“Te u maʻu fēfē ha fakamoʻoni mālohi ange kia Siosefa Sāmita mo hono Fakafoki Mai ʻo e Ongoongoleleí?”

“Ko e meʻa kuó u fai ke fakamālohia ai ʻeku fakamoʻoni ki hono Fakafoki Mai ʻo e Ongoongoleleí ko ʻeku lau ʻa e fakamatala ki he ʻuluaki mata meʻa-hā-maí ʻi he pō kotoa kimuʻa peá u mohé. ʻI he taimi ʻoku ou lau ai fekauʻaki mo hono fakahaofi ʻo Siosefa mo ʻene tuʻu ʻi he ʻao ʻo e ʻOtuá, ʻoku ou ongoʻi ofi ange ai ki he maama ʻa e ʻOtuá, pea ʻoku tokoni ia ke u ʻiloʻi ʻokú Ne ʻi ai.”

Eve T., 16, Sōlei, UK

“ʻI heʻeku fakatokangaʻi naʻe ʻikai haʻaku fakamoʻoni kia Siosefa Sāmitá, naʻe kamata ke u lau ʻa e Kau Māʻoniʻoní. Naʻá ku fakatokangaʻi ʻa e mālohi mo e fakaofo ʻo e aʻusia ʻa Siosefá. Naʻá ku ongoʻi foki ʻa e Laumālié ʻi he taimi naʻá ku lotu ai fekauʻaki mo e Tohi ʻa Molomoná. Naʻe kamata ke u tokoni ki he kau faifekaú, pea ʻi he taimi ní ʻoku ʻikai ke u lava ʻo taʻofi ʻeku fakamoʻoni ki he kakaí fekauʻaki mo Siosefa Sāmita mo hono Fakafoki Mai ʻo e Ongoongoleleí.”

Abish N., taʻu 18, Nekolosi ʻOlienitolo, Filipaini

“Naʻe talamai ʻe he palōfitá ke tau ako ʻa e moʻui ʻa Kalaisí ke tokoniʻi kitautolu ke tau maʻu ha fakamoʻoni kiate Ia mo ʻEne Fakaleleí. ʻOku faitatau ia mo Siosefa Sāmita. ʻI heʻeku ako ʻene moʻuí, te u lava ʻo maʻu ha fakamoʻoni mālohi ange ki hono Fakafoki Mai ʻo e Ongoongoleleí pea mo e hoko ʻa Siosefa ko e ʻuluaki palōfita ʻo hotau kuonga fakakosipelí. ʻOku lava foki ke toe mahino lelei ange kiate au ʻa e ʻuhinga naʻe pau ke fakafoki mai ai ʻa e Siasi ʻo Sīsū Kalaisí.”

Asher W., 17, Luisiana, USA

“Fai ʻa e meʻa naʻe fai ʻe Siosefá pea kole ki he ʻOtuá! Faʻa kātaki; ʻe hoko mai ʻa e talí.”

Anna W., 17, Kololato, USA

“Ko e lotú ʻa e founga faingofua taha ke maʻu ai ha fakamoʻoni kia Siosefa Sāmita mo hono Fakafoki Mai ʻo e Ongoongoleleí. Kuo tali ʻe he ʻEikí ʻa e lotu ko ʻení maʻaku pea mo ha niʻihi kehe tokolahi—te Ne fai ʻa e meʻa tatau maʻau. Ako foki ʻa e ngaahi fakamoʻoni mālohi ʻa e kau fakamoʻoni ʻi he Tohi ʻa Molomoná.”

Andrew N., 18, Uāsingatoni, USA