Fefaʻuhi mo ʻEku Ngaahi Fehuʻi fekauʻaki mo e Hisitōlia ʻo e Siasí

Naʻe kamata talanoa ʻeku faiakó ʻi heʻeku kalasi hisitōliá fekauʻaki mo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe ʻikai ke ne maʻu ha fakakaukau māʻolunga ki he Siasí. Naʻa ne pehē ko ha kakai mali tokolahi mo lau lanu kitautolu.

Naʻe ʻuhingamālie kiate au ʻa e meʻa kotoa pē naʻá ku ako kimuʻa fekauʻaki mo e Siasí. Ka naʻe ʻai ʻe he meʻa naʻá ku aʻusia ʻi he kalasí ke u fakakaukau ki ha ngaahi fehuʻi faingataʻa mei he hisitōlia ʻo e Siasí, hangē ko e ʻuhinga naʻe ʻikai fakangofua ai ʻa e kakai ʻuliʻulí ke nau maʻu ʻa e lakanga fakataulaʻeikí ʻi ha vahaʻataimi, pea mo e ʻuhinga naʻe hoko ai ʻa e mali tokolahí.

Koeʻuhí ko ia, naʻe kamata ke u fakakaukau, fakalaulauloto, mo lotu. Naʻá ku lau mei he folofolá, talanoa mo ʻeku ongomātuʻá mo e kau takí, peá u ako lahi ange maʻaku. Neongo naʻá ku maʻu ha ngaahi fehuʻi, ka naʻe ʻikai ke u foʻi pe tukunoaʻi.

ʻI heʻeku ako mo maʻu ʻa e ʻiló, naʻá ku ongoʻi hangē naʻe hiki hake aú. ʻOku teʻeki pē ke mahino kakato kiate au ʻa e meʻa kotoa pē, ka naʻá ku lava ʻo maʻu ha nonga.

ʻI he taimí ni ʻi heʻeku maʻu ha ngaahi fehuʻí, ʻoku ou piki maʻu ki he meʻa kuó u ʻosi ʻiló, ʻo hangē ko e ngaahi aʻusia kotoa kuo tokoni ke tupulaki ʻeku fakamoʻoní. ʻI he taimi ʻoku hoko ai ha meʻa taʻepau kiate au, ko e lotú ʻa hoku ungaʻangá, pea ʻoku ou feinga leva ke fakafanongo ki he Laumālié lolotonga ʻeku lau ʻa e folofolá.

Kuó u ʻiloʻi moʻoni ʻa e mālohi ʻo e Laumālié ʻi he taʻu kuo ʻosí, pea kuó u ongoʻi ha nonga mo ha fiemālie mo e ʻofa. ʻOku ou ʻilo ʻoku ʻi ai moʻoni ha ʻOtua ʻoku folofola mai kiate kitautolu pea ʻokú Ne finangalo ke tau foki ange ki ʻapi.