1 Joale ho ile ha etsahala hore selemo sa mashome a robong le motso o le mong se ile sa feta ’me e ne e le lilemo tse makholo a ts’eletseng ho tloha nakong eo Lehi a ileng a tloha Jerusalema; ’me e ne e le ka selemo seo Lachoneas e neng e le moahloli e moholo le ’musi holim’a lefats’e leo.

2 ’Me Nefi, Mora oa Helamane o ile a fallela kantle ho lefats’e la Zarahemla, a fane ka boikarabello ho mora oa hae Nefi, eo e neng e le mora oa hae e moholo, malebana le matlapa a koporo ’me le lingoliloeng tsohle tse neng li bolokiloe, le lintho tseo tsohle tse neng li bolokiloe li halalela ho tloha nakong ea ho falla ha Lehi ho tsoela kantle ho Jerusalema.

3 Joale o ile a fallela kantle ho lefats’e leo, ’me hore na o ile a ea kae, ha ho motho ea tsebang; ’me mora oa hae Nefi o ile a boloka lingoliloeng bakeng sa hae, ee, lingoliloeng tsa sechaba sena.

4 ’Me ho ile ha etsahala hore qalong ea selemo sa mashome a robong a metso e ’meli, bonang, boporofeta ba baporofeta bo ile ba qala ho phethahala ka ho tlala ho eketsehileng; hobane ho ile ha qala ho ba le mats’oao a fetang le mehlolo e fetang e tlisoang har’a sechaba.

5 Empa ho ne ho ena le ba bang ba ileng ba qala ho re nako e ne e fetile bakeng sa hore mantsoe ao a phethahatsoe, ao a ileng a boleloa ke Samuele, oa Mo-Lamane.

6 ’Me ba ile ba qala ho nyakalla holim’a ba habo bona, ba re: Bonang nako e fetile, ’me mantsoe a Samuele ha a phethahala; ka baka leo, nyakallo ea lona le tumelo ea lona malebana le ntho ena e bile lefeela.

7 ’Me ho ile ha etsahala hore ba ile ba etsa mororo o moholo lefats’eng leo lohle; ’me batho ba neng ba lumela ba ile ba qala ho tlala masoabi haholo, e se re ka mokhoa ofe kapa ofe lintho tseo tse ileng tsa boleloa li ka nna tsa sitoa ho etsahala.

8 Empa bonang, ba ile ba shebella ka ho tsitsa bakeng sa letsatsi lane le bosiu bane le letsatsi lane leo e tla ho bang joaloka lets’eare le le leng joaloka haeka ho ne ho se na bosiu, hore ba ke ba tsebe hore tumelo ea bona e ne e se lefeela.

9 Joale ho ile ha etsahala hore ho ne ho ena le letsatsi le khethiloeng ke ba sa lumeleng, hore bohle ba neng ba lumela mekhoeng eo ba tle ba bolaoe ntle le ha lets’oao le ka etsahala, le ileng la fanoa ke Samuele oa moporofeta.

10 Joale ho ile ha etsahala hore ha Nefi, mora oa Nefi, a bona bokhopo bona ba sechaba sa habo, pelo ea hae e ne e tletse masoabi ka ho fetisisa.

11 ’Me ho ile ha etsahala hore o ile a tsoela kantle ’me a inama ka bo eena holima lefats’e, ’me a hoelehetsa haholo ho Molimo oa hae bakeng sa sechaba sa habo, ee, bao ba neng ba le haufi le ho timetsoa ka lebaka la tumelo ea bona ho mekhoa ea bo ntat’a bona.

12 ’Me ho ile ha etsahala hore oile a hoelehetsa haholo ho Morena letsatsi lohle; ’me bonang, lentsoe la Morena le ile la tla ho eena, le re:

13 Phahamisa hlooho ea hau ’me o khothale; hobane bona, nako e haufi, ’me bosiung bona lets’oao le tla fanoa, ’me ka hosane ho tla ’na lefats’eng, ho tla bonts’a lefats’e hore ke tla phethisa tsohle tseo ke entseng hore li boleloe ka molomo oa baporofeta ba ka ba halalelang.

14 Bonang, ke tla ho ba ka, ho phethisa lintho tsohle tseo ke entseng hore li tsebahale ho bana ba batho ho tloha mothehong oa lefats’e, ’me ke etse thato, ka bobeli ea Ntate le ea Mora—ea Ntate ka lebaka la ka, le ea Mora ka lebaka la nama ea ka. ’Me bona, nako e atametse, ’me bosiung bona lets’oao le tla fanoa.

15 ’Me ho ile ha etsahala hore mantsoe a ileng a tla ho Nefi a ile a phethahatsoa, ho latela joaloka ha a ne a ile a boleloa; hobane bonang, ha letsatsi lea tlase ho ne ho se na lefifi; ’me sechaba se ile sa qala ho makala hobane ho ne ho se na lefifi ha bosiu bo tla.

16 ’Me ho ne ho ena le ba bangata, ba neng ba sa lumela mantsoe a baporofeta, ba ileng ba oela fats’e ’me ba fetoha joaloka ha eka ba ne ba shoele, hobane ba ne ba tseba hore morero o moholo oa timetso oo ba neng ba o behetse bao ba neng ba lumela mantsoeng a baporofeta o ne o tsielehile; hobane lets’oao le neng le fanoe le ne le se le fihlile.

17 ’Me ba ile ba qala ho tseba hore Mora oa Molimo o tlameha ho hlaha haufi; ee, ha ke phethela, sechaba sohle se holim’a sefahleho sa lefats’e lohle ho tloha bophirima ho ea bochabela, ka bobebli lefats’eng le leboea le lefats’eng le boroa, se ne se maketse ka ho fetisisa hore ba ile ba oela fats’e.

18 Hobane ba ne ba tseba hore baporofeta ba ile ba pakahatsa ka lintho tsena bakeng sa lilemo tse ngata, ’me lets’oao le ileng la fanoa le ne le se le fihlile; ’me ba ile ba qala ho ts’aba ka lebaka la bokhopo ba bona le ho se lumele ha bona.

19 ’Me ho ile ha etsahala hore ho ne ho se na lefifi bosiuong boo bohle, empa ho ne ho khanya joaloka ha eka e ne e le har’a mpa ea mots’eare. ’Me ho ile ha etsahala hore letsatsi le ile la chaba hape hoseng, ho latela tloaelo ea teng e nepahetseng; ’me ba ile ba tseba hore ke letsatsi leo Morena a tlang ho tsoaloa, ka lebaka la lets’oao le ileng la fanoa.

20 ’Me ho ile ha etsahala hore, ee, lintho tsohle, ka tsohle, ho latela mantsoe a baporofeta.

21 ’Me ho ile ha etsahala hore naleli e ncha e ile ea hlaha, ho latela lentsoe.

22 ’Me ho ile ha etsahala hore ho tloha nakong ena ho ea pele ho ile ha qala ho ba le mashano a romelloang har’a sechaba, ke Satane, ho thatafatsa lipelo tsa bona, ho isa maikemisetsong a hore ba ke ba sitoe ho lumela mats’oao ao le limakatso tseo ba le boneng; empa ho sa tsotellehe mashano a na le ho thetsa karolo e kholo ea sechaba e ile ea lumela, ’me ba sokolohela ho Morena.

23 ’Me ho ile ha etsahala hore Nefi o ile a tsamaea har’a sechaba seo, le ba bang ba bangata, a kolobeletsa pakong, mo teng ho neng ho ena le ts’’oarelo e kholo ea libe. ’Me ke joana sechaba hape se ileng sa fumana khotso lefats’eng leo.

24 ’Me ho ne ho se na likhang, ntle le hore e be ba fokolang ba ileng ba qala ho ruta, ba leka ho netefatsa ka mangolo a halalelang hore ho ne ho sa hlole ho le molemo ho mamela molao oa Moshe. Joale ka ntho ena ba ile ba fosa, ba ne ba sa utloisisa mangolo a halalelang.

25 Empa ho ile ha etsahala hore haufi ba ile ba fetoha ba sokolohileng, ’me ba ne ba kholisehile hore ka phoso eo ba neng ba le ka har’a eona, hobane ho ile a etsoa hore ho tsebahale ho bona hore molao oo o ne o so phethahale, ’me o tlameha ho phethahatsoa linthong tsohle; ee, lentsoe le ile la tla ho bona hore o tlameha ho phethahala; ee, hore tlhaku kapa sehlooho se le seng se keke sa feta hofihlela o phethahetse kaofela; ka baka leo ka sona selemo sena se ts’oanang ba ile ba tlisoa tsebong ea phoso ea bona ’me ba ile ba ipolela liphoso tsa bona.

26 ’Me ke joana selemo sa mashome a robong a metso e ’meli se ileng sa feta, se tlisa litaba tse monate ho sechaba ka lebaka la mats’oao a ileng a etsahala, ho latela mantsoe a boporofeta ba baporofeta bohle ba halalelang.

27 ’Me ho ile ha etsahala hore selemo sa mashome a robong a metso e meraro le sona se ile sa feta ka khotso, ha e ne e se ka masholu a Gadiantone, a neng a lula lithabeng, a ileng a tlala lefats’e leo; hobane ba ne ba le matla hoo liqhobosheane tsa bona le libaka tsa bona tsa lekunutu hore e be sechaba se ne se sitoa ho ba hlola; ka baka leo ba ile ba etsa lipolao tse ngata, ’me ba ile ba etsa polao tse ngata har’a sechaba.

28 ’Me ho ile ha etsahala hore ka selemo sa mashome a robong a metso e mene ba ile ba qala ho eketseha ka boemo bo boholo, hobane bo ile ha eba le baikarohanyi ba bangata ba Ba-Nefi ba ileng ba balehela ho bona, hoo ho ileng ha baka masoabi a mangata ho Ba-Nefi bao ba ileng ba sala lefats’eng leo.

29 ’Me hape ho bile le lebaka la masoabi a mangata har’a Ba-Lamane; hobane bonang, ba bile le bana ba bangata ba ileng ba hola ’me ba qala ho ba matla ka lilemo, hore ba ile ba fetoha ka bo-bona, ’me ba etelloa hole ke ba bang bao e leng Ba-Zorame, ka mashano a bona le mantsoe a thoholetsang, ho ikopanya le masholu ao a Gadiantone.

30 ’Me ke joana Ba-Lamane ba neng ba hlomohile le bona, ’me ba qala ho theoha joaloka ka tumelong ea bona le ho loka, ka lebaka la bokhopo ba moloko o nyolohang.