ការអនុវត្តជំនាញទី ៣
បង្រៀនមនុស្សអំពីរបៀបអធិស្ឋាន
មនុស្សជាច្រើនដែលពួកអ្នកផ្សព្វផ្សាយសាសនាបង្រៀនខ្វះបទពិសោធន៍ជាមួយនឹងការអធិស្ឋាន ។ « ការអញ្ជើញមនុស្សឲ្យអធិស្ឋានគឺជាការអញ្ជើញដ៏សំខាន់បំផុតមួយ ដែលអ្នកអាចធ្វើក្នុងនាមជាអ្នកផ្សព្វផ្សាយសាសនា » ( ប្រកាសដំណឹងល្អរបស់យើង [ ឆ្នាំ២០២៣ ] ទំព័រ ៤៣ ) ។
អ្នកដឹកនាំការពិភាក្សា ៖ សូមព្យាយាមនិយាយដោយសង្ខេបនៅក្នុងផ្នែក « កំណត់និយមន័យ » និង « បង្ហាញ » ដើម្បីសិស្សមានពេលច្រើនសម្រាប់ការអនុវត្ត ។
កំណត់និយមន័យ
អ្នកដឹកនាំការពិភាក្សា ៖ ណែនាំប្រធានបទសម្រាប់ការអនុវត្តជំនាញនេះ ដោយចែកចាយដូចខាងក្រោម ៖
ព្រះវរបិតាសួគ៌ដែលពេញដោយក្ដីស្រឡាញ់របស់យើង ប្រាថ្នាឲ្យបុត្រាបុត្រីរបស់ទ្រង់ប្រាស្រ័យទាក់ទងជាមួយនឹងទ្រង់តាមរយៈការអធិស្ឋាន ។ ពួកអ្នកផ្សព្វផ្សាយសាសនាជាញឹកញាប់បង្រៀនមនុស្សដែលមានបទពិសោធន៍តិចតួច ឬគ្មានបទពិសោធន៍ជាមួយនឹងការអធិស្ឋាន ។
អ្នកដឹកនាំការពិភាក្សា ៖ សូមអញ្ជើញសិស្សឲ្យស្វែងរក « មេរៀនទី ៤—ការក្លាយជាសិស្សរបស់ព្រះយេស៊ូវគ្រីស្ទពេញមួយជីវិត » នៅក្នុងជំពូកទី ៣ នៃ ប្រកាសដំណឹងល្អរបស់យើង ។ សូមជួយពួកគេស្វែងរកចំណងជើងដែលដាក់ថា « អធិស្ឋានជាញឹកញាប់ » នៅទំព័រ ៧៧ ។ បន្ទាប់មក សូមចែកចាយសេចក្តីណែនាំដូចខាងក្រោម ៖
អានផ្នែកដែលមានចំណងជើងថា « អធិស្ឋានជាញឹកញាប់ » ( ប្រកាសដំណឹងល្អរបស់យើង ទំព័រ ៧៧ ) ។ សូមរកមើលគោលការណ៍ណែនាំដែលអាចជួយអ្នកបង្រៀនមនុស្សដទៃថា ហេតុអ្វីបានជាវាសំខាន់ដើម្បីអធិស្ឋាន និងពីរបៀបអធិស្ឋាន ។
-
តើអ្នករៀនបានអ្វីខ្លះអំពីសារៈសំខាន់នៃការអធិស្ឋាន ?
-
តើអ្នកបានរកឃើញអ្វីខ្លះដែលអាចជួយមនុស្សដទៃឲ្យដឹងពីរបៀបអធិស្ឋាន ?
អ្នកដឹកនាំការពិភាក្សា ៖ ពិចារណាបង្ហាញគោលការណ៍ណែនាំខាងក្រោមមកពីផ្នែកនេះ ដើម្បីសិស្សអាចយោងទៅគោលការណ៍ណែនាំទាំងនោះក្នុងអំឡុងពេលធ្វើសកម្មភាពអនុវត្ត ៖
-
ចាប់ផ្តើមដោយការនិយាយទៅកាន់ព្រះវរបិតាសួគ៌ ។
-
បង្ហាញពីអារម្មណ៍នៃដួងចិត្តរបស់យើង ដូចជាការដឹងគុណចំពោះពរជ័យដែលយើងបានទទួល ។
-
សួរសំណួរ ស្វែងរកការណែនាំ និងទូលសុំពរជ័យ ។
-
បញ្ចប់ដោយពោលថា « នៅក្នុងព្រះនាមនៃព្រះយេស៊ូវគ្រីស្ទ អាម៉ែន » ។
ការបង្ហាញ
អ្នកដឹកនាំការពិភាក្សា ៖ បង្ហាញពីអ្វីដែលវាអាចមើលទៅដូចជាការបង្រៀននរណាម្នាក់អំពីការអធិស្ឋាន ។ ជាផ្នែកមួយនៃការបង្ហាញរបស់អ្នក សូមរៀបរាប់អំពីមូលហេតុដែលការអធិស្ឋានមានសារៈសំខាន់ និងអំពីរបៀបអធិស្ឋាន ។
អ្នកក៏អាចប្រើវីដេអូ « Teaching about the Holy Ghost and Prayer: John » បានផងដែរ ( នៅលើគេហទំព័រ ChurchofJesusChrist.org; មើលចាប់ពីនាទីទី ២:៤៦ ដល់នាទីទី ៥:០០ ) ។
អនុវត្ត
អ្នកដឹកនាំការពិភាក្សា ៖ ផ្ដល់ឲ្យនូវដៃគូម្នាក់ដល់សមាជិកក្នុងថ្នាក់នីមួយៗ ហើយចែកចាយការណែនាំដូចខាងក្រោម ៖
ជាមួយដៃគូរបស់អ្នក ប្តូរវេនបង្រៀនគ្នាទៅវិញទៅមកអំពីការអធិស្ឋាន ( សូមយោងទៅលើគោលការណ៍ណែនាំចេញពីទំព័រ ៧៧ នៃ ប្រកាសដំណឹងល្អរបស់យើង តាមតម្រូវការ ) ។ សូមប្រាកដថា បានពន្យល់ទាំងមូលហេតុដែលយើងអធិស្ឋាន និងពីរបៀបអធិស្ឋានផងដែរ ។ អ្នកក៏អាចថ្លែងទីបន្ទាល់ផងដែរថា ព្រះសណ្តាប់ និងឆ្លើយតបការអធិស្ឋានរបស់យើង ។
អនុវត្ត
អ្នកដឹកនាំការពិភាក្សា ៖ សូមចែកចាយការអញ្ជើញដូចខាងក្រោម ដើម្បីជួយសិស្សអនុវត្តជំនាញនេះ ៖
ក្នុងអំឡុងសប្តាហ៍ក្រោយ សូមស្វែងរកឱកាសមួយដើម្បីអនុវត្តការបង្រៀននរណាម្នាក់ពីរបៀបអធិស្ឋាន ។ ការអនុវត្តនេះអាចធ្វើជាមួយសមាជិកគ្រួសារម្នាក់ ឬមិត្តភក្តិដែលដឹងពីរបៀបអធិស្ឋាន ឬប្រសិនបើអ្នកស្គាល់នរណាម្នាក់ដែលមិនទាន់យល់ពីការអធិស្ឋាន នោះអ្នកអាចបង្រៀនពួកគេបាន ។ សូមពិចារណាផងដែរពីរបៀបដែលអ្នកអាចធ្វើអោយការអធិស្ឋានផ្ទាល់ខ្លួនរបស់អ្នកកាន់តែប្រសើរឡើង ។