ការដកដង្ហើមវែងៗ

ក្នុងអំឡុងពេលបម្រើបេសកកម្ម និងក្នុងជីវិតប្រចាំថ្ងៃរបស់យើង វាជារឿងធម្មតាសម្រាប់ការមានស្ថានភាពតានតឹងកើតឡើង ។ ការដកដង្ហើមវែងៗគឺជាបច្ចេកទេសមួយដែលយើងអាចប្រើ ដើម្បីកាត់បន្ថយភាពតានតឹង និងបង្កើតអារម្មណ៍នៃភាពស្រស់ស្រាយ ។

អ្នកដឹកនាំការពិភាក្សា ៖ សូមព្យាយាមនិយាយដោយសង្ខេបនៅក្នុងផ្នែក « កំណត់និយមន័យ » និង « បង្ហាញ » ដើម្បីសិស្សមានពេលច្រើនសម្រាប់ការអនុវត្ត ។

កំណត់និយមន័យ

អ្នកដឹកនាំការពិភាក្សា ៖ ពិចារណាសួរសិស្សឲ្យនិយាយអំពីរបៀបដែលភាពតានតឹងអាចប៉ះពាល់ដល់យើងទាំងវិជ្ជមាន និងអវិជ្ជមាន ។ អ្នកអាចបង្ហាញការពន្យល់ដូចខាងក្រោមតាមតម្រូវការ ៖

ការជួបប្រទះភាពតានតឹងអាចផ្តល់ឲ្យយើងនូវឱកាសដើម្បីធ្វើឲ្យរីកលូតលាស់ រីកចម្រើន និងពឹងផ្អែកលើព្រះសម្រាប់កម្លាំង ។ ទោះជាយ៉ាងណាក៏ដោយ ភាពតានតឹងដ៏ធ្ងន់ធ្ងរក្នុងពេលមួយ ឬការមានអារម្មណ៍តានតឹងជាប់លាប់ក្នុងរយៈពេលយូរ អាចនាំឲ្យមានបញ្ហាប្រឈមមុខចំពោះរាងកាយ និងអារម្មណ៍បាន ។

អ្នកដឹកនាំការពិភាក្សា ៖ សូមអាន និងពិភាក្សាជាមួយគ្នានូវដំបូន្មានរបស់ព្រះអម្ចាស់នៅក្នុង គោលលទ្ធិ និងសេចក្តីសញ្ញា ១០១:១៦ ។ សូមសួរអ្នកចូលរួមថា តើពួកគេមានអារម្មណ៍ថា ការណែនាំនេះដោះស្រាយចំពោះស្ថានភាពតានតឹង រួមទាំងស្ថានភាពដែលពួកគេអាចប្រឈមមុខ ក្នុងនាមជាអ្នកផ្សព្វផ្សាយសាសនាបានដោយរបៀបណា ។ អ្នកអាចណែនាំជំនាញនៃការដកដង្ហើមវែងៗដោយបង្ហាញដូចខាងក្រោម ៖

វិធីដ៏ល្អមួយដើម្បីទប់ទល់នឹងទម្រង់អវិជ្ជមាននៃភាពតានតឹងគឺតាមរយៈការធ្វើលំហាត់ដកដង្ហើមវែងៗ ។ ការដកដង្ហើមវែងៗអាចជួយធ្វើឲ្យរូបកាយ និងចិត្តរបស់យើងស្ងប់ស្ងាត់ ។ វាក៏អាចជួយឲ្យការផ្តោតរបស់យើងមានភាពប្រសើរឡើង គ្រប់គ្រងផ្លូវអារម្មណ៍របស់យើង បង្កើនការចងចាំ និងកាន់តែមានភាពងាយស្រួលក្នុងការទទួលបានការបំផុសគំនិតមកពីព្រះវិញ្ញាណ ។

ការបង្ហាញ

អ្នកដឹកនាំការពិភាក្សា ៖ ខាងក្រោមនេះគឺជាលំហាត់ដកដង្ហើមវែងៗពីរប្រភេទដែលអ្នកអាចបង្ហាញបាន ៖

ជម្រើសទី ១ ៖ Box breathing ( វដ្តនៃការដកដង្ហើម )

អង្គុយនៅលើកៅអីដែលមានផាសុកភាព ។ ត្រូវប្រាកដថា ខ្នងរបស់អ្នកមានបង្អែក ហើយជើងរបស់អ្នកដាក់លើកម្រាលឥដ្ឋ ។ អ្នកអាចបើក ឬបិទភ្នែករបស់អ្នក ។

ជំហានទី ១ ៖ ដកដង្ហើមចូលតាមច្រមុះរបស់អ្នក ហើយរាប់យឺតៗដល់ប្រាំ ស្រូបខ្យល់ចូលពេញសួតរបស់អ្នក ។
ជំហានទី ២ ៖ ទប់ដង្ហើមរបស់អ្នករយៈពេលប្រាំវិនាទី ។ ព្យាយាមចៀសវាងកុំដកដង្ហើមចេញក្នុងអំឡុងប្រាំវិនាទីនោះ ។
ជំហានទី ៣ ៖ ដកដង្ហើមចេញយឺតៗតាមមាត់របស់អ្នករយៈពេលប្រាំវិនាទី ។
ជំហានទី ៤ ៖ ទប់ដង្ហើមរយៈពេលប្រាំវិនាទី ។
ជំហានទី ៥ ៖ ធ្វើត្រាប់ពីជំហានទី ១ ដល់ទី ៤ រហូតដល់អ្នកមានអារម្មណ៍ថាបានធូរស្បើយ ។

អ្នកដឹកនាំការពិភាក្សា ៖ អ្នកអាចបង្ហាញក្រាហ្វិកខាងក្រោម ដើម្បីជួយសិស្សឲ្យយល់កាន់តែច្បាស់អំពីលំហាត់ដកដង្ហើមនេះ ៖

ជម្រើសទី ២ ៖ លំហាត់ដកដង្ហើមនៅក្នុង ការសម្របខ្លួនទៅនឹងជីវិតជាអ្នកផ្សព្វផ្សាយសាសនា

អ្នកដឹកនាំការពិភាក្សា ៖ ជួយសិស្សស្វែងរក ការសម្របខ្លួនទៅនឹងជីវិតជាអ្នកផ្សព្វផ្សាយសាសនា នៅក្នុងបណ្ណាល័យដំណឹងល្អ ( បណ្ណាល័យ > ក្បួនខ្នាត និងការហៅ > ការហៅក្នុងបេសកកម្ម > ការសម្របខ្លួនទៅនឹងជីវិតជាអ្នកផ្សព្វផ្សាយសាសនា ) ។

ស្វែងរកសកម្មភាព « លំហាត់ដកដង្ហើម » នៅក្នុងផ្នែក « គោលការណ៍ទូទៅសម្រាប់ការគ្រប់គ្រងភាពតានតឹង » នៃ ការសម្របខ្លួនទៅនឹងជីវិតជាអ្នកផ្សព្វផ្សាយសាសនា ( [ ឆ្នាំ២០១៣ ] ទំព័រ ១៨ ) ។ សូមអនុវត្តតាមជំហានទាំងបីដែលបានពិពណ៌នានៅក្នុងសកម្មភាពនេះ ។

អនុវត្ត

អ្នកដឹកនាំការពិភាក្សា ៖ បន្ទាប់ពីបង្ហាញលំហាត់ដកដង្ហើមមួយ ឬទាំងពីររួចហើយ សូមទុកពេលឲ្យអ្នកចូលរួមដើម្បីអនុវត្តវា ។ អ្នកអាចអញ្ជើញអ្នកចូលរួមឲ្យវាយតម្លៃអារម្មណ៍តានតឹង ឬថប់បារម្ភរបស់ពួកគេនៅលើមាត្រដ្ឋានពី ១ ទៅ ៥ ពីមុន និងក្រោយលំហាត់ដកដង្ហើម ដើម្បីមើលថា តើពួកគេឃើញភាពខុសប្លែកគ្នាដែរឬទេ ។

អនុវត្ត

អ្នកដឹកនាំការពិភាក្សា ៖ សូមចែកចាយការអញ្ជើញដូចខាងក្រោមដើម្បីជួយអ្នកចូលរួមអនុវត្តជំនាញនេះ ៖

សូមអនុវត្តការដកដង្ហើមវែងៗឲ្យបានពីរបីនាទីជារៀងរាល់ថ្ងៃ ក៏ដូចជាពេលណាដែលអ្នកជួបប្រទះភាពតានតឹង ។ សូមយកចិត្តទុកដាក់លើអារម្មណ៍ដែលអ្នកមានពេលអ្នកអនុវត្ត ។ សូមអធិស្ឋានទូលសុំជំនួយពីព្រះវរបិតាសួគ៌ក្នុងការដោះស្រាយស្ថានភាពតានតឹងក្នុងជីវិតរបស់អ្នក ។