មេរៀនទី ១២

ការសម្របខ្លួនទៅនឹងជីវិតជាអ្នកផ្សព្វផ្សាយសាសនា

ការរៀបចំខ្លួនធ្វើជាអ្នកផ្សាយសាសនាពាក់ព័ន្ធនឹងការរៀបចំខ្លួនសម្រាប់តម្រូវការខាងរាងកាយ ខាងវិញ្ញាណ ខាងអារម្មណ៍ និងខាងផ្លូវចិត្តនៃកិច្ចការអ្នកផ្សព្វផ្សាយសាសនា ។ ការសម្របខ្លួនទៅនឹងជីវិតជាអ្នកផ្សព្វផ្សាយសាសនា ( ឆ្នាំ២០១៣ ) អាចជួយអ្នកផ្សព្វផ្សាយសាសនា និងអ្នកដែលកំពុងរៀបចំខ្លួនសម្រាប់បេសកកម្មគ្រប់គ្រងតម្រូវការទាំងនេះបាន ។ វាផ្តល់នូវគោលការណ៍ណែនាំដែលអាចជួយយើងទទួលបានកម្លាំងរបស់ព្រះអម្ចាស់ និងស្វែងរកសេចក្តីអំណរក្នុងការបម្រើជាអ្នកផ្សព្វផ្សាយសាសនា ។

ពិនិត្យមើល និង តាមដាន

អ្នកដឹកនាំការពិភាក្សា ៖ អញ្ជើញសិស្សឲ្យគិតអំពីកិច្ចខិតខំប្រឹងប្រែងថ្មីៗរបស់ពួកគេ ដើម្បីអនុវត្តអ្វីដែលពួកគេកំពុងរៀននៅក្នុងថ្នាក់នេះ ។ អ្នកអាចអញ្ជើញពួកគេឲ្យចែកចាយកិច្ចខិតខំប្រឹងប្រែងមួយចំនួនរបស់ពួកគេជាមួយដៃគូ ឬរួមគ្នាជាថ្នាក់ ។

ជម្រើសសកម្មភាពសិក្សា

អ្នកដឹកនាំការពិភាក្សា ៖ សូមជ្រើសរើសជម្រើស ការរៀនសូត្រ( នានា )ប្រកបដោយការអធិស្ឋាន ដែលនឹងមានអត្ថប្រយោជន៍បំផុតសម្រាប់ថ្នាក់របស់អ្នក ។ សូមប្រាកដថាទុកពេលវេលាឲ្យបានច្រើនសម្រាប់ការហាត់ និងការអនុវត្ត ។

ចំណាំ ៖ មានការអនុវត្តជំនាញជាច្រើនដែលទាក់ទងនឹងប្រធានបទនៅក្នុងមេរៀននេះ ។ សូមពិចារណាប្រើចំណុចមួយក្នុងចំណោមចំណុចទាំងឡាយខាងក្រោម ក្នុងអំឡុងពេលដូចគ្នាដែលអ្នកបង្រៀនសកម្មភាពរៀនសូត្រចេញពីមេរៀននេះ ៖ « និយាយនឹងមនុស្សគ្រប់គ្នា » « ឆ្លើយតបទៅនឹងអារម្មណ៍មិនល្អគ្រប់គ្រាន់ » « ការដកដង្ហើមវែងៗ » និង « បង្កើតទម្លាប់គិតវិជ្ជមាន » ។

ជម្រើស ក ៖ តើអ្វីខ្លះអាចជួយខ្ញុំឲ្យសម្របខ្លួនទៅនឹងជីវិតជាអ្នកផ្សព្វផ្សាយសាសនាបាន ?

សិក្សា

អ្នកដឹកនាំការពិភាក្សា ៖ សូមអញ្ជើញសមាជិកក្នុងថ្នាក់គិតអំពីពេលវេលា ដែលពួកគេត្រូវការសម្របខ្លួនទៅនឹងស្ថានភាពថ្មីនៅក្នុងជីវិតរបស់ពួកគេ ។ ឧទាហរណ៍អាចរួមមានការផ្លាស់ប្តូរទៅផ្ទះថ្មី ការចូលរួមក្នុងសាសនាចក្រ ការផ្លាស់ប្តូរសាលារៀន ការជួបមនុស្សថ្មី ឬការចាប់ផ្តើមការងារថ្មី ។ សូមឲ្យពួកគេចែកចាយបទពិសោធន៍របស់ពួកគេមានលក្ខណៈយ៉ាងណា ។ សំណួរដូចខាងក្រោមអាចជួយក្នុងការពិភាក្សានេះ ៖

តើមានអ្វីខ្លះដែលមិនស្រួលអំពីការផ្លាស់ប្តូរនេះ ?
តើវាមានអ្វីខ្លះគួរឲ្យរំភើប ?
តើអ្វីខ្លះដែលជួយអ្នកសម្របខ្លួនទៅនឹងស្ថានភាពថ្មីរបស់អ្នក ?

អ្នកដឹកនាំការពិភាក្សា ៖ សូមបង្ហាញរូបភាពមួយ ឬច្រើនអំពីពួកអ្នកផ្សព្វផ្សាយសាសនាពេញម៉ោង ដូចជារូបភាពដូចខាងក្រោម ។ សូមអញ្ជើញសិស្សឲ្យចែកចាយអ្វីដែលពួកគេនឹងមានអារម្មណ៍រំភើបអំពីការធ្វើជាអ្នកផ្សព្វផ្សាយសាសនាពេញម៉ោង និងអ្វីដែលអាចជាការលំបាកអំពីកិច្ចការនេះ ។

អ្នកដឹកនាំការពិភាក្សា ៖ សូមពន្យល់ថា នៅក្នុងសកម្មភាពរៀនសូត្រនេះ សមាជិកក្នុងថ្នាក់នឹងកាន់តែស្គាល់ធនធានមួយដែលមានចំណងជើងថា ការសម្របខ្លួនទៅនឹងជីវិតជាអ្នកផ្សព្វផ្សាយសាសនា ( ឆ្នាំ២០១៣ ) ។ សូមជួយពួកគេស្វែងរក ការសម្របខ្លួនទៅនឹងជីវិតជាអ្នកផ្សព្វផ្សាយសាសនា នៅក្នុងបណ្ណាល័យដំណឹងល្អ ( បណ្ណាល័យ > ក្បួនខ្នាត និងការហៅ > ការហៅក្នុងបេសកកម្ម > ការសម្របខ្លួនទៅនឹងជីវិតជាអ្នកផ្សព្វផ្សាយសាសនា ) ។ សូមណែនាំធនធាននេះដោយការចែកចាយការណែនាំដូចខាងក្រោម ៖

សូមអាន « ភាពតានតឹងគឺជាផ្នែកធម្មតាមួយនៃជីវិត » នៅក្នុងផ្នែក « ការយល់ដឹងពីភាពតានតឹង » នៃ ការសម្របខ្លួនទៅនឹងជីវិតជាអ្នកផ្សព្វផ្សាយសាសនា ( ទំព័រ ៣ ) ។ សូមស្វែងរកមើលពីគោលបំណងនៃកូនសៀវភៅនេះ ។

តើអ្នកគិតថា ធនធាននេះអាចជួយអ្នកបានដោយរបៀបណានៅពេលឥឡូវនេះ និងនៅពេលអនាគត ?

អនុវត្ត

អ្នកដឹកនាំការពិភាក្សា ៖ សកម្មភាពខាងក្រោមអាចជួយសមាជិកក្នុងថ្នាក់មានបទពិសោធន៍ផ្ទាល់ខ្លួនក្នុងការស្គាល់ជាមួយនឹង ការសម្របខ្លួនទៅនឹងជីវិតជាអ្នកផ្សព្វផ្សាយសាសនា ។ វាក៏អាចរៀបចំ និងបំផុសគំនិតពួកគេឲ្យសិក្សាបន្ថែមទៀតចេញពីធនធាននេះដោយខ្លួនឯងផងដែរ ។

សូមបង្ហាញការណែនាំទាំងនេះ និងផ្តល់ឲ្យសិស្សប្រហែល ១០-១៥ នាទី ដើម្បីបញ្ចប់សកម្មភាពនេះ ។

សូមអាន « កំណត់ត្រាការវាយតម្លៃខ្លួនឯង » នៅក្នុង ការសម្របខ្លួនទៅនឹងជីវិតជាអ្នកផ្សព្វផ្សាយសាសនា ( ទំព័រ ១១ ) ។
សូមជ្រើសរើសប្រភេទមួយចេញពីការវាយតម្លៃខ្លួនឯង ( ទូទៅ, រាងកាយ; អារម្មណ៍; សង្គម; បញ្ញា; ខាងវិញ្ញាណ ) ដែលអ្នកចង់ស្វែងយល់បន្ថែម ។
សូមស្វែងរកផ្នែកនៃ ការសម្របខ្លួនទៅនឹងជីវិតជាអ្នកផ្សព្វផ្សាយសាសនា ដែលទាក់ទងនឹងប្រភេទដែលអ្នកបានជ្រើសរើស ។ សិក្សាចំណែកនៃផ្នែកនោះដែលពាក់ព័ន្ធបំផុតចំពោះអ្នក ។ សូមរកមើល និងពិចារណាគូសសម្គាល់ការបង្រៀនដែលអាចជួយអ្នកក្នុងស្ថានភាពបច្ចុប្បន្នរបស់អ្នក ។

អ្នកដឹកនាំការពិភាក្សា ៖ បន្ទាប់ពីសមាជិកក្នុងថ្នាក់បានបញ្ចប់ការសិក្សារួចរាល់ហើយ សូមអញ្ជើញពួកគេឲ្យចែកចាយអ្វីដែលពួកគេបានរៀនជាមួយដៃគូ ឬក្រុមតូចមួយ ។ អ្នកអាចបង្ហាញសំណួរដូចខាងក្រោម និងអញ្ជើញដៃគូ ឬសមាជិកក្រុមឲ្យពិភាក្សាសំណួរនោះជាមួយគ្នា ៖

តើមានយោបល់មួយចំនួន ឬការបង្រៀនណាខ្លះដែលអ្នកបានរកឃើញថាមានប្រយោជន៍បំផុតនោះ ?
តើអ្នកបានរៀនអ្វីខ្លះអំពីរបៀបដែលព្រះអម្ចាស់អាចជួយអ្នកសម្របខ្លួនទៅនឹងតម្រូវការនៃជីវិតនៅពេលនេះ និងនៅពេលក្រោយក្នុងនាមជាអ្នកផ្សព្វផ្សាយសាសនា ?

ដាក់គោលដៅមួយ

អ្នកដឹកនាំការពិភាក្សា ៖ ផ្តល់ពេលវេលាឲ្យសមាជិកក្នុងថ្នាក់ជញ្ជឹងគិតពីអ្វីដែលពួកគេបានរៀន និងដាក់គោលដៅ ។ អ្នកអាចបង្ហាញសេចក្តីណែនាំខាងក្រោមនេះដើម្បីជួយពួកគេ ៖

ដាក់គោលដៅទាក់ទងនឹងអ្វីដែលអ្នកបានសិក្សារួចហើយ ។ សូមប្រើប្រាស់គំនិតខាងក្រោមនេះ ឬគិតអំពីគំនិតរបស់អ្នកផ្ទាល់ ។

សូមបន្តសិក្សាផ្នែកនៃ ការសម្របខ្លួនទៅនឹងជីវិតជាអ្នកផ្សព្វផ្សាយសាសនា ដែលអ្នកបានចាប់ផ្តើមសិក្សានៅក្នុងសកម្មភាពរៀនសូត្រនេះ ។ ស្វែងរកយោបល់ដែលអ្នកអាចចាប់ផ្តើមប្រើប្រាស់នៅក្នុងជីវិតរបស់អ្នក ។
សូមបង្កើតផែនការសម្រាប់ការសិក្សាផ្នែកផ្សេងទៀតនៃ ការសម្របខ្លួនទៅនឹងជីវិតជាអ្នកផ្សព្វផ្សាយសាសនា ។

គោលដៅរបស់ខ្ញុំ

ខ្ញុំនឹង … ( សកម្មភាពដែលអ្នកនឹងធ្វើ ) ។
ខ្ញុំនឹងសម្រេចគោលដៅរបស់ខ្ញុំដោយ … ( ផែនការសាមញ្ញមួយ ) ។

អ្នកដឹកនាំការពិភាក្សា ៖ ប្រសិនបើសិស្សមានក្រុមមិត្តភក្តិដើម្បីចែកចាយគោលដៅរបស់ពួកគេពេញមួយវគ្គសិក្សា សូមទុកពេលឲ្យពួកគេដើម្បីចែកចាយពីរបៀបដែលពួកគេនឹងគាំទ្រ ឬរំឭកគ្នាទៅវិញទៅមកពីមុនថ្នាក់បន្ទាប់ ។