Ngaahi Leʻo ʻo e Toʻu Tupú
Ko Hono Fili ʻo e Temipalé
Iris R., taʻu 18, Sala, Keipi Veitei
Saiʻia ʻi he ngaahi tohi nima, faʻu ha ngaahi ʻātí, mo e feimeʻatokoní.
ʻOku tuʻu ʻa e temipale ofi taha mai kiate aú ʻi ha motu ʻe taha. Ke aʻu ki aí, kuo pau ke mau puna ʻi ha miniti ʻe 45 pe heka vaka tahi houa ʻe 12. Naʻe teʻeki ai ke u ʻalu ki he temipalé kimuʻa, pea ʻi hoku taʻu fakaʻosi ʻi he akó, naʻe fokotuʻu ʻe heʻeku faʻeé ha palani ke mau ō. Kuó ne fakahū ha paʻanga ʻi ha taʻu kakato koeʻuhí ke lava hoku fāmilí ʻo ʻalu fakataha.
Meʻapangó, te mau foki ki ʻapi kuo kamata ʻa e akó, ʻa ia naʻá ku hohaʻa ki ai. Naʻe mahuʻinga maʻu pē ke u maʻu ha maaka lelei (GPA) ʻi he akó koeʻuhí ke u lava ʻo maʻu ha sikolasipi ki he ʻunivēsití. Naʻá ku fakakaukau ke ʻoua te u ʻalu ki he temipalé, koeʻuhí ʻe lava ʻe he liʻakí ʻo holoki ʻeku GPA fakakātoá. Naʻe pehē mai leva ʻeku faʻeé, “Ko e hā ʻoku ʻikai ke ke lotu ai ʻo kole ʻa e tokoni ʻa e ʻEikí?”
Naʻá ku kiʻi momou he naʻá ku ilifia, ka naʻá ku fakakaukau ke u lotu. Naʻe tataki au ʻe he Tamai Hēvaní, pea naʻá ku fili ke u ʻalu ki he temipalé. ʻI he uike kakato naʻa mau ʻi ai aí, naʻa mau ō ki he temipalé ʻi he ʻaho kotoa pē. Naʻe fakaofo ia! Naʻe fakaofo ʻemau fakahoko ʻa e papitaisó; naʻe lava ke u ongoʻi mālohi ʻaupito ʻa e Laumālié.
ʻI hono fakaʻosingá, naʻá ku lava ʻo fakaʻosi ʻa e akó ʻaki ha GPA lelei. Naʻe tokoni ʻeku tauhi ha vā fetuʻutaki vāofi mo e Fakamoʻuí ke u maʻu ha ʻamanaki lelei lolotonga ʻa e taimi ko iá. Naʻá ku ʻiloʻi naʻá Ne ʻiate au, ʻo ne ʻomi ha mālohi kiate au. ʻOku ʻafioʻi ʻe he ʻEikí ʻetau ngaahi ngāué, pea ʻi he taimi ʻoku tau tuku ai ha meʻa ki Hono toʻukupú, te tau lava ʻo falala ʻe lelei ʻa e meʻa kotoa pē.
ʻOku ou houngaʻia ʻaupito ʻi he loto-toʻa hoku tokouá ke fakaafeʻi ʻa e ongo faifekaú ki homau ʻapí. Ko kimaua naʻe fuofua papitaiso ʻi homa fāmilí—naʻá ku taʻu 13 pea naʻá ne taʻu 15. ʻOku ou ʻilo ko e fānau ʻofeina au ʻa ʻetau Tamai Hēvaní. Naʻe ʻikai teitei ʻi ai ʻeku tamai fakaemāmaní ʻi heʻeku moʻuí, ka ʻoku tokoni ia ke u ʻiloʻi ʻoku ʻi ai ʻetau Tamai Hēvani pea naʻe fakatupu au ʻi Hono tataú. ʻOku ou ongoʻi ʻEne ʻofa kiate aú; ʻoku ou ʻiloʻi ʻokú Ne ʻi hoku tafaʻakí ʻi he ngaahi momeniti faingataʻa tahá.