Ko ha Kaungāmeʻa Moʻoni

Joel A., taʻu 19, Ieleveni, ʻAmīniā

ʻOkú ne saiʻia ʻi he ʻātí, fakapolokalamá, mo hono ako ha ngaahi taukei foʻou, hangē ko e feimeʻatokoní.

Naʻe ʻi ai haʻaku ngaahi kaungāmeʻa naʻa nau tafoki meiate au ʻi he vahaʻa ʻo e kalasi fitú mo e hivá. ʻI he kamataʻangá naʻe ʻikai ke u fakatokangaʻi naʻa nau fakakata ʻaki au, ka ʻi heʻeku fakatokangaʻí, naʻá ku ʻohovale pea ʻikai mahino kiate au ʻa e fehālaaki kuó u faí.

Naʻá ku fakakaukau kapau te u fai ʻa e meʻa ʻe fai ʻe Kalaisí, ʻe fakaʻau ke lelei ange ʻa e meʻa kotoa pē. Ko ia naʻe hokohoko atu ʻeku angaleleí, tokoniʻi hoku kaungāakó ʻi heʻenau ngāue fakaako mei ʻapí, mo falala ki he ʻOtuá, mo falala ʻe ʻi ai ha ʻaho te u maʻu ai ha kaungāmeʻa lelei. ʻI he kamataʻangá, naʻe hangē naʻe ʻikai liliu ha meʻá. Ka ʻi he hili ʻeku kamata ʻi he ako māʻolungá, naʻe angalelei ange hoku kaungāakó.

Kae mahuʻinga angé, lolotonga ʻa e ngaahi taʻu ko ia naʻá ku fekumi ai ki ha ngaahi kaungāmeʻá, naʻá ku ʻilo ko hoku kaungāmeʻa lelei tahá ko Sīsū Kalaisi. Naʻe ʻikai ngata pē ʻi heʻeku maʻu ha ngaahi kaungāmeʻa foʻou ʻi he akó, ka naʻá ku toe maʻu foki mo e Kaungāmeʻa lelei taha te u ala lava ʻo maʻú.