មេរៀនទី ១៣

ឆ្ពោះទៅមុខដោយសេចក្តីជំនឿ

គោលបំណងមេរៀននេះគឺដើម្បីជួយសិស្សឲ្យវាយតម្លៃវឌ្ឍនភាព និងការរីកចម្រើនរបស់ពួកគេក្នុងនាមជាសិស្សរបស់ព្រះយេស៊ូវគ្រីស្ទ ក្នុងអំឡុងពេលចូលរួមក្នុងវគ្គសិក្សាការរៀបចំខ្លួនធ្វើជាអ្នកផ្សាយសាសនារបស់ពួកគេ ។

ពិនិត្យមើល និង តាមដាន

អ្នកដឹកនាំការពិភាក្សា ៖ អញ្ជើញសិស្សឲ្យគិតអំពីកិច្ចខិតខំប្រឹងប្រែងថ្មីៗរបស់ពួកគេ ដើម្បីអនុវត្តអ្វីដែលពួកគេកំពុងរៀននៅក្នុងថ្នាក់នេះ ។ អ្នកអាចអញ្ជើញពួកគេឲ្យចែកចាយកិច្ចខិតខំប្រឹងប្រែងមួយចំនួនរបស់ពួកគេជាមួយដៃគូ ឬរួមគ្នាជាថ្នាក់ ។

យោបល់សម្រាប់សកម្មភាពរៀនសូត្រ

ឆ្លុះបញ្ចាំងពីការរីកចម្រើនខាងវិញ្ញាណ

អ្នកដឹកនាំការពិភាក្សា ៖ អ្នកអាចបង្ហាញរូបភាពរបស់ព្រះយេស៊ូវគ្រីស្ទធ្វើការអធិស្ឋាន និង យ៉ូសែប ស្ម៊ីធ កំពុងអានព្រះគម្ពីរប៊ីប ។ សូមអញ្ជើញសិស្សឲ្យពិចារណាអំពីរូបភាព នៅពេលពួកគេអាន ម៉ាកុស ១:៣៥; លូកា ៦:១២ និង យ៉ូសែប ស្ម៊ីធ—ប្រវត្តិ ១:១២–១៣ ។ សូមលើកទឹកចិត្តពួកគេឲ្យស្វែងរកសារលិខិតទូទៅនៅក្នុងខគម្ពីរទាំងនេះ ។

តើបទគម្ពីរប្រាប់ថា ទាំងព្រះអង្គសង្គ្រោះ និង យ៉ូសែប ស្ម៊ីធ បានធ្វើអ្វីខ្លះដើម្បីរីកចម្រើនខាងវិញ្ញាណ ?
តើជីវិតរបស់ យ៉ូសែប ស្ម៊ីធ ត្រូវបានផ្លាស់ប្តូរយ៉ាងដូចម្តេច តាមរយៈការជញ្ជឹងគិតពីអ្វីដែលលោកបានអាននៅក្នុង យ៉ាកុប ១:៥ ?

អ្នកដឹកនាំការពិភាក្សា ៖ ពន្យល់ថា ការចំណាយពេលដើម្បីពិចារណាប្រកបដោយការអធិស្ឋាន និងជញ្ជឹងគិតអំពីការរីកចម្រើនខាងវិញ្ញាណរបស់យើង អាចជួយយើងទទួលបានការណែនាំពីព្រះអម្ចាស់ ។

ដើម្បីជួយសមាជិកក្នុងថ្នាក់ធ្វើដូចនេះ អ្នកអាចគូររូបមនុស្សបីនាក់នៅលើក្តារខៀន ហើយដាក់ស្លាកពួកគេថា ថ្នាក់ដំបូង, ថ្ងៃនេះ និង ប្រាំមួយខែចាប់ពីពេលនេះទៅ ។ បន្ទាប់មកចែកចាយសេចក្តីណែនាំខាងក្រោម ៖

ជញ្ជឹងគិតលើការរីកចម្រើនខាងវិញ្ញាណរបស់អ្នក ចាប់តាំងពីពេលអ្នកបានចាប់ផ្តើមថ្នាក់នេះ ។ សូមពិចារណាផងដែរពីការរីកចម្រើនដែលអ្នកនៅតែចង់ធ្វើ ។ សូមសរសេរពីគំនិត និងចំណាប់អារម្មណ៍ទាំងឡាយរបស់អ្នក ។ សំណួរដូចនេះអាចជួយបាន ៖

សម្លឹងមើលត្រឡប់ទៅក្រោយ

ធ្វើការប្រៀបធៀបទៅនឹងការត្រៀមខ្លួនរបស់អ្នកពីមុនពេលចូលរៀនថ្នាក់នេះ តើរបៀបណាខ្លះ ដែលឥឡូវនេះអ្នកមានអារម្មណ៍ថា អ្នកបានត្រៀមខ្លួនកាន់តែប្រសើរជាងមុន ដើម្បីបម្រើបេសកកម្ម ឬចែកចាយដំណឹងល្អជាមួយមនុស្សដទៃ ?
តើការសិក្សា ប្រកាសដំណឹងល្អរបស់យើង បានមានឥទ្ធិពលលើអ្នកដោយរបៀបណា ?
តើទំនាក់ទំនងរបស់អ្នកជាមួយនឹងព្រះវរបិតាសួគ៌ និងព្រះយេស៊ូវគ្រីស្ទបានផ្លាស់ប្តូរយ៉ាងដូចម្តេច ?
តើបទពិសោធន៍អ្វីខ្លះក្នុងអំឡុងពេលថ្នាក់រៀន ឬក្រៅថ្នាក់រៀនដែលបានធ្វើឲ្យមានការផ្លាស់ប្តូរសម្រាប់អ្នក ?

ដើរឆ្ពោះទៅមុខ

តើមានអ្វីខ្លះដែលអ្នកនៅតែចង់ធ្វើ ដើម្បីបន្តរៀបចំខ្លួនសម្រាប់ការបម្រើជាអ្នកផ្សព្វផ្សាយសាសនា ? តើអ្នកមានអារម្មណ៍ថាជំហានបន្ទាប់របស់អ្នកគួរតែជាអ្វីដើម្បីសម្រេចបានគោលដៅទាំងនេះ ?
តើអ្នកចង់ជួយនរណាឲ្យចូលមកកាន់តែជិតព្រះវរបិតាសួគ៌ និងព្រះយេស៊ូវគ្រីស្ទ ? តើអ្នកនឹងធ្វើអ្វីខ្លះដើម្បីជួយដល់ពួកគេ ?

អ្នកដឹកនាំការពិភាក្សា ៖ សូមអញ្ជើញសិស្សឲ្យពិភាក្សាអំពីចម្លើយ ដែលពួកគេចង់ចែកចាយជាមួយដៃគូ ឬក្រុមតូចមួយ ។ នេះក៏អាចជាពេលវេលាដ៏ល្អមួយ ដើម្បីអញ្ជើញសមាជិកក្នុងថ្នាក់ដែលមានឆន្ទៈឲ្យចែកចាយទីបន្ទាល់របស់ពួកគេអំពីព្រះយេស៊ូវគ្រីស្ទ និងដំណឹងល្អរបស់ទ្រង់ជាមួយសិស្សក្នុងថ្នាក់ ។

សូមពិចារណាបញ្ចូលនូវការចែកចាយសេចក្ដីថ្លែងការណ៍ខាងក្រោមដោយអែលឌើរ ដេវីឌ អេ បែដណា ៖

« អ្នកអាចបង្កើនបំណងប្រាថ្នារបស់អ្នកដើម្បីបម្រើព្រះ ហើយអ្នកអាចចាប់ផ្ដើមគិតដូចជាអ្នកផ្សព្វផ្សាយសាសនាគិត អាននូវអ្វីដែលអ្នកផ្សព្វផ្សាយសាសនាអាន អធិស្ឋានដូចជាអ្នកផ្សព្វផ្សាយសាសនាអធិស្ឋាន ហើយទទួលអារម្មណ៍ដែលអ្នកផ្សព្វផ្សាយសាសនាមាន ។ អ្នកអាចចៀសវាងពីឥទ្ធិពលខាងលោកិយដែលបណ្ដាលឲ្យព្រះវិញ្ញាណបរិសុទ្ធចាកចេញ ហើយអ្នកអាចបង្កើនការជឿជាក់លើការស្គាល់ និងការឆ្លើយតបទៅនឹងការបំផុសគំនិតខាងវិញ្ញាណ ។ មួយបន្ទាត់ម្ដងៗ និងមួយសិក្ខាបទម្ដងៗ ឯណេះបន្តិច ឯណោះបន្តិច នោះយូរៗទៅអ្នកអាចក្លាយជាអ្នកផ្សព្វផ្សាយសាសនាដែលអ្នកសង្ឃឹមចង់ប្រែក្លាយ និងជាអ្នកផ្សព្វផ្សាយសាសនាដែលព្រះអង្គសង្គ្រោះរំពឹងចង់បាន ។ ( « Becoming a Missionary » Liahona ខែវិច្ឆិកា ឆ្នាំ២០០៥ ទំព័រ ៤៦ )

អ្នកដឹកនាំការពិភាក្សា ៖ បង្ហាញសេចក្តីស្រឡាញ់របស់អ្នកចំពោះអ្នកចូលរួម ទីបន្ទាល់របស់អ្នកចំពោះព្រះអង្គសង្គ្រោះ និងអារម្មណ៍របស់អ្នកអំពីសារៈសំខាន់នៃការផ្សព្វផ្សាយដំណឹងល្អរបស់ទ្រង់ ។ លើកទឹកចិត្តសិស្សឲ្យដើរឆ្ពោះទៅមុខដោយសេចក្តីជំនឿក្នុងការរៀបចំខ្លួនរបស់ពួកគេ ដូច្នេះពួកគេអាចក្លាយជាអ្នកផ្សព្វផ្សាយសាសនា និងសិស្សដែលព្រះអម្ចាស់នឹងឲ្យពួកគេប្រែក្លាយ ។