Ngaahi ʻEkitivitī Haʻu, ʻo Muimui ʻIate Aú

Ki he Molomona 1–6

Naʻe ʻofa ʻa Molomona ʻi he kau Nīfaí (vakai, Molomona 3:12). Kuo kole mai ʻe he Tamai Hēvaní mo Sīsū Kalaisi ke tau ʻofa foki ʻi he niʻihi kehé. Tuʻu fuopotopoto pea kuikui ho matá. Lau ki he tolu, pea ʻāʻā hake ho matá ʻo sio ki ha taha. Kapau ʻokú mo fesiofaki, lea ʻaki ha meʻa ʻokú mo ʻofa ai fekauʻaki mo kimoua pea mavahe mei he siakalé. Hokohoko atu pē kae ʻoua kuo toe pē ha toko taha! Pea ʻe lea ʻaki leva ʻe he tokotaha kotoa pē ha meʻa ʻoku nau ʻofa ai fekauʻaki mo e tokotaha ko iá.

Ki he Molomona 7–9

ʻI he taimi ʻoku tau muimui ai kia Sīsū Kalaisí, ʻe lava ke tāpuekina kitautolu ʻe he Tamai Hēvaní ʻaki ha ngaahi mana. Lau ʻa e Molomona 8:24 pea tā fakatātaaʻi ha taha ʻo e ngaahi mana ʻoku fakamatalaʻi ʻi he vēsí. Lolotonga hoʻo tā fakatātaá, talanoa ki he ngaahi mana kuo fai ʻe he Tamai Hēvaní maʻa ho fāmilí.

Ki he ʻEta 1–5

Naʻe kole ʻe he tokoua ʻo Sēletí ki he ʻEikí ke ala ki he ngaahi foʻi maká kae lava ke maʻu ʻe hono ngaahi vaká ha maama (vakai, ʻEta 3). Tānaki ha ngaahi foʻi maka mei tuʻa pe kosi ha ngaahi siakale mei ha ʻū laʻipepa. Tohi, tā, pe vali ʻi ho ngaahi foʻi maká pe laʻipepá ha ngaahi meʻa te ke lava ʻo fai ke ʻomi ai ʻa e māmá mo e ʻofá ki he niʻihi kehé.

Ki he ʻEta 6–11

ʻI heʻenau fononga ʻi he tahí, naʻe hiva fakafetaʻi ʻa e tokoua ʻo Sēletí mo hono fāmilí ki he ʻEikí ke fakamālō kiate Ia ʻi heʻene tokoniʻi kinautolú (vakai, ʻEta 6:9). Te mou lava foki ʻo hiva ke fakamālō ki he ʻEikí! Fili ha foʻi hiva ʻoku saiʻia taha ai mei he Tohi Hiva ʻa e Fānaú pe ko e uepisaiti ʻa e Siasí pea hivaʻi fakataha ia. Ko e hā mo ha toe founga te ke lava ʻo fakahaaʻi ai ki he Tamai Hēvaní ʻokú ke houngaʻia?