“Ko e Tokoua ʻo Sēletí,” Ko e Kaumeʻá, Nōvema 2024, 24–25.
Ako fekauʻaki mo e Tohi ʻa Molomoná
Ko e Tokoua ʻo Sēletí
Naʻe foʻu ʻe he kau Sēletí ha ngaahi vaka naʻe silaʻi naʻe ui ko e ngaahi vaka lafalafá ke nau fononga ai ki he fonua ʻo e talaʻofá.
Ka naʻe ʻi ai ha fehuʻi ʻa e tokoua ʻo Sēletí. Te nau mānava fēfē ʻi he ngaahi vaka lafalafá? Naʻá ne lotua ha tokoni, pea naʻe folofola ʻa e ʻEikí ke ngaohi ha ngaahi foʻi ava ʻi he ngaahi vaka lafalafá ke maʻu ai ha ʻea.
Naʻe toe ʻi ai ha fehuʻi ʻa e tokoua ʻo Sēletí. Te nau maʻu fēfē ha maama? ʻI he taimi ko ʻení, naʻe fehuʻi ʻe he ʻEikí pe ko e hā naʻe fiemaʻu ʻe he tokoua ʻo Sēletí ke Ne fai kae maʻu ʻe he kau Sēletí ha māmá.
Naʻe maʻu leva ʻe he tokoua ʻo Sēletí ha fakakaukau. Naʻá ne kole ki he ʻEikí ke ala ki ha fanga kiʻi foʻi maka iiki ʻe 16. ʻI he taimi naʻe ala ai ʻa e ʻEikí kiate kinautolú, naʻa nau ulo!
Te tau lava ʻo ʻeke ki he ʻEikí ʻetau ngaahi fehuʻí. ʻOkú Ne finangalo ke tokoniʻi kitautolu ke fakaleleiʻi ʻetau ngaahi palopalemá.
Tukupā ʻo e Folofolá
-
Naʻe fufuuʻi ʻe ʻEmaloni ʻi fē ʻa e ʻū lauʻi peleti koulá ke maʻu ʻe Molomoná? (Molomona 1:2–3)
-
Ko e hā naʻe ʻafio mei ai ʻa e ʻEikí lolotonga ʻEne folofola ki he kau Sēletí ʻa e feituʻu ke nau fononga ki aí? (ʻEta 2:5)
-
Ko e fē feituʻu naʻe ʻomi ki ai ʻe he ʻEikí ʻa e ngaahi kui ʻa Sulé? (ʻEta 7:27)
Teu Lava ke Lau ʻa e Tohi ʻa Molomoná!
Hili hoʻo laú, valivali ha konga ʻo e fakatātaá. Te ke lava ʻo lau ʻa e ngaahi potufolofola ko ʻeni ʻoku fekauʻaki mo e laukonga ʻo e uike takitaha mei he Haʻu, ʻo Muimui ʻIate Aú.
-
Uike 1: Molomona 3:20–22
-
Uike 2: Molomona 7:8–10
-
Uike 3: ʻEta 4:11–12
-
Uike 4: ʻEta 6:12
Ngaahi tā fakatātā ʻa Brooke Smart