Ko e hā ʻa e kakato ʻo e ongoongoleleí?

Sīsū Kalaisi ʻi Ketisemani, tā fakatātaaʻi ʻe Dan Burr

Kuo folofola ʻa e ʻEikí ko e kakato ʻo e ongoongoleleí ko e “fuakava taʻengatá” ia, ʻa ia kuó Ne “ʻoatu ki he fānau ʻa e tangatá” (Tokāteline mo e Ngaahi Fuakava 66:2). ʻOku kau ai ʻa e meʻa kotoa pē ʻoku fiemaʻu ki he fānau ʻa e ʻOtuá ke nau hū ki ha vā fetuʻutaki fakafuakava mo Ia pea maʻu ʻa e fakamoʻuí mo e hakeakiʻí.

Ko e ongoongoleleí ʻa e “ongoongo lelei” fekauʻaki mo Sīsū Kalaisí. Ko e “palani [ia] ʻo e fakamoʻui ʻa e ʻOtuá, tuʻunga ʻi he Fakalelei ʻa Sīsū Kalaisí. ʻOku kau ʻi he ongoongoleleí ʻa e ngaahi moʻoni pe ngaahi fono, ngaahi fuakava mo e ngaahi ouau taʻengata ʻoku fiemaʻu ʻe he faʻahinga ʻo e tangatá ke nau lava ʻo toe foki hake ai ki he ʻao ʻo e ʻOtuá” (Fakahinohino ki he Ngaahi Folofolá, “Ongoongoleleí”). Kuo mole ha konga lahi ʻo e ngaahi meʻá ni. Ka ko ʻeni, ʻi he fakahā ki he kau palōfitá, ʻo kamata ʻia Siosefa Sāmita, ʻoku fakafoki mai ai ʻe he ʻEikí ʻa e kakato ʻo ʻEne ongoongoleleí.

ʻI hono Fakafoki Mai ʻa e kakato ʻo e ongoongolelei ʻa Sīsū Kalaisí, ʻokú Ne “fakaafeʻi kitautolu kotoa ke haʻu kiate Ia mo Hono Siasí, ke maʻu e Laumālie Māʻoniʻoní, ngaahi ouau ʻo e fakamoʻuí, mo maʻu e fiefia ʻoku tuʻuloá” (“Ko e Fakafoki Mai ʻa e Kakato ʻo e Ongoongolelei ʻo Sīsū Kalaisí: Ko ha Fanongonongo ki Māmani ʻo e Taʻu Uangeaú,” Gospel Library).