ការអនុវត្តជំនាញទី ៤
សួរសំណួរដែលបំផុសគំនិត
ពួកអ្នកផ្សព្វផ្សាយសាសនាជាញឹកញាប់សួរសំណួរទៅដល់អ្នកដែលពួកគេកំពុងបង្រៀន ។ ការសួរសំណួរល្អអាចជួយអ្នកផ្សព្វផ្សាយសាសនា « យល់ពីចំណាប់អារម្មណ៍ កង្វល់ និងសំណួររបស់មនុស្ស ។ សំណួរល្អៗអាចយាងអញ្ជើញព្រះវិញ្ញាណ ហើយជួយមនុស្សឲ្យរៀន » ( ប្រកាសដំណឹងល្អរបស់យើង [ ឆ្នាំ២០២៣ ] ទំព័រ ១៩០ ) ។
អ្នកដឹកនាំការពិភាក្សា ៖ សូមព្យាយាមនិយាយដោយសង្ខេបនៅក្នុងផ្នែក « កំណត់និយមន័យ » និង « បង្ហាញ » ដើម្បីសិស្សមានពេលច្រើនសម្រាប់ការអនុវត្ត ។
កំណត់និយមន័យ
អ្នកដឹកនាំការពិភាក្សា ៖ សូមចែកចាយការណែនាំខាងក្រោមដើម្បីណែនាំប្រធានបទនៃការសួរសំណួរ ៖
សូមអានកថាខណ្ឌ និងតារាងនៅក្រោមចំណងជើង « សួរសំណួរ » នៅក្នុងជំពូកទី ១០ នៃ ប្រកាសដំណឹងល្អរបស់យើង ( ទំព័រ ១៩០–១៩១ ) ។ សូមស្វែងរកតួនាទីដែលសំណួរល្អៗមានក្នុងការចែកចាយដំណឹងល្អ ។
-
ហេតុអ្វីបានជាវាសំខាន់សម្រាប់ពួកអ្នកផ្សព្វផ្សាយសាសនាក្នុងការសួរសំណួរ ដែលមានប្រសិទ្ធភាពក្នុងការបង្រៀនរបស់ពួកគេ ?
អ្នកដឹកនាំការពិភាក្សា ៖ សូមពន្យល់ថា ប្រភេទសំណួរមួយចំនួនមានប្រសិទ្ធភាពជាងសំណួរដទៃទៀត ។ សូមចែកចាយការណែនាំខាងក្រោមដើម្បីជួយសមាជិកក្នុងថ្នាក់ រៀនគោលការណ៍ណែនាំសម្រាប់ការសួរសំណួរប្រកបដោយប្រសិទ្ធភាព ៖
សូមអានចំណុចទាំងប្រាំពីរដំបូងនៅក្រោម « សូមចៀសវាងសំណួរដែលមិនមានប្រសិទ្ធភាព ឬហួសហេតុ » ( ប្រកាសដំណឹងល្អរបស់យើង ទំព័រ ១៩១ ) ។ សូមស្វែងរកគោលការណ៍ណែនាំដែលអាចជួយអ្នក ឲ្យរៀនសួរសំណួរប្រកបដោយប្រសិទ្ធភាព ។
ការបង្ហាញ
អ្នកដឹកនាំការពិភាក្សា ៖ បង្ហាញសិស្សនូវឧទាហរណ៍មួយចំនួនអំពីរបៀបផ្លាស់ប្តូរសំណួរ ដែលមិនសូវមានប្រសិទ្ធភាពឲ្យកាន់តែមានប្រសិទ្ធភាព ។ សូមពិចារណាប្រើឧទាហរណ៍ក្នុងតារាងខាងក្រោម ។ សម្រាប់ឧទាហរណ៍បន្ថែមទៀត សូមមើលបញ្ជីនៃ សំណួរដែលមិនសូវមានប្រសិទ្ធភាព នៅទំព័រ ១៩២–១៩៣ នៃ ប្រកាសដំណឹងល្អរបស់យើង ។
|
សំណួរដែលមិនសូវមានប្រសិទ្ធភាព |
សំណួរដែលមានប្រសិទ្ធភាព |
|---|---|
|
តើនរណាជាព្យាការីដំបូង ? ( បុគ្គលនោះប្រហែលជាមិនដឹងពីចម្លើយទេ |
តើវានឹងមានឥទ្ធិពលដល់ជីវិតរបស់អ្នកយ៉ាងដូចម្តេច ប្រសិនបើអ្នកដឹងថា ព្រះបានហៅព្យាការីនៅសព្វថ្ងៃនេះ ? ( សួរពីគំនិត និងអារម្មណ៍ផ្ទាល់ខ្លួនរបស់បុគ្គលម្នាក់នោះ ) ។ |
|
តើការរក្សារូបកាយយើងឲ្យបរិសុទ្ធជួយយើងឲ្យមានព្រះវិញ្ញាណ ហើយបង្ហាញថាយើងមានឆន្ទៈធ្វើតាមព្យាការីរបស់ព្រះដោយរបៀបណា ? ( មានគំនិតច្រើនជាងមួយ ) ។ |
តើអ្នកគិតថា ការរក្សារូបកាយរបស់យើងឲ្យបរិសុទ្ធ អាចមានឥទ្ធិពលលើទំនាក់ទំនងរបស់យើងជាមួយនឹងព្រះដោយរបៀបណា ? ( ផ្តោតលើគំនិតមួយ ) ។ |
អនុវត្ត
អ្នកដឹកនាំការពិភាក្សា ៖ សិស្សអាចធ្វើការជាមួយដៃគូដើម្បីបំពេញសកម្មភាពដូចខាងក្រោម ។
សូមអានឧទាហរណ៍ផ្សេងទៀតមកពី បញ្ជីសំណួរដែលមិនសូវមានប្រសិទ្ធភាព នៅក្នុងជំពូកទី ១០ នៃ ប្រកាសដំណឹងល្អរបស់យើង ( ទំព័រ ១៩២–១៩៣ ) ។ សូមជ្រើសរើសសំណួរពីរ ឬបីចេញពីសំណួរទាំងនេះ ហើយធ្វើការរួមគ្នាដើម្បីបង្កើតសំណួរដែលមានប្រសិទ្ធភាពបន្ថែមទៀត ។
អ្នកដឹកនាំការពិភាក្សា ៖ បន្ទាប់ពីសមាជិកក្នុងថ្នាក់បញ្ចប់ សូមអញ្ជើញសិស្សពីរបីនាក់ឲ្យចែកចាយឧទាហរណ៍នៃសំណួរដែលមានប្រសិទ្ធភាពជាងមុន ដែលពួកគេបានបង្កើត ។
ប្រសិនបើមានពេលវេលាគ្រប់គ្រាន់ អ្នកអាចអញ្ជើញសិស្សឲ្យធ្វើសកម្មភាពអនុវត្តនេះម្តងហើយម្តងទៀតជាមួយនឹងសំណួរផ្សេងទៀតចេញមកពី បញ្ជីនៃសំណួរដែលមិនសូវមានប្រសិទ្ធភាព នៅក្នុង ប្រកាសដំណឹងល្អរបស់យើង ។
អនុវត្ត
អ្នកដឹកនាំការពិភាក្សា ៖ សូមពិចារណាបង្ហាញដូចខាងក្រោម ដើម្បីជួយសិស្សគិតអំពីរបៀបដែលពួកគេអាចអនុវត្តជំនាញនេះ ៖
សូមគិតអំពីរបៀបដែលអ្នកអាចអនុវត្តអ្វីដែលអ្នកបានរៀន អំពីការសួរសំណួរប្រកបដោយប្រសិទ្ធភាពក្នុងអំឡុងសប្តាហ៍ក្រោយ ឬពីរសប្តាហ៍ទៀត ។ ឧទាហរណ៍ អ្នកអាច ៖
-
សូមស្វែងរកសំណួរដែលមានប្រសិទ្ធភាពមួយចំនួននៅក្នុងមេរៀនមួយចំនួនមកពី ចូរមកតាមខ្ញុំ ។
-
ប្រសិនបើអ្នកនឹងបង្រៀនមេរៀនក្នុងពេលឆាប់ៗនេះ សូមរៀបចំសំណួរប្រកបដោយប្រសិទ្ធភាពមួយចំនួនដែលអ្នកអាចសួរនៅពេលអ្នកបង្រៀន ។