“Ko e Potufolofola Fakafiefia ʻa Masá,” Ko e Kaumeʻá, Nōvema 2024, 14–15.
Ko e Potufolofola Fakafiefia ʻa Masá
Naʻe pehē ange ʻe Masa, “ʻOku ʻikai ke u ʻilo pe ʻoku ʻi ai ha potufolofola ʻoku ou saiʻia taha ai.”
Naʻe hoko ʻa e talanoa ko ʻení ʻi Silovēnia.
Naʻe tangutu ʻa Masa ʻi he sitepu hono falé ʻo hili hono kumukumú ʻi hono ongo nimá. Naʻe ulo ʻa e laʻaá, māfana mai hono hueló mei he ngaahi fuʻu ʻakau māʻolungá. Naʻe hangē ha lauʻi paini foʻoú ʻa e nanamu ʻo e ʻeá.
Naʻe hū mai ʻa Mami ʻo tangutu ʻi he tafaʻaki ʻo Masá. “Ko e hā ʻa e meʻa ʻokú ke fakakaukau ki aí?”
Naʻe tali ange ʻe Masa, “ʻOku fiemaʻu ke u vahevahe ʻa e potufolofola ʻoku ou saiʻia taha aí ʻi he Palaimelí. Ka ʻoku ʻikai ha [potufolofola] ʻoku ou saiʻia taha ai. Pea ʻoku ʻikai ke u ʻilo pe ko fē te u filí.”
Naʻe kamokamo pē ʻa Mami. “ʻOku faingataʻa hono fili ha potufolofola ʻokú te saiʻia taha aí.” Naʻá ne sio atu ki he ʻuluʻakaú, peá ne tuʻu ki ʻolunga. “ʻOku ou ʻilo ʻa e meʻa ke faí.”
Naʻe foki ʻa Mami ki fale. ʻI heʻene foki maí, naʻá ne pukepuke ʻene folofolá. “Ta kamata ʻaki ha talanoa. Ko e hā ʻa e talanoa mei he folofolá ʻokú ke saiʻia taha aí?”
Naʻe fakakaukau ʻa Masa ki ai. “ʻOku ou saiʻia ʻi he taimi naʻe ʻaʻahi ai ʻa Sīsū ki he kau Nīfaí.”
Naʻe huke ʻe Mami ʻa e ngaahi peesi ʻi he Tohi ʻa Molomoná. “ʻOku kamata ʻa e talanoa ko iá ʻi he 3 Nīfaí.” Naʻá ne tuhu ki he pēsí. “Ta taufetongi ʻi hono laú mo fili ʻa e ngaahi veesi ʻokú ta saiʻia aí.”
Naʻe kamokamo pē ʻa Masa mo fanongo kae lau ʻa Mami. Naʻá ne lau fekauʻaki mo hono ui ʻe Sīsū Kalaisi ʻEne kau ākongá. Naʻá ne laukonga fekauʻaki mo e kau faʻa fakaleleí mo e lotú.
Naʻe hoko leva ki he taimi ʻo Masá. ʻI he ʻosi ʻene lau ha taha ʻo e ngaahi vēsí, naʻá ne kiʻi longo. Naʻá ne ongoʻi hangē naʻe ulo feʻunga ʻa e laʻaá ke fakafonu hono lotó.
Naʻá ne sio hake kia Mami. “ʻOku ou saiʻia ʻi he veesi ko eé.”
“Mo au foki. Ko e hā ʻokú ke saiʻia ai ʻi aí?” Ko e fehuʻi ange ia ʻa Mamí.
Naʻe ueʻi hake pē ʻa Masa hono ongo umá mo ʻene malimalí. “ʻOku fekauʻaki ia mo Sīsū. Pea ʻokú ne ʻai ke u ongoʻi fiefia.”
Naʻe malimali ange ʻa Mami. “Ko ha founga lelei ia ke ʻilo ai kuó ke maʻu ha potufolofola ʻokú ke saiʻia taha ai. ʻOkú ke fie vahevahe ʻa e veesi ko iá ʻi he Palaimelí?”
Naʻe kamokamo fiefia ʻa Masa. “Te ke lava ʻo tokoni mai ke u ako ia?”
“ʻIo te u lava!” Ko e tali ange ia ʻa Mamí.
Naʻe akoako ʻe Mami mo Masa ʻa e foʻi lea ʻe taha ʻi he taimi. Lolotonga ʻena akoakó, naʻe longolongoaʻa ʻa e fanga manupuná ʻi he ʻuluʻakaú, ʻo hangē naʻa nau ako foki mo kinautolú.
ʻI he uiké kakato, naʻe akoako pē ʻe Masa ʻene potufolofola foʻou ʻokú ne saiʻia taha aí. ʻI he pongipongi Sāpaté, naʻá ne kiʻi manavasiʻi. Naʻá ne akoako lau ʻene folofolá ʻi he fakaʻuli lōloa ki he lotú.
Naʻe tokosiʻi pē ʻa e fānau ʻi he Palaimeli ʻa Masá. Ka ʻi heʻene hū atu ki he loki akó, naʻe ongoʻi ʻe Masa hangē ʻoku puna takai ʻa e fanga kiʻi pepé ʻi hono loto keté.
ʻI he hoko hono taimi ke vahevahé, naʻe tuʻu hake ʻa Masa ʻo mihiʻi ʻene mānavá. Naʻá ne pehē, “Vakai, ko au ʻa e fonó, pea mo e māmá. Sio kiate au, pea kātaki ki he ngataʻangá, pea te mou moʻui; he ko ia ia ʻokú ne kātaki ki he ngataʻangá te u foaki kiate ia ʻa e moʻui taʻengatá.”
ʻI he ʻosi ʻa e vahevahe ʻa Masá, naʻá ne tangutu ki lalo ʻo malimali. Kuó ne fakahoko ia! Naʻe mole atu ʻa e ongoʻi manavasiʻí, pea naʻe toe foki mai pē ʻa e ongoʻi fiefia mo fakamāfaná. Naʻá ne ʻiloʻi ʻe ʻomi ʻe heʻene potufolofola ʻokú ne saiʻia taha aí ʻa e ongo ko iá ʻi ha taimi pē te ne fiemaʻu ai iá.
Ngaahi tā fakatātā ʻa Chloe Dominique