“Fanga Kiʻi Tokoni ki Hoʻo Fuofua ʻAlu ki he Temipalé,” Ko e Kaumeʻá, Nōvema 2024, 38–39.

Fanga Kiʻi Tokoni ki Hoʻo Fuofua ʻAlu ki he Temipalé

ʻE lava ke ke papitaiso mo hilifakinima ʻi he temipalé maʻá e kakai kuo pekia ka naʻe teʻeki ke nau maʻu ʻa e ongoongoleleí. ʻE maʻu ʻe he kakai ko iá ʻa e faingamālie ke fai ha fuakava mo e ʻOtuá mo maʻu ʻEne ngaahi tāpuakí, ʻo hangē ko ia naʻá ke fai ʻi he taimi naʻe papitaiso mo hilifakinima ai koé.

Meʻa ke ʻOmí

Vala lotu (tui ia ki he temipalé)
Lekomeni temipale
Polosi helu ʻulu mo e meʻa haʻi ki he ʻulú (kapau ʻe fiemaʻu)
Ngaahi hingoa fakafāmili naʻe paaki mei he polokalama pe uepisaiti FamilySearch (fili pē)

Meʻa ke Faí

1. Hū ki he Temipalé

Fakaʻaliʻali ho lekomení ʻi he tesi talitalí. Hili iá pea te ke lava leva ʻo ʻalu ki he faiʻanga papitaisó. ʻE ʻoatu ʻe ha tokotaha ngāue temipale ha valaloto hinehina, sitōkeni, mo ha teunga papitaiso.

2. Fetongi Ho Valá

ʻI he loki fetongí, fetongi ki he vala naʻe ʻoatu kiate koé. Faʻo hoʻo ʻū meʻá ki ha loka faʻoʻanga vala. Lokaʻi leva ho loká pea pineʻi ʻa e kií ki ho vala papitaisó. Kapau ʻoku lōloa ho ʻulú, nonoʻo ia ki mui. Tauhi ho ngaahi hingoa fakafāmili kuo pākí mo koe.

3. Tatali ʻi he Loto-ʻApasia

Lolotonga hoʻo tatali ke papitaiso koé, te ke lava ʻo lau ʻa e folofolá, lotu, pe fakalaulauloto. Te ke lava foki ʻo fakakaukau ki he kakai te ke papitaiso ki aí.

Taʻahine ʻokú ne fakahoko ʻa e papitaiso ʻi he temipalé

4. Kau ʻi he Papitaiso ʻi he Temipalé

ʻI he hoko mai ho taimí, ʻave hoʻo ngaahi hingoa fakafāmilí ki he tokotaha ʻi he tesí. Kapau ʻoku ʻikai ke ʻi ai haʻo hingoa, te nau fakaʻaongaʻi pē ʻa e ngaahi hingoa ʻo e temipalé. Lue fakalelei ki he faiʻanga papitaisó, ʻa ia ʻe papitaiso ai koe ʻe ha taha maʻu lakanga fakataulaʻeiki maʻá e tokotaha takitaha. Manatuʻi ke peluki ho tuí pea pukeʻi ho ihú ʻi heʻene tukutukuhifo koe ki he loto vaí.

Fānau tangata ʻoku vala lotu, hilifakinima ʻo e taʻahine

5. Fetongi ki Ho Valá

Hili hoʻo ʻosí, ʻe ʻoatu ʻe ha taha ha taueli. ʻI hoʻo foki ki he loki fetongí, te ke lava ʻo kaukau fakataautaha, toe fetongi ki ho vala mōmoá, pea helu ho ʻulú. Fakapapauʻi ʻokú ke faʻo ho vala vivikú ʻi he piní pea tuku hoʻo kī ki he loki fetongí ʻi he loká.

6. Kau ʻi he Hilifakinimá

Fakaʻosí, ʻe taki koe ʻe ha taha ki ha loki ʻe hilifakinima ai koe maʻanautolu naʻe papitaisó.

ʻE ʻi ai ha ngaahi temipale ʻe niʻihi ʻe kiʻi kehe ʻenau foungá. Ka ʻe tatau ai pē pe ko e hā, ʻe ʻi ai ha kakai ke nau tokoniʻi koe ʻi he meʻa kotoa pē ʻe fakahoko aí. Manatuʻi, ko e temipalé ko e fale ia ʻo e ʻEikí, pea ʻokú Ne fiefia ke ke ʻi ai!