ប្រើប្រាស់បច្ចេកវិទ្យាប្រកបដោយសេចក្តីសុចរិត

ការប្រើប្រាស់បច្ចេកវិទ្យាអាចផ្ដល់ឲ្យទាំងឱកាស និងបញ្ហាប្រឈមនានា ។ តាមរយៈការប្រើប្រាស់បច្ចេកវិទ្យាប្រកបដោយសេចក្តីសុចរិត យើងអាចសម្រេចគោលបំណងរបស់ព្រះអម្ចាស់បានកាន់តែប្រសើរឡើង សម្រាប់យើងក្នុងនាមជាអ្នកផ្សព្វផ្សាយសាសនា និងនៅក្នុងជីវិតប្រចាំថ្ងៃរបស់យើង ។

អ្នកដឹកនាំការពិភាក្សា ៖ សូមព្យាយាមនិយាយដោយសង្ខេបនៅក្នុងផ្នែក « កំណត់និយមន័យ » និង « បង្ហាញ » ដើម្បីសិស្សមានពេលច្រើនសម្រាប់ការអនុវត្ត ។

កំណត់និយមន័យ

អ្នកដឹកនាំការពិភាក្សា ៖ ណែនាំប្រធានបទសម្រាប់ការអនុវត្តជំនាញនេះដោយពន្យល់ដូចខាងក្រោម ៖

ឧបករណ៍អេឡិចត្រូនិចដូចជា ទូរសព្ទ និងកុំព្យូទ័រអាចជាឧបករណ៍ដ៏មានឥទ្ធិពលដើម្បីបន្តកិច្ចការរបស់ព្រះអម្ចាស់ បង្កើនផលិតភាពរបស់យើង និងបង្កើតទំនាក់ទំនងវិជ្ជមាន ។ វាក៏មានការល្បួងជាច្រើនដែលទាក់ទងនឹងឧបករណ៍ទាំងនេះផងដែរ ។

សូមអាន « តើអ្នកគួរធ្វើដូចម្តេច ប្រសិនបើអ្នកមានអារម្មណ៍ថាទន់ខ្សោយ និង ងាយរងឥទ្ធិពល ? » នៅក្នុងជំពូកទី ២ នៃ ប្រកាសដំណឹងល្អរបស់យើង( [ ឆ្នាំ២០២៣ ] ទំព័រ ២១–២២ ) ។ សូមរកមើលគោលការណ៍បីដែលអាចជួយយើងយកឈ្នះលើការល្បួង ដែលទាក់ទងនឹងការប្រើប្រាស់បច្ចេកវិទ្យា ។

អ្នកដឹកនាំការពិភាក្សា ៖ សូមពិចារណាសរសេរគោលការណ៍ទាំងនេះនៅលើក្ដារខៀន ៖

គោលការណ៍ទី ១ ៖ សូមចាប់អារម្មណ៍ទៅលើគំនិត អារម្មណ៍ និងឥរិយាបថរបស់អ្នក ។
គោលការណ៍ទី ២ ៖ ជ្រើសរើសធ្វើសកម្មភាព ។
គោលការណ៍ទី ៣ ៖ រៀន ប្រែចិត្ត និងកែលម្អ ។

ការបង្ហាញ

អ្នកដឹកនាំការពិភាក្សា ៖ សូមចែកចាយសាច់រឿងដូចខាងក្រោម ។ ពិភាក្សាសំណួរជាមួយគ្នា ដើម្បីជួយបង្ហាញពីរបៀបដែលគោលការណ៍ទាំងបីនេះអាចត្រូវបានប្រើក្នុងស្ថានភាពជីវិតពិតៗ ។

ជេមស៍មានហ្គេមមួយដែលគាត់ចូលចិត្តលេងនៅលើទូរសព្ទរបស់គាត់ ។ ជាធម្មតា គាត់ដកទូរសព្ទរបស់គាត់ចេញមកដើម្បីលេងហ្គេមក្នុងអំឡុងពេលអាហារពេលល្ងាច នៅព្រះវិហារ ឬពេលនៅក្នុងថ្នាក់រៀននៅឯសាលា ។

គោលការណ៍ទី ១ ៖ សូមចាប់អារម្មណ៍ទៅលើគំនិត អារម្មណ៍ និងឥរិយាបថរបស់អ្នក ។

តើគំនិត ឬអារម្មណ៍អ្វីខ្លះដែលអាចបណ្តាលឲ្យជេមស៍ធ្វើបែបនេះ ?
តើអ្វីខ្លះដែលសំខាន់សម្រាប់គាត់ក្នុងការយល់អំពីការប្រើប្រាស់បច្ចេកវិទ្យារបស់គាត់ក្នុងស្ថានភាពទាំងនេះ ?

គោលការណ៍ទី ២ ៖ ជ្រើសរើសធ្វើសកម្មភាព ។

តើជេមស៍អាចធ្វើសកម្មភាពជាក់លាក់អ្វីខ្លះដើម្បីជួយគាត់ ចូលរួមកាន់តែច្រើននៅក្នុងមជ្ឈដ្ឋានសង្គមទាំងនេះ ?

គោលការណ៍ទី ៣ ៖ រៀន ប្រែចិត្ត និងកែលម្អ ។

តើជេមស៍អាចរៀនអ្វីខ្លះចេញមកពីបទពិសោធន៍របស់គាត់ ពេលគាត់ខិតខំប្រឹងប្រែងដើម្បីកែលម្អ ?

អនុវត្ត

អ្នកដឹកនាំការពិភាក្សា ៖ សូមទុកពេលឲ្យសិស្សអនុវត្តគោលការណ៍ទាំងបីទៅនឹងសាច់រឿងផ្សេងៗទៀត ។ អ្នកអាចបង្ហាញសាច់រឿងដូចខាងក្រោម ហើយបែងចែកថ្នាក់ទៅជាក្រុមតូចៗ ។ សុំឲ្យក្រុមនីមួយៗជ្រើសរើសសាច់រឿងពីរ ឬបី ហើយពិភាក្សាអំពីអ្វីដែលមើលទៅអាចយកទៅអនុវត្តក្នុងគោលការណ៍ទាំងបីនៅក្នុងសាច់រឿងដែលពួកគេបានជ្រើសរើស ។

សូហ្វៀបានឃើញការពិភាក្សាមួយនៅលើប្រព័ន្ធផ្សព្វផ្សាយសង្គមដែលធ្វើឲ្យនាងខឹង ហើយនាងចង់តបត ។
នៅពេលដែលគីឌានធុញទ្រាន់ ជាញឹកញាប់គាត់មើលទូរសព្ទរបស់គាត់ ។ ថ្មីៗនេះ គាត់ត្រូវបានទាក់ទាញឲ្យមើលការណ៍អាសគ្រាម ។
ជាញឹកញាប់ ម៉ារៀប្រៀបធៀបចំនួននៃការចូលចិត្ត និងអ្នកតាមដានដែលនាងមាននៅលើប្រព័ន្ធផ្សព្វផ្សាយសង្គមទៅនឹងចំនួននៃការចូលចិត្ត និងអ្នកតាមដានដែលមិត្តភក្តិរបស់នាងមាន ។
នៅពេលដែលឡូខាសដើរទៅវិញទៅមក គាត់តែងតែដាក់កាសស្ដាប់តន្រ្តីស្ទើរតែគ្រប់ពេល ។
ជាញឹកញាប់ អាំម៉ារីលេងវីដេអូហ្គេមដល់យប់ជ្រៅ ។

អ្នកដឹកនាំការពិភាក្សា ៖ ប្រសិនបើមានពេលគ្រប់គ្រាន់ សូមអញ្ជើញសិស្សមួយចំនួនឲ្យ ចែកចាយសាច់រឿងដែលពួកគេបានពិភាក្សានៅក្នុងក្រុមរបស់ពួកគេ និងរបៀបដែលពួកគេបានអនុវត្តគោលការណ៍ទាំងបីនៅក្នុងសាច់រឿងនោះ ។

អនុវត្ត

អ្នកដឹកនាំការពិភាក្សា ៖ សូមទុកពេលឲ្យអ្នកចូលរួមគិតអំពីរបៀបដែលពួកគេអាចអនុវត្តគោលការណ៍ទាំងបីនេះនៅក្នុងជីវិតរបស់ពួកគេ ។ សូមអញ្ជើញពួកគេឲ្យដាក់គោលដៅសម្រាប់ការប្រើប្រាស់បច្ចេកវិទ្យាប្រកបដោយសេចក្តីសុចរិត និងប្រឹងប្រែងដើម្បីសម្រេចបានគោលដៅនោះ ។