“ʻOku Fiemaʻu Nai ke U Haohaoa?” Ko e Kaumeʻá, Nōvema 2024, 36–37.
ʻOku Fiemaʻu Nai ke U Haohaoa?
Naʻe fie ʻalu ʻa Henelī ki he temipalé, ka naʻá ne ongoʻi naʻe fuʻu lahi ʻene ngaahi fehalākí.
Naʻe hoko ʻa e talanoa ko ʻení ʻi ʻAlupa.
Naʻe lue māmālie atu ʻa Henelī ki he loki Palaimelí. Naʻe ongoʻi mamafa hono ongo vaʻé ʻi heʻene aʻu ki hono seá.
Naʻe malimali ange ʻene faiakó, Brother Lasi. Naʻá ne fehuʻi ange, “ʻOkú ke mateuteu ke talanoa fekauʻaki mo e ngaahi temipalé?”
Naʻe tali ange ʻe Henelī, “ʻIo.”
Ko e hā naʻá ku lea ʻaki ai iá? Ko e fakakaukau ia ʻa Henelī ʻi heʻene tangutu ki laló. Naʻe ʻikai ke ne ongoʻi mateuteu. Hala ha mateuteu ʻe taha.
Naʻe ako ʻe he Palaimeli ʻa Henelií ʻa e foʻi hiva “Fie Siofia ha Temipalé.” Naʻe kole ki heʻene kalasí ke nau talanoa fekauʻaki mo e ʻalu ki he temipalé.
Ka naʻe ongoʻi loto-mamahi ʻa Henelī. Naʻá ne fie ʻalu ki he temipalé ʻi heʻene lahi feʻungá, ka naʻá ne ongoʻi naʻe fuʻu lahi ʻene ngaahi fehalākí.
Naʻe tuʻu taha taha hake ʻa e ngaahi kaungāmeʻa ʻo Henelií. Naʻa nau fiefia mo loto-vēkeveke ʻi heʻenau talanoa fekauʻaki mo e ʻalu ki he temipalé ʻi ha ʻahó. Naʻe fakalalahi ange ʻa e ongoʻi loto-mamahi ʻa Henelií.
Naʻe hokosia leva ʻa e taimi ke fai ai ʻa e hivá. Naʻe hiva fakataha ʻa Henelī mo e toenga ʻo e Palaimelí: “Te u teuteu heʻeku kei siʻí; ko hoku fatongiá.”
Te u lava fēfē ʻo teuteu ke ʻalu ki he temipalé ʻi he taimi ʻoku ou fai ai ha ngaahi fehālaaki lahi peheé? Ko e fakakaukau ia ʻa Henelií. Naʻá ne hoholo hifo ʻi hono seá.
ʻI he ʻosi ʻa e hivá, naʻe ʻunu atu ʻa Brother Lasi. Naʻá ne ʻeke ange, “ʻOkú ke sai pē?”
Naʻe sio fakamamaʻu pē ʻa Henelī ki hono ongo nimá. Naʻá ne lea leʻo siʻi ange leva, “ʻOku ou fie ʻalu ki he temipalé, ka ʻoku ou manavasiʻi naʻa ʻoku ʻikai ke u taau.” Naʻe mihiʻi fakamanava lōloa ʻe Henelī ʻene mānavá. “ʻOku ʻikai ke u feohi lelei maʻu pē mo hoku fāmilí. ʻOku ngalo ʻiate au ke fai ʻeku ngaahi ngāue fakaʻapí. ʻOku fuʻu lahi ʻeku ngaahi fehalākí. ʻOku fiemaʻu nai ke u haohaoa?”
Naʻe malimali pē ʻa Brother Lasi. “ʻOku ʻikai ʻuhinga ʻa e moʻui taau ke ʻalu ki he temipalé ke ke haohaoa. Te tau lava ʻo moʻui taau ʻaki ʻetau falala kia Sīsū Kalaisi mo feinga fakamātoato ke tauhi ʻa e ngaahi fekaú. ʻOku tau fai kotoa pē ha ngaahi fehālaaki, ka te tau lava ʻo fakatomala pea toe maʻa.”
Naʻe kiʻi tangutu hangatonu hake ʻa Henelī.
Naʻe pehē ange ʻe Brother Lasi, “ʻOku ou tui ʻoku laukau ʻaki koe ʻe he Tamai Hēvaní ʻi hoʻo feinga ke fai leleí.”
Naʻe fakakaukau ʻa Henelī ki he niʻihi ʻo e ngaahi meʻa lelei kuó ne fai ʻi he uike ko iá. Naʻá ne feimeʻatokoni efiafi mo Mami, tokoni ki hono tuofefiné ʻi heʻene ngāue fakaako mei ʻapí, peá ne fakalea ki ha kiʻi tamasiʻi foʻou ʻi he akó.
Naʻe kamata ke mole atu ʻa e ngaahi ongoʻi hohaʻa ʻa Henelií. Naʻá ne ʻiloʻi naʻe tokoniʻi ia ʻe he Laumālie Māʻoniʻoní ke ne ongoʻi nonga.
ʻI he hoko ʻa e taimi ke vahevahe ai ʻa Henelií, naʻá ne malimali mo tuʻu ki ʻolunga. Naʻá ne pehē, “ʻOku ou loto ke hokohoko atu ʻeku fakatomalá mo hoko ʻo hangē ange ko Sīsū Kalaisí koeʻuhí ke u lava ʻo hū ʻi ha ʻaho ki he temipalé.”
Naʻe ongoʻi fiefia ʻa Henelī ʻi heʻene tangutu ki laló. ʻI ha ʻaho ʻe taha, te ne lava ai ʻo fakahoko ha ngaahi fuakava toputapu mo e ʻOtuá ʻi loto ʻi he temipalé. Naʻá ne fie feinga hono lelei tahá ke teuteu!
Ngaahi tā fakatātā ʻa Gail Armstrong