Ko ʻEku Tohi Tā Fakatātā ʻo e Temipalé

Mālō e lelei!

Ko hoku hingoá ko Peleiteni, pea ʻoku ou nofo ʻi ʻIutā, ʻIunaiteti Siteiti ʻo ʻAmeliká.

Te u talanoa atu fekauʻaki mo ha taumuʻa naʻá ku fokotuʻu ʻi hoku taʻu 10.

Naʻe kamata kotoa ia ʻi ha folau ke ʻaʻahi ki heʻeku ongo kuí. Naʻe maʻu ʻe heʻeku ongo kuí ha ʻū tohi temipale ʻi hona loto falé, pea naʻá ku saiʻia ke sio ki he ngaahi fakatātaá. Naʻá ku fakakaukau ai ʻoku ou fie faʻu haʻaku tohi temipale pē ʻaʻaku. Naʻá ku fokotuʻu ha taumuʻa taimi lōloa ke tā fakatātaaʻi ʻa e ngaahi temipalé kotoa.

Naʻá ku fakakaukau ke tā fakatātaaʻi ʻeku fuofua temipalé. Naʻá ku toʻo hake ha peni vahevahe, fakasio hake ha fakatātā ʻi he ʻinitanetí, peá u tā ʻa e Temipale St. George Utah. Naʻá ku tā leva ʻa e Temipale Logan Utah mo e Temipale Manti Utah. Naʻe fokotuʻu mai ʻe heʻeku faʻeé ke u fakaʻaongaʻi ha tohi tā fakatātā lahi ki heʻeku ngaahi temipalé. Ko e ʻosi ʻeni ha taʻu ʻe taha mo e konga mei ai, ʻoku ou ʻi he temipale fika 81, ko e Temipale Reno Nevada. ʻOku kei ʻi ai pē ha temipale ʻe 105 ke u tā!

ʻOku ʻi ai ʻa e ngaahi taimi ʻoku ou fie foʻi ai hono tā ʻa e temipale ʻoku ou tā fakatātāʻí. ʻI he taimi ʻoku hoko ai ʻení, ʻoku ou saiʻia ke fai ha lotu ʻo kole ki he Tamai Hēvaní ke tokoniʻi au ʻi he ngaahi konga faingataʻá.

Ko ha meʻa fakaʻofoʻofa fekauʻaki mo e taumuʻa ko ʻení ko e founga kuó ne tokoniʻi ai hoku ngaahi tehina ʻe toko tolú ke nau saiʻia lahi ange ʻi he temipalé. ʻOku tā ʻe hoku kiʻi tehina ko Keití ʻa e ngaahi temipale ʻokú ne fie ʻaʻahi ki ai ʻi ha ʻaho, pea tā ʻe hoku ongo tokoua kehé ha ngaahi temipale maʻá e kau faiakó mo e ngaahi kaungāmeʻá.

Kuo tokoniʻi foki au ʻe heʻeku taumuʻá ke u ʻilo ha niʻihi ʻo e ngaahi meʻa kehe ʻoku ou manako aí. ʻOku ou saiʻia ke tā palani! Naʻá ku kamata faʻu ha ngaahi sīpinga temipale 3D ʻi he faʻahitaʻu māfana kuo ʻosí, pea ʻoku ou fakaʻamu ke u hoko ko ha tokotaha tā palani ʻi heʻeku tupu haké.

Kuo tokoniʻi au ʻe he taumuʻa ko ʻení ke u ongoʻi ofi ange ki he Tamai Hēvaní mo Sīsū. ʻI he taimi pē ʻoku ou tā ai ha temipale, ʻoku ou ongoʻi ʻa e Laumālié. ʻOku ou ʻilo ko e ngaahi temipalé ko e ngaahi fale kinautolu ʻa e ʻOtuá. Naʻá ku toki lava kimuí ni ʻo hū ki he Temipale Payson Utah mo ha niʻihi kehe. ʻOku ou ongoʻi ʻa e mālohi ʻaupito ʻa e Laumālié ʻi he taimi ʻoku ou fakahoko ai ʻa e papitaiso ʻi he temipalé.

ʻI he taimi kotoa pē ʻoku ou sio ai ki ha temipale, ʻokú ne tokoniʻi au ke u mālohi ange ʻi hono fili ʻo e totonú.

Ngaahi tā fakatātā ʻa Brayden B.