Ko Hono Langa ʻo e Ngaahi ʻApí mo e Ngaahi Fakamoʻoní
Naʻe tupulaki ʻa e pisinisi langa ʻa Selá. Ka naʻe ʻi ai ha fili ke ne fakahoko.
Ngaahi taá meia Christina Smith, tuku kehe ʻo ka fakahaaʻi kehe atu
Naʻe langa ʻe Noa ia ha ʻaʻake. Tuʻi ko Penisimaní ko ha taua. Ko e Tokoua ʻo Sēletí ko ha ngaahi vaka lafalafa. Pea kia Sela Kulisiteniseni mei Monitana, USA? Naʻá ne fakakaukau ʻokú ne fie langa ha ngaahi fale.
Naʻe kiʻi puputuʻu ʻa Sisitā Kulisiteniseni, kuo hoko ʻeni ko ha faifekau taimi kakato ʻoku ngāue ʻi he Misiona Minnesota Minneapolis, ʻi he tuʻu ʻa e ngāue fakafaifekaú ʻi hono vahaʻa mo ʻene ngaahi taumuʻa langá—pea naʻe ʻikai ko ʻene misioná pē ia!
Tau kamata mei he kamataʻangá.
ʻOkú ne pehē, “Kuó u tokoni ki heʻeku tangataʻeikí ʻi hono langa ha ngaahi meʻa ʻi he kotoa ʻo ʻeku moʻuí. Naʻá ku anga ki he ngaahi meʻangāue fakaʻuhilá mo e langá, pea naʻe fakaʻau ke u manako ki ai. Ko ia, ʻi hoku taʻu 16, naʻa ku fakakaukau ke kamata ʻeku pisinisi langa. ”
ʻOku pehē ʻe Sela, “Kuo akoʻi au ʻe heʻeku tangataʻeikí ke u fakatahatahaʻi ha ngaahi meʻa, mei he laʻipapa ʻe uá ki ha fale kakato.”
Ko Hono Fokotuʻu ha Pisinisi
Naʻe fuofua fakaleleiʻi ʻe Sela ha fale ʻi ha taʻu ʻe taha ʻi he faʻahitaʻu māfaná. Naʻá ne saiʻia ʻaupito ai ʻo ne toe fai ha ngāue fakaleleiʻi ʻe taha ʻi he taʻu hono hokó. Naʻe faifai pē peá ne fakakaukau ke fakahoko ha ngaue lahi ange—ko ha fale “fakafuofua”, pe ko ha fale te ne langa mo ʻene timi ngāue fakakonitulekí mei he fakavaʻé ki he fakaʻosí, mo ha ʻamanaki ke fakatau atu pea maʻu ha tupu.
ʻAho holokí! Ko Sela ʻokú ne toʻo ha hāmala ki ha falekaukau ʻi ha taha ʻo ʻene ngaahi ngāué.
Naʻe ʻikai ko ha ngāue faingofua hono kamataʻi ha pisinisí, tautautefito he naʻe kei femoʻuekina ʻa Sela ʻi he ako māʻolungá mo e lele malafoní.
Naʻe kamata ʻe Sela ʻene kautaha langá ʻi hono taʻu 16.
ʻOkú ne pehē, “Naʻá ku ako ha meʻa lahi. Naʻe pau ke u fakaʻaongaʻi ha tohi sieke ke totongi ʻaki ʻa e kakaí, ʻa ia naʻe teʻeki ke u fai kimuʻa. Naʻe pau ke u ongoʻi fiemālie ʻi he talanoa mo e kakai foʻou naʻa nau ngāue fakakonituleki mai kiate aú. Kuó u ako foki ʻa e founga ke fehangahangai ai mo e loto-mafasia ʻo hono fakalele ha kautahá, ʻa ia naʻe ʻikai ke fakafiefia maʻu pē. ʻOku ʻi ai maʻu pe ʻa e hohaʻa he ʻikai ke te lava ʻo maʻu ʻa e paʻanga ʻoku fiemaʻu ke tō ʻa e fakamolé naʻa mo hono fakatau ha falé. ”
ʻOku ʻIkai ʻAupito Ke Ke Tuenoa
Ka neongo ʻa e ngaahi hohaʻa mo e loto-mafasia ʻoku hoko ʻi hono fakalele ha pisinisí, naʻe ʻikai teitei fehangahangai toko taha ʻa Sela mo ʻene ngaahi fakaʻānauá.
ʻOkú ne pehē, “Naʻe iku lelei maʻu pē ʻa e ngaahi meʻá, pea ʻoku ou ʻilo ʻoku tuʻunga ia ʻi he ʻEikí. Naʻe taʻemalava ʻa e feinga fakapisinisi ko ʻení ka ne taʻeʻoua Ia. Naʻa Ne tokoniʻi au ʻi he ngaahi ʻaho naʻe ʻikai leleí, ʻi he ngaue faingataʻá, mo e meʻa kotoa pē.”
Ko e vā fetuʻutaki vāofi ʻoku maʻu ʻe Sela mo hono fāmilí ʻoku tupu ia mei he ngāue fakatahá.
Naʻe poupouʻi foki ʻa Sela ʻe hono fāmilí ʻi he taimi kotoa pē—ʻa ia ʻoku taki ai kitautolu ki he ngāue fakafaifekau ko ia naʻe tuʻu ʻi hono vahaʻá mo ʻene ngaahi palaní.
Naʻe palani hono tuongaʻane lahi ko Tailá ke tokoni kia Sela ʻi hono langa ha fale ʻi heʻene foki mai mei heʻene ngāue fakafaifekaú. Ka ʻi ha ʻaho ʻe taha, naʻá ne telefoni mai kia Sela mo ha ongoongo naʻe kole ange ke toe fakalōloa ʻene ngāue fakafaifekaú.
ʻOkú ne pehē, “Naʻá ku fuʻu ʻita ʻaupito kiate ia. Naʻá ku pehē, ʻTaila, ʻoku ʻikai totonu ke ke tali ia. Kuó u ʻosi palaniʻi ʻeni.’ Pea naʻe pehē mai ʻa Taila, ʻʻOku mahuʻinga ange ʻa e ngāue ʻa e ʻEikí ʻi hoʻo ngāué.’ Naʻe ongo ia kiate au. Naʻá ku ʻiloʻi naʻá ne moʻoni pea naʻe fiemaʻu ke u falala ki he palani ʻa e ʻOtuá.”
Naʻe talitali lelei ʻe he fāmili ʻo Selá hono tuongaʻane ko Tailá hili ʻene ngāue fakafaifekaú.
Laʻitaá ʻi he angalelei ʻa Sarah Christensen
Tatau ai pē pe ʻokú ne maʻu ha tokoni mei heʻene tamaí pe tokoni mei he Tamai Hēvaní, ʻoku ʻiloʻi ʻe Sela ʻoku ʻikai ke ne tuenoa.
Ko ha Misiona ʻOʻona Pē
Naʻe ueʻi ʻe he sīpinga ʻa Tailá ʻa Sela ke kamata fakakaukau ke ngāue fakafaifekau. “Naʻá ku fakatokangaʻi ʻa e tokolahi ʻo e kakai naʻe tokoniʻi ʻe hoku tuongaʻangé ke nau haʻu kia Kalaisí, pea naʻá ku mamata foki ki heʻene ofi ange kia Kalaisí. ʻOku pehē ʻe Sisitā Kulisiteniseni, “naʻá ku fiemaʻu ha ngaahi aʻusia tatau. Naʻe kamata ke u ako fakamātoato ʻa e ongoongoleleí peá u ʻiloʻi ko e lahi ange ko ia ʻa e tupulaki ʻeku fakamoʻoní mo e vā fetuʻutaki mo hoku Fakamoʻuí, ko e lahi ange ia ʻeku fie vahevahe ʻa e meʻa naʻá ku maʻú.”
Naʻe fai ʻe Sela ʻa e fili ke taʻofi fakataimi ʻene pisinisi langá kae ngāue maʻá e ʻEikí. Kuo hanga ʻe he fili ko ʻení ʻo ʻoange ha ʻilo foʻou mālohi kiate ia.
ʻOku pehē ʻe Sisitā Kulisiteniseni, “Ko e meʻa fika ʻuluaki kuo akoʻi kiate au ʻe heʻeku ngāue fakafaifekaú ko hono liliu kakato ʻe he ongoongoleleí ʻa e moʻuí. Naʻe hanga ʻe heʻeku tupu hake ʻi he Siasí ʻo ʻai ke faingataʻa ʻeku fakatokangaʻi ʻa e mahuʻinga ʻo e ongoongoleleí ʻi heʻeku moʻuí.
ʻI heʻeku ngāue fakafaifekaú, ʻoku ʻātakaiʻi au ʻe ha kakai ʻoku ʻikai ke nau ʻilo fekauʻaki mo e Tamai Hēvaní mo Sīsū Kalaisi. ʻI heʻenau ʻilo ko e fānau kinautolu ʻa e ʻOtuá pea ʻoku ʻi ai ʻEne palani maʻanautolú, ʻokú ne liliu ʻenau moʻuí. Ko e meʻa lelei taha ia ke te fakamoʻoni ki ai mo tokoni aí. Naʻá ku maʻu ha mahino ki he meʻa ko iá kimuʻa peá u ngāue fakafaifekaú, ka ʻoku ou ʻiloʻi ʻi he taimí ni ʻoku mahuʻinga ʻa e ongoongolelei ʻo Sīsū Kalaisí ki he fiefia ʻi he māmani ko ʻení pea ʻi he maama ka hoko maí.”
ʻOku saiʻia ʻa Sisitā Kulisiteniseni (toʻomataʻu) mo hono hoá Sisitā Teila (toʻohema) ke tokoni ʻi ha founga pē te na lavá.
Laʻitaá ʻi he angalelei ʻa Sarah Christensen
Tui Kae ʻIkai Manavahē
ʻOku pehē ʻe Sisitā Kulisiteniseni ki he toʻu tupu kehe ʻoku nau fakakaukau ke ngāue fakafaifekaú, “Tui pea ʻoua ʻe manavahē. ʻOku ʻikai faingofua ʻa e ngāue fakafaifekaú, ka ʻoku ʻaonga ia. ʻE tāpuekina kimoutolu ʻe he ʻOtuá ʻi ha ngaahi founga taʻe-mafakakaukaua ʻi hoʻo fili ke hoko ko ha taha ʻo ʻEne kau tamaioʻeikí.”
Neongo ʻokú ne manatu ki heʻene lava ʻo langa ha ngaahi fale lolotonga ʻene ngāué, ka ʻoku ʻikai fakaʻiseʻisa ʻa Sisitā Kulisiteniseni ʻi heʻene filí. ʻOkú ne pehē, “Ko e moʻoni ʻoku ʻi ai pē ha tupulaki ʻe lava ke fakahoko ʻe heʻeku pisinisí lolotonga ʻeku hoko ko ha faifekau taimi kakató. Ka ʻoku ou ʻilo ʻe tāpuekina ʻe he ʻEikí ʻeku feilaulau ke tukuange [ʻeku pisinisí] ʻi ha kiʻi taimi. ʻE lava ke fakatatali ʻeku pisinisí, ka he ʻikai lava ʻa e ngāue ʻa e ʻEikí ʻo fakatatali!”