Ivan B.

Faitā ʻa Ashlee Larsen

Ko au toko taha pē ʻa e mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi hoku ʻapiakó. ʻI ha paati faiʻaho ʻe taha, naʻe kamata ke inu kava mālohi hoku ngaahi kaungāmeʻá. Naʻá ku ongoʻi taʻefiemālie peá u foki ki ʻapi. ʻI heʻenau ʻeke mai pe ko e hā naʻá ku mavahe vave aí, naʻá ku talaange ʻoku ʻikai ke u inu kava mālohi pea naʻe ʻikai ke u ongoʻi fiemālie. Naʻe ʻikai ke nau saiʻia ʻi he tali ko iá pea naʻa nau ongoʻi faikeheʻia. Ka ʻi he fakalau ʻa e taimí, kuo tali ia ʻe hoku ngaahi kaungāmeʻá.

ʻI ha taimi ʻe taha, naʻe kole mai ʻe heʻeku faiakó ke u vahevahe ha fakamatala PowerPoint fekauʻaki mo e Siasí. Naʻe tokolahi hoku kaungāakó naʻe ʻi ai haʻanau ngaahi fehuʻi, pea naʻá ku ongoʻi hangē naʻe faiako ʻa Sīsū Kalaisi ʻo fakafou ʻiate aú. ʻI hoʻo vahevahe hoʻo fakamoʻoní, ʻoku ʻikai fiemaʻu ia ke ke manavasiʻi ki he fakakaukau ʻa e niʻihi kehé. Kapau te ke falala ki he ʻEikí, te Ne tokoniʻi koe ke ke ʻilo ʻa e meʻa ke ke lea ʻakí.

ʻOku ou fie ʻalu ʻo ngāue fakafaifekau koeʻuhí ke u lava ʻo ʻomi ha kakai kehe kia Kalaisi. ʻOku ou tui naʻe toʻo ʻe he Fakamoʻuí kiate Ia ʻa e ngaahi angahala ʻa e māmaní. Te tau lava ʻo tānaki fakataha ʻa ʻIsileli pea fakaafeʻi ʻa e tokotaha kotoa pē ke haʻu kiate Ia.