Fuʻu Lahi ki he Palaimelí?

“ʻOku Talitali Lelei Koe ki he Palaimelí!” Naʻe tuʻu ʻa Sisitā ʻAkipoa, ko e taki Palaimeli ʻa Kifí, ʻi muʻa ʻi he lokí. “Te tau ako ʻi he ʻahó ni ʻa e foʻi hiva ko e ʻKe Mou Feʻofaʻakí.ʼ”

Naʻe kamata ʻa e hivá, pea teuteu ʻa e fānau iiki angé ke hiva. Ka kuo ʻosi ʻiloʻi ʻe Kifi ia ʻa e foʻi hiva ko ʻení. Kuo tuʻo teau ʻene hivaʻi iá! Naʻe ʻikai ke ne fuʻu ongoʻi ʻokú ne fie hivaʻi ia ʻi he ʻahó ni.

Naʻe ʻosit taʻeoliʻia ʻa Kifi ia ʻi he Palaimelí. Naʻá ne motuʻa, lōloa, mo lahi ange ʻi he toenga ʻo e fānaú. Naʻe kau kotoa hono ngaahi kaungāmeʻa ʻi he lotú ki he Kau Finemuí ʻi he taimí ni. Naʻe kei toe pē ha meimei taʻu kakato ʻe taha kimuʻa peá ne lava ʻo ʻalu mo kinautolu ki he ngaahi kalasi mo e ngaahi ʻekitivitī ʻa e Kau Finemuí.

Lolotonga ʻa e hiva ʻa e taha kotoa, naʻe fakalongolongo pē ʻa Kifi ia. Naʻá ne puʻaki pē ha niʻihi ʻo e ngaahi lea ki he ngaahi hivá, ka naʻá ne moʻumoʻua pē he fakakaukaú.

Fakafokifā pē kuó ne maʻu ha foʻi fakakaukau. Mahalo pē kapau ʻe talanoa mo e pīsopé, te ne tukuange ia ke ne ʻalu kei siʻi ki he Kau Finemuí koeʻuhí ke ne lava ʻo feohi mo hono ngaahi kaungāmeʻá.

Naʻe maʻu ʻe Kifi ʻa Pīsope ʻAkomipai hili ʻa e lotú. Naʻá ne pehē atu “Hei, Pīsope. ʻOku ʻikai ke u toe ongoʻi au ia ʻoku ou kau ki he Palaimelí. ʻOku ou lahi mo motuʻa ange ʻi he toenga ʻo e fānaú. ʻE lava nai ke u kamata ʻalu au ki he Kau Finemuí?”

Naʻe malimali ʻa Pīsope ʻAkomipai. Naʻá ne pehē, “ʻOku ou ʻilo ʻoku fakafiefia ʻa e hiki ki he Kau Finemuí. Ka te ke toki lava pē ʻo kamata ʻalu ki ai ʻi he taʻu ʻoku hoko ai ho taʻu 12. Kātaki atu.”

Naʻe sio hifo ʻa Kifi ki hono suú. “Sai.”

Naʻe pehē ange ʻe he pīsopé, “ʻOku monūʻia ʻa e Palaimelí ke maʻu koe. ʻOku ou tui ʻoku saiʻia lahi ʻa e fānau iiki angé ʻia koe. Te ke lava ʻo fakahoko ha lelei lahi kiate kinautolu.”

‘I he toenga ʻo e ‘ahó, naʻe ongoʻi loto-mamahi ʻa Kifi. Ko ha taʻu ʻe tahá ko ha taimi lōloa ia ke ongoʻi taʻelata ai ʻi he Palaimelí.

Ka naʻe fakakaukau lahi ange ʻa Kifi ki he meʻa naʻe lea ʻaki ʻe Pīsope ʻAkomipaí. Naʻe saiʻia moʻoni nai ʻa e fānau kehé ʻiate ia? Naʻe teʻeki ai ke ne fakatokangaʻi ia kimuʻa.

ʻI he uike hono hokó, naʻe taʻataʻalo ʻa Kifi ki hono ngaahi kaungāmeʻá ʻi heʻenau lue ki he loki ʻo e Kau Finemuí. Naʻá ne māpuhoi peá ne lue ki he loki ako Palaimelí.

Naʻe pehē ange ʻe Sisitā ʻAkipoa, “Kifi, te ke fie tokoni mai ke u akoʻi ʻa e hiva ʻo e uike ní?”

Naʻe pehē atu ʻa Kifi, “ʻIo. Ko e hā ʻa e foʻi hiva ʻoku tau akó?”

Naʻe pehē ange ʻe Sisitā ʻAkipoa, “ʻFānau Au ʻa e ʻOtuá.ʼ” “Fakamālō atu ʻi hoʻo tokoní! ʻOku ou tui ʻe fiefia ʻa e fānaú ʻi he ako meiate koe.”

ʻI he kamata ʻa e taimi hivá, naʻe tuʻu ʻa Kifi ʻi muʻa ʻi he lokí. Naʻá ne pehē, “Te u akoʻi atu ʻi he ʻahó ni ha taha ʻo e ngaahi hiva ʻoku ou saiʻia taha aí.” Naʻá ne tokoniʻi ʻa e fānaú ke nau ako ʻa e ngaahi leá. Hili iá naʻá ne hivaʻi mo kinautolu ʻa e foʻi hivá. ʻI heʻenau hivá, naʻe ongoʻi māfana mo fiefia ʻa Kifi ʻi hono lotó. Naʻá ne ʻiloʻi naʻá ne ongoʻi ʻa e Laumālie Māʻoniʻoní.

Naʻe ʻikai fuoloa mei ai kuo mei ʻosi ʻa e kalasi Palaimelí! Hili ʻa e lotu tukú, naʻe kamata ke lue atu ʻa Kifi ki he holó. Naʻá ne fiemaʻu ke kumi hono ngaahi kaungāmeʻá hili ʻenau kalasi ʻi he Kau Finemuí mo fakalea kiate kinautolu.

Ka naʻe taʻofi ia ʻe ha taha ʻo e tamaiki fefine iiki angé. “Fakamālō atu ʻi hoʻo hiva fakataha mo kimautolú!” Naʻá ne fāʻofua kia Kifi. “ʻOku ou fie tatau mo koe ʻi heʻeku fuʻu lahí.”

Naʻe malimali ʻa Kifi. Naʻe ʻikai pē ke ne kei faʻa tatali ke ʻalu ki he Kau Finemuí, pea naʻá ne fakaʻamu ʻe vave pē ʻa e taʻu hono hokó. Ka naʻá ne ʻiloʻi te ne kei lava pē ʻo ako mo fai ha ngaahi meʻa lelei ʻi he Palaimelí.

Pea mahalo naʻe moʻoni pē ʻa Pīsope ʻAkomipai. Te ne lava ʻo fakahoko ha lelei.

Ngaahi tā fakatātā ʻa Simini Blocker