“Ko ha Konifelenisi Makehe,” Ko e Kaumeʻá, Nōvema 2024, 8–9.
Ko Ha Konifelenisi Makehe
Mahalo ʻe lava ʻe he tokoní ʻo ʻai ke ne fiefia, hangē ko e lea ʻa Palesiteni Nalesoní.
Naʻe hoko ʻa e talanoa ko ʻení ʻi ʻInitonēsia.
“ʻAmina, ko e meʻa ia ʻaʻaku!” Ko e kaila atu ia ʻa ʻInitilá. Naʻá ne hamusi ʻa e tamapuá mei hono kiʻi tehiná.
Naʻe ui mai ʻa Mami, “Ongo ua, te u ʻalu au. Kātaki ʻo angalelei kia Teti.”
Naʻe hanga hake ʻa ʻInitila. “Ko hoʻo ʻalú ki fē?”
“Ki he māketí. Te u ʻalu ʻo fakatau ha meʻakai ke ngaohi ha meʻakai makehe ʻapongipongi.” Naʻe taʻataʻalo atu ʻa Mami.
Ha meʻakai makehe? Ka ko e hā hono ʻuhingá? Naʻe ʻalu ʻa ʻInitila ke kumi ʻa Teti. Naʻá ne fehuʻi ange, “Ko e hā ʻoku makehe ai ʻa e ʻapongipongí?”
Naʻe malimali ʻa Teti. “Ko ʻapongipongí te tau mamata ai ʻi he konifelenisi lahí! ʻOku makehe iá he te tau fanongo ki he lea ʻa e palōfitá mo e kau taki kehe ʻo e Siasí. Te nau talamai kiate kitautolu ʻa e meʻa ʻoku finangalo ʻa e Tamai Hēvaní ke tau fanongo ki aí.”
ʻI he aʻu mai ʻa Mami ki ʻapí, naʻá ne tuku ʻa e meʻakaí ki hono feituʻu tukuʻangá. Naʻe tafi ʻe Teti ʻa e falikí.
“ʻInitila, te ke lava nai ʻo tokoni kia ʻAmina ke teuteu hono vala ki ʻapongipongi?” Ko e kole ange ia ʻa Mamí.
Naʻe fakafulofula ʻa ʻInitila. “Ko e hā ʻoku ʻai ai ke u tokoni kiate iá?”
Naʻe pehē ange ʻe Mami, “Kātaki muʻa ʻo fai ʻa e meʻa ʻoku ou kolé.”
Naʻe ngulungulu ʻa ʻInitila. Naʻá ne lue totoho atu ke tokoni kia ʻAmina.
ʻI he pongipongi hono hokó, naʻe ʻā hake ʻa ʻInitila ki ha nanamu ifo. Naʻá ne puna mei he mohengá pea lele atu ki he peitó. Naʻe ngaohi ʻe Mami ha pulu naʻe haka māmālie pea mo e kipapu (kebab) ke kai ʻi he maʻu meʻatokoni hoʻataá ʻanai ange! ʻE fuʻu ifo ʻaupito ia.
Naʻe ʻikai fuoloa kuo kamata ʻa e konifelenisi lahí. Naʻe tangutu ʻa ʻInitila mo hono fāmilí ke mamata ʻi he TV. Naʻá ne fakafanongo ki he hiva ʻa e kuaeá. Naʻá ne fanongo ki he talanoa ʻa e kakaí fekauʻaki mo e temipalé mo e folofolá pea mo Sīsū Kalaisi.
Ko e tokotaha lea fakaʻosí ko e palōfitá, Palesiteni Lāsolo M. Nalesoni. Naʻá ne fakamatala fekauʻaki mo e founga ʻoku tokoniʻi ai ʻe he Siasí ʻa e kakai ʻi he funga ʻo e māmaní.
Naʻá ne pehē, “ʻOku maʻu ʻetau fiefia lahi tahá ʻi heʻetau tokoniʻi hotau kāingá.”
Naʻe fakakaukau ʻa ʻInitila ki ai. Naʻe hanga nai heʻene tokoní ʻo ʻai ia ke ne fiefia? Naʻá ne fakafanongo pē. Naʻe pehē ʻe Palesiteni Nalesoni ʻe lava ke tokoniʻi kitautolu ʻi hono moʻui ʻaki ʻa e fekau lahi hono uá ke tau hangē ko Sīsū Kalaisí.
ʻI heʻene ʻosí, naʻa nau kai ʻa e meʻatokoni hoʻatā naʻe ngaohi ʻe Mamí. Naʻe kei fakakaukau pē ʻa ʻInitila ki he lea ʻa e palōfitá.
Naʻá ne fehuʻi ange, “Ko e hā ʻa e fekau lahi hono uá?”
Naʻe pehē ange ʻe Teti, “ʻOfa ki ho kaungāʻapí ʻo hangē pē ko koé.”
Naʻe fakakaukau ʻa ʻInitila ki he kakai naʻe tokoniʻi ʻe he Siasí ʻi he funga ʻo e māmaní. “Te u lava fēfē ʻo tokoni kapau ʻoku nofo mamaʻo hoku ngaahi kaungāʻapí?”
Naʻe pehē ange ʻe Mami, “Ko ho ngaahi kaungāʻapí ʻa e tokotaha kotoa pē ʻokú ke feohi mo iá. “Hangē ko e kau mēmipa ho fāmilí.”
Naʻe sio ʻa ʻInitila ki lalo. Naʻe ʻikai ke ne fuʻu angalelei ʻi he taimi ʻe niʻihi ki hono fāmilí.
Kae mahalo ʻe lava ʻe heʻene tokoni kiate kinautolú ʻo ʻai ia ke ne fiefia, ʻo hangē ko e lea ʻa Palesiteni Nalesoní. Ko ha founga ia ʻe taha te ne lava ai ʻo muimui ʻia Sīsū. Naʻá ne fie ʻahiʻahi!
ʻI he toenga ʻo e uiké, naʻe feinga ʻa ʻInitila ke angalelei ange ki hono fāmilí. Naʻá ne vaʻinga mo ʻAmina. Naʻá ne vahevahe ʻene meʻavaʻingá. Naʻá ne fai ʻa e meʻa naʻe kole ange ʻe Mami mo Tetí ʻo ʻikai ha lāunga. ʻI he taimi naʻe tokoni ai ʻa ʻInitila ki hono fāmilí, naʻa nau fiefia. Pea naʻá ne fiefia foki mo ia ai.
Naʻe moʻoni ʻa e palōfitá. Naʻá ne fiefia ʻi heʻene tokoniʻi ʻa e niʻihi kehé!
Ngaahi tā fakatātā ʻa Judi Abbot