasala.
Si Presidente Thomas S. Monson (1927–2018) miingon: “Ang gugma sa Dios anaa alang kaninyo dili igsapayan kon mobati man kamo nga angayan o dili sa gugma. Anaa ra kini kanunay.” Bisan unsa pa man ang tingali imong nabuhat, ang Langitnong Amahan kanunay nga nahigugma kanimo. Kanunay. Dili Siya gusto nga ikaw maungot sa mga pagbati sa kaulaw o kawalay paglaom. Siya ang imong Amahan! Gusto Niya nga ikaw moduol Kaniya, aron makakaplag og kalinaw ug paglaom.
Nagtuo ka ba nga ang Pag-ula sa Manluluwas dili magamit nganha kanimo?
-
Oo
-
Wala
-
Tingali
Mga Pananglitan: Mibati nga mura og ikaw ang eksepsiyon sa gahom sa Manluluwas nga moluwas kanato. Naghunahuna nga kinahanglan imong hagoan ang imong agianan padulong sa langit.
Si Moroni miingon, “Duol ngadto kang Kristo, ug paghingpit diha kaniya” (Moroni 10:32; tan-awa usab sa Alma 26:12). Ang pagkahimong igo ang kamaayo sa imong kaugalingon dili gayod posible. Apan ikaw mahimong igo ang kamaayo uban ni Jesukristo. Pagbaton og pagtuo nga ang Manluluwas makaluwas kanimo.
Nagtuo ka ba nga ang mga sugo kinahanglang sundon nga “sakto gayod”?
-
Oo
-
Wala
-
Tingali
Mga Pananglitan: Mag-ampo nga dunay listahan sa mga butang nga “kinahanglan nimong” isulti. Magpuasa og mas taas o mas kanunay kay sa gilaoman. Mobayad og mas sobra sa 10 ka porsiyento sa ikapulo. Mobati nga kinahanglan nimong tun-an ang ebanghelyo nga “tukma gayod” o sa piho nga gidugayon sa panahon o kini dili balido.
Hinumdomi, ang mga sugo gihatag kanato gikan sa usa ka mahigugmaon nga Langitnong Amahan alang sa atong kaayohan. Pangitaa ang mga panalangin nga moabot gikan sa pagpuyo sa mga sugo kay sa panguti-kuti kon kamo dili hingpit nga nagtuman niini.
Unya? Ikaw ba naglaom og mas labaw pa sa imong kaugalingon kay sa Manluluwas?
Kon kini nga artikulo moigo sa personal o emosyonal nga lebel, ang imong mga gilaoman sa imong kaugalingon tingali taas ra kaayo. Ang Manluluwas wala maglaom nga ikaw mahimong hingpit—Siya naglaom nga ikaw magpadayon sa pagpaningkamot ug paghinulsol kon ikaw makahimo og mga sayop. Siya mao ang moluwas ug mohingpit kanato. Sama sa giingon sa Manluluwas, “Ang Akong grasya igo alang kaninyo” (Doktrina ug mga Pakigsaad 17:8).
Ang Langitnong Amahan nahigugma kaninyo. Ang Manluluwas mao ang inyong tigpanalipod. Parehas nilang gusto nga ikaw makabalik ngadto Kanila.