« អានីកាដ៏ក្លាហាន » ប្រិយមិត្ត ខែមីនា ឆ្នាំ២០២៥ ទំព័រ ៤៤–៤៥ ។
អានីកាដ៏ក្លាហាន
ដំណើររឿងពិតមកពី ស.រ.អា.
« តើអ្នកត្រៀមខ្លួនឬនៅ ? » ម៉ាក់បានសួរ ។
អានីកាបានងក់ក្បាល ហើយឱបខ្លាឃ្មុំរបស់នាង ។ នាងបានយកវាទៅព្រះវិហារ ។ នាងសង្ឃឹមថាខ្លាឃ្មុំនឹងជួយនាងឲ្យមានអារម្មណ៍ក្លាហាន ។
អានីកាមានផ្នែកមួយដើម្បីនិយាយនៅក្នុងកម្មវិធីអង្គការបឋមសិក្សា ។ ប៉ុន្តែនាងទើបតែមកប្រទេសនេះ ។ នាងមិនសូវចេះនិយាយភាសាអង់គ្លេសទេ ។ នាងនឹងនិយាយជាភាសាអេស្ប៉ាញជំនួសវិញ ។ តើគ្រាប់គ្នានឹងយល់អ្វីនាងនិយាយទេ ?
ម៉ាក់បានឱបនាង ។ « ម៉ាក់ដឹងថាកូនភ័យខ្លាច ។ ប៉ុន្តែសូមចាំថា ព្រះវិញ្ញាណបរិសុទ្ធនឹងគង់នៅជាមួយកូន ! កូនមិននៅឯកោឡើយ » ។
វាបានធ្វើឲ្យអានីកាមានអារម្មណ៍ធូរចិត្តបន្តិច ។ នាងបានញញឹមដាក់តុក្កតាខ្លាឃ្មុំរបស់នាង ។ នាងបានគិតថាអញ្ជឹងយើងមានគ្នាបីនាក់ហើយ ។ មានខ្ញុំ ខ្លាឃ្មុំរបស់ខ្ញុំ និងព្រះវិញ្ញាណបរិសុទ្ធ !
នៅក្នុងកម្មវិធីអង្គការបឋមសិក្សា ថ្នាក់របស់អានីកាបាននិយាយអំពីអ្វីដែលពួកគេបានរៀននៅឆ្នាំនោះ ។ ពួកគេបានឡើងឈរម្នាក់ម្តងៗ ។ មិនយូរប៉ុន្មាន វាដល់វេនរបស់អានីកា ។
នាងបានឱបខ្លាឃ្មុំរបស់នាង ។ នាងអាចក្លាហានបាន !
អានីកាបាននិយាយជាភាសាអេស្ប៉ាញថា « គ្រួសាររបស់ខ្ញុំសិក្សាបទគម្ពីរនៅក្នុង សៀវភៅ ចូរមកតាមខ្ញុំ ជារៀងរាល់យប់ » ។ នាងបានដកដង្ហើមធំ ។ « យើងបានរៀនពីរបៀបដែល យ៉ូសែប ស្មីធ បានអត់ទោសដល់អ្នកដែលធ្វើបាបលោក ។ ខ្ញុំក៏អាចអភ័យទោសឲ្យអ្នកដទៃបានដែរ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។
អានីកាបានត្រឡប់ទៅកៅអីរបស់នាងវិញ ។ អ្នកគ្រូរបស់នាងញញឹមដាក់នាង និងខ្លាឃ្មុំរបស់នាង ។ គាត់ខ្សឹបប្រាប់នាងថា « ធ្វើបានល្អណាស់ » ។ « អ្នកទាំងពីរក្លាហានណាស់ ! »
អានីកាមានអារម្មណ៍កក់ក្តៅនៅក្នុងបេះដូងរបស់នាង ។ នាងក្លាហានណាស់ ! ហើយនាងបានដឹងថាព្រះវិញ្ញាណបរិសុទ្ធគង់នៅជាមួយនាង ។
រចនារូបភាពដោយ ខាធី រូស