Fakamatala mo e Ngaahi Fakahinohino ki he Vesa Kaveinga ʻa e Toʻu Tupú ki he 2025

• Filo lanu kehekehe ʻe tolu, afo, pe kulasi manifi

• Kiʻi meʻangāue ke vete ʻaki e tuituí (ki hono vete e meʻa ʻoku halá)

Fakapona toʻohemá: Pelu fuopotopoto ʻa e filo tuí mei he toʻohemá ki he toʻomataʻú ʻo femahiliaki mo ha meʻi afo ʻe taha, ke faʻu e mataʻifika “4.” ʻAlu hifo e filo tuí ʻi lalo he filo ʻe tahá pea hū hake ʻi he foʻi ava ʻi lotomālie ʻo e 4. Fusiʻi ke maʻu.

Fakapona toʻomataʻú: Pelu fuopotopoto ʻa e filo tuí mei he toʻomataʻú ki he toʻohemá ʻo femahiliaki mo ha filo ʻe taha, ke faʻu fakaholomui e mataʻifika “4.” ʻAlu hifo e filo tuí ʻi lalo he filo ʻe tahá pea hū hake ʻi he foʻi ava ʻi lotomālie ʻi he 4 ʻoku fakaholomuí. Fusiʻi ke maʻu.

Fokotuʻutuʻú:

1. Kosi ʻe he tokotaha takitaha ʻa e filo ʻe tolú ki ha ʻinisi ʻe 50 (127 cm), pe lōloa tatau mo ha nima ʻe ua.

2. Puke fakataha e filo lanu kehekehe ʻe tolú, pea pelu ua kinautolu.

3. Nonoʻo ha fakapona ʻi ʻolunga he foʻi pelú. ʻI he taimi ní ʻoku totonu ke tautau hifo ha konga filo ʻe ono.

4. Fokotuʻutuʻu laine taha hoʻo filó ke fakahokohoko ʻi he Lanu 1, Lanu 2, Lanu 3, Lanu 3, Lanu 2, Lanu 1.

ʻOtu 1:

5. Kamata ʻaki ʻa e ongo filo ʻi he toʻohemá. Fakaʻaongaʻi ʻa e Lanu 1 (ʻi he toʻohemá), faʻu ha fakapona toʻohema (vakai ki he fakaʻuhinga ʻi ʻolungá) ʻi ʻolunga he Lanu 2.

6. Toe fakaʻaongaʻi pē ʻa e Lanu 1, faʻu ha fakapona toʻomataʻu (vakai ki he fakaʻuhinga ʻi ʻolungá) ʻi ʻolunga he Lanu 2.

7. ʻUnu ki he meʻi filo ʻe ua ʻi lotomālié. Fakaʻaongaʻi ʻa e Lanu 3 ʻi he toʻohemá, faʻu ha fakapona toʻohema ʻi ʻolunga he Lanu 3 ʻe tahá.

8. Fakaʻaongaʻi ʻa e Lanu 3 tatau pē, faʻu ha fakapona toʻohema ʻe taha ʻi ʻolunga he Lanu 3.

9. ʻUnu ki he ongo konga filo ʻe ua ʻoku taupotu taha ki he toʻomataʻú. Fakaʻaongaʻi ʻa e Lanu 1 taupotu taha ki toʻomataʻú, faʻu ha fakapona toʻomataʻu ʻi ʻolunga he Lanu 2.

10. Fakaʻaongaʻi ʻa e Lanu 1 tatau pē, faʻu ha fakapona toʻohema ʻi ʻolunga he Lanu 2.

ʻOtu 2:

11. He ʻikai fakaʻaongaʻi ʻi he ʻotu ko ʻení ʻa e meʻi filo ʻi he ngataʻanga takitaha (Lanu 1). Kamata ʻaki haʻo tokanga ki he Lanu 2 mo e Lanu 3 ʻi he tafaʻaki toʻohemá. Fakaʻaongaʻi ʻa e Lanu 2 (ʻi he toʻohemá), faʻu ha fakapona toʻohema ʻi ʻolunga he Lanu 3.

12. Fakaʻaongaʻi ʻa e Lanu 2 tatau pē, faʻu ha fakapona toʻomataʻu ʻi ʻolunga he Lanu 3.

13. Hiki ki he Lanu 3 mo e Lanu 2 ʻi he toʻomataʻú. Fakaʻaongaʻi ʻa e Lanu 2 (ʻi he toʻomataʻú), faʻu ha fakapona toʻomataʻu ʻi ʻolunga he Lanu 3.

14. Fakaʻaongaʻi ʻa e Lanu 2 tatau pē, faʻu ha fakapona toʻohema ʻi ʻolunga he Lanu 3.

Toe ʻai:

15. Toe ʻai pē ʻa e ʻotu 1 mo e 2 kae ʻoua kuo aʻu e lōloa ho vesá ki he lōloa ʻokú ke fiemaʻú.

Ko ha tatau fakanounou ʻeni ʻo e sīpingá ki hono toe ʻaí:

• ʻOtu 1. Ongo filo toʻohemá: mei he Lanu 1 ʻi toʻohemá ki he Lanu 2 ʻi toʻomataʻú: fakapona toʻohema, fakapona toʻomataʻu. Ongo filo ʻi loto: mei he Lanu 3 ʻi toʻohemá ki he Lanu 3 ʻi toʻomataʻú: fakapona toʻohema, fakapona toʻohema. Ongo filo toʻomataʻú: mei he Lanu 1 ʻi toʻomataʻú ki he Lanu 2 ʻi toʻohemá: fakapona toʻomataʻu, fakapona toʻohema.

• ʻOtu 2. ʻOua ʻe fakaʻaongaʻi e Lanu 1 (ongo ngataʻangá). Ongo filo toʻohemá: mei he Lanu 2 ʻi toʻohemá ki he Lanu 3 ʻi toʻomataʻú: fakapona toʻohema, fakapona toʻomataʻu. Ongo filo toʻomataʻú: mei he Lanu 2 ʻi toʻomataʻú ki he Lanu 3 ʻi toʻohemá: fakapona toʻomataʻu, fakapona toʻohema.

Fakaʻosí:

16. Nonoʻo ha fakapona ʻi he ngataʻangá ke fakangata. Fakatoe ha afo feʻunga ke haʻi takai ʻi ho fasiʻanimá.

Tānaki Atu ha Foʻi Laʻā:

17. Ko e konga mahuʻinga taha ʻo e vesá ko ha foʻi laʻā, ke fakamanatu atu ke ke tafoki kia Sīsū Kalaisi. Te ke lava ʻo tānaki atu ha foʻi laʻā ʻi ha ngaahi founga kehekehe, ʻaki ha filo, pepa, maka, pe ʻū naunau kehe.

Kapau kuó ke taukei ʻi he ngaohi vesa ko ʻení, te ke lava ʻo ngaohi ia ke tatau ange mo e vesa ʻi he vitioó ʻaki hano tānaki atu ha ʻū lanu lahi ange. Kuo pau ke ʻi ai ha ʻū filo lanu kehekehe ʻoku ʻikai tauhoa (kimuʻa pea pelú) kae tonu. ʻOku fakaʻaongaʻi ʻe he vesa ʻi he vitioó ha lanu ʻe 7, mo ha meʻi filo ʻe 14.