Fehokotaki ʻi he Ngaahi Fuakavá

ʻOku fakafehokotaki kitautolu ʻe he ngaahi fuakavá ki he Tamai Hēvaní mo Sīsū Kalaisi. ʻI heʻetau tauhi ʻetau ngaahi fuakavá, te tau lava ai ʻo maʻu ha tokoni mo ha ivi fakalangi. Kuo akoʻi mai ʻe Palesiteni Lāsolo M. Nalesoni ʻo pehē, “ʻI he taimi pē kuó ta fakahoko ai ha fuakava mo e ʻOtuá, ʻoku toe vāofi ange ai hota vā fetuʻutaki mo Iá. … Koeʻuhí ko ʻetau fuakava mo [Iá], he ʻikai te Ne teitei fiu ʻi Heʻene feinga ke tokoniʻi kitautolú.”

Faʻu ha sēini ʻo e ngaahi fehokotakiʻangá ke fakamanatu atu hoʻo fuakava ʻi he papitaisó! Hili iá pea tautau ia ʻi ha feituʻu te ke sio ki ai.

Kosikosi ha ʻū laʻipepa ʻe ono ʻinisi nai ʻe 1 (senitimita ʻe 2.5) hono fālahí pea ʻinisi ʻe 8 (senitimita ʻe 20) hono lōloá.
Hiki ʻi he laʻipepa takitaha ha taha ʻo e ngaahi founga te ke lava ai ʻo tauhi hoʻo fuakava ʻi he papitaisó. (ʻE lava ke tokoni ʻa e lisi ʻi laló.)
Toʻo ʻa e ʻuluaki laʻipepá pea fakapipiki fakataha ʻa e ongo muiʻi laʻipepá ke faʻu ha foʻi siakale. Hili iá pea pelu fakafuopotopoto ʻa e laʻipepa hokó ʻi he siakalé pea fakapipiki ʻa e ngaahi ngataʻanga ko iá. Toutou tānaki atu pē ʻa e ngaahi fehokotakiʻangá kae ʻoua kuo ʻi ai haʻo sēini!

Manatuʻi maʻu pē ʻa Sīsū Kalaisi
(vakai, Tokāteline mo e Ngaahi Fuakava 20:77, 79)
Tauhi ki he ʻOtuá mo tauhi ʻa e ngaahi fekaú
(vakai, Mōsaia 18:10 mo e Tokāteline mo e Ngaahi Fuakava 20:77)
Fakamoʻoni kia Sīsū Kalaisi pea hoko ko ha faʻifaʻitakiʻanga
(vakai, Mōsaia 18:9 mo e Tokāteline mo e Ngaahi Fuakava 20:77, 79)
Tokoniʻi ʻa e niʻihi kehé
(vakai, Mōsaia 18:8–9)