Ko ʻEku Fefaʻuhi mo e Anga ʻo e Vakai ki Hoku Fōtungá

Paulina M., taʻu 18, Potileisi, Pōlani

ʻOkú ne saiʻia ʻi he tā vaioliní, tā pianó, mo lau ʻa e ngaahi tohi talanoá.

Naʻá ku fefaʻuhi lahi ʻi he ako lotolotó mo e anga ʻo e vakai ki hoku fōtungá pea mo e feinga ke kau atú. Naʻá ku feinga ke fakamālohisino ke u maʻu ha fōtunga pau, ka naʻe ʻikai pē ke u ongoʻi fiefia ʻi he ʻīmisi ʻi he sioʻatá.

Naʻe maʻu leva ʻe hoku taʻoketé hono tāpuaki fakapēteliaké, pea kamata ke u fakakaukau ke maʻu hoku tāpuaki fakapēteliaké. Naʻá ku taʻu 12, pea ʻi he kamataʻangá naʻá ku pehē mahalo ʻoku ou fuʻu kei siʻi. Ka naʻá ku lotu mo talanoa ki heʻeku pīsopé, pea naʻe ongo tonu ia.

Naʻe fakamanatu mai ʻe hoku tāpuaki fakapēteliaké ʻoku ʻafioʻi au ʻe he Tamai Hēvaní pea ʻokú Ne ʻafioʻi ʻa e ngaahi faingataʻa ʻoku ou fouá. ʻOkú Ne ʻafioʻi hoku hingoá. ʻOkú Ne ʻi ai ke tokoniʻi au kapau ʻoku ou loto-fiemālie ke kole ʻEne tokoní.

Mahalo te ke vakai kiate koe ʻi he taimi ʻe niʻihi pea fakakaukau ʻoku ʻikai ke ke matamatalelei feʻunga koe ʻi he ngaahi tuʻunga moʻui ʻa e māmaní. Ka naʻá ku ʻiloʻi ʻiate au pē ʻoku mahuʻinga ange ʻa e ʻafio mai ʻa e ʻOtuá kiate aú ʻi ha toe taha kehe. Pea kapau ʻoku ou ʻiloʻi ʻoku ʻafioʻi au ʻe he ʻOtuá ko Hono ʻofefine, ta ko e meʻa pē ia ʻoku ou fiemaʻú.