Heyograpiya sa Daang Tugon

Kadaghanan sa mga hitabo sa Daang Tugon nahitabo sa dapit nga gitawag og karaang Duol sa Sidlakan, nga nailhan karon nga Tungang Sidlakan. Apil niini ang rehiyon tali sa Mediterranean Sea ug Persian Gulf, apil ang Ehipto. Gihisgotan sa mga tagsulat sa Daang Tugon ang heyograpiya, topograpiya, ug ngalan sa mga lugar nga dili tingali pamilyar sa modernong mga magbabasa. Ang pagsabot sa heyograpiya nga kahimtang makahatag og dugang nga panabot sa inyong pagtuon sa Daang Tugon.

Ang mosunod nga mapa nagpakita sa pipila sa importanteng mga lokasyon nga gihisgotan sa Daang Tugon.

1. Ur mao ang unang pinuy-anan ni propeta Abraham. Diri siya hapit nahimong biktima ingon nga halad, nakakita sa anghel ni Jehova, ug nakadawat sa Urim ug Tumim. (Hinumdomi nga naay duha ka posibleng lokasyon as Ur diha sa mapa.)

2. Babilonia o Babel (Sinar) ang lokasyon sa Tore sa Babel. Sa ulahi nahimo kining bahin sa kaulohan sa probinsiya sa Babilonia ug ang pinuy-anan sa mga hari sa Babilonia. Sa 587 BC, gibihag sa Babilonyan nga Hari Nabucodonosor ang daghang Judeo, apil ang propeta Daniel, niining siyudad human malaglag ang Jerusalem. Nagpabiling binihag ang mga Judeo sulod sa 70 ka tuig hangtod sa panahon ni Hari Ciro sa Persia, nga mipildi sa Imperyo sa Babilonia. Gipapauli ni Ciro ang mga Judeo sa Jerusalem ug gitukod pag-usab ang templo.

3. Susa ang kaulohang siyudad sa Imperyo sa Persia ilawom sa pagmando ni Dario I (Dario nga Bantogan), Xerxes (Ahasuero), ug Artaxerxes. Diri usab ang pinuy-anan Rayna Ester, nga ang kaisog ug pagtuo nakaluwas sa mga Judeo. Diri nagserbisyo si Daniel ug sa ulahi ni Nehemias.

4. Asiria ang mipildi sa Amihanang Gingharian sa Israel ug gibihag ang napulo ka tribo niadtong 721 BC. Hulga usab ang Asiria sa Habagatang Gingharian sa Juda hangtod 612 BC, dihang napildi sa Babilonia ang Asiria.

5. Haran (Padan-aram) kadiyot nga mipuyo si Abraham sa wala pa miadto sa Canaan. Nagpabilin dinhi ang amahan ug igsoong lalaki ni Abraham. Diri dapita gikan si Rebecca (asawa ni Isaac) ug Raquel, Lea, Bilha, ug Zilfa (mga asawa ni Jacob).

6. Canaan ang gisaad nga yuta nga nadawat ni Abraham, Isaac, Jacob, ug sa ilang kaliwatan nga gihatagan og kahigayonan nga panag-iyahon sa walay kataposan.

7. Bukid Sinai (Horeb) ang dapit diin giistorya sa Ginoo si Moises gikan sa nagdilaab nga sampinit ug diin gihatagan si Moises sa balaod ug ang Napulo ka Sugo. Niining bukira, nakig-istorya ang Ginoo kang Elias sa hinay ug malumong tingog.

8. Ehipto ang giadtoan ni Abraham tungod sa dakong gutom sa Ur. Giingnan sa Ginoo si Abraham nga tudloan ang mga Ehiptohanon kon unsay Iyang gipadayag kaniya. Sa ulahi, gibaligya si Jose sa iyang mga igsoon ingon nga ulipon sa Ehipto, ug sa kataposan nakabaton og awtoridad dinhi. Human magkita pag-usab dsi Jose ug ang iyang mga igsoon, si Jacob ug ang iyang pamilya mibalhin sa Ehipto. Ang mga anak sa Israel namuyo sa Ehipto ingon nga mga ulipon hangtod nga giluwas sila sa Ginoo.

Para sa dugang mapa nga nagpakita sa mga lokasyon sa mga hitabo ug mga panahon nga gihulagway diha sa Daang Tugon, tan-awa ang seksiyon nga Mga Mapa ug mga Hulagway sa Biblia diha sa Mga Tabang sa Pagtuon sa ChurchofJesusChrist.org.