មេរៀនទី ១០

ស្វែងរកគុណលក្ខណៈដូចជាព្រះគ្រីស្ទ

ប្រកាសដំណឹងល្អរបស់យើង ជំពូកទី ៦

« មធ្យោបាយដ៏សំខាន់មួយដើម្បីស្វែងរកព្រះយេស៊ូវ គឺការខិតខំប្រឹងប្រែងដោយឧស្សាហ៍ព្យាយាមដើម្បីរៀនអំពីទ្រង់ ហើយប្រែក្លាយដូចជាទ្រង់ » ( ប្រកាសដំណឹងល្អរបស់យើង ៖ មគ្គុទេសក៍ចែកចាយដំណឹងល្អនៃព្រះយេស៊ូវគ្រីស្ទ [ ឆ្នាំ២០២៣ ] ទំព័រ ១២៤ ) ។ ការស្វែងរកការអភិវឌ្ឍគុណលក្ខណៈរបស់ព្រះយេស៊ូវគ្រីស្ទ អាចជួយយើងចែកចាយដំណឹងល្អរបស់ព្រះអង្គសង្គ្រោះកាន់តែមានប្រសិទ្ធភាពច្រើនជាងមុន ។ ដោយមានជំនួយរបស់ព្រះអង្គសង្គ្រោះ យើងអាចអភិវឌ្ឍគុណលក្ខណៈទាំងនេះបន្តិចម្តងៗដែលជួយយើងឲ្យកាន់តែប្រែក្លាយដូចជាទ្រង់ ។

ពិនិត្យមើល និង តាមដាន

អ្នកដឹកនាំការពិភាក្សា ៖ អញ្ជើញសិស្សឲ្យគិតអំពីកិច្ចខិតខំប្រឹងប្រែងថ្មីៗរបស់ពួកគេ ដើម្បីអនុវត្តអ្វីដែលពួកគេកំពុងរៀននៅក្នុងថ្នាក់នេះ ។ អ្នកអាចអញ្ជើញពួកគេឲ្យចែកចាយកិច្ចខិតខំប្រឹងប្រែងមួយចំនួនរបស់ពួកគេជាមួយដៃគូ ឬរួមគ្នាជាថ្នាក់ ។

យោបល់សម្រាប់សកម្មភាពរៀនសូត្រ

តើខ្ញុំអាចប្រែកាន់តែដូចជាព្រះអង្គសង្គ្រោះបានដោយរបៀបណា ?

សិក្សា

អ្នកដឹកនាំការពិភាក្សា ៖ សូមបង្ហាញរូបភាពរបស់ព្រះអង្គសង្គ្រោះ ដូចជារូបភាពខាងក្រោម ។ សូមអញ្ជើញសិស្សឲ្យចែកចាយគុណលក្ខណៈដូចជាព្រះគ្រីស្ទ ដែលពួកគេរកឃើញនៅក្នុងរូបភាពទាំងនេះ ។ អ្នកក៏អាចមើល « Christlike Attributes [ គុណលក្ខណៈដូចជាព្រះគ្រីស្ទ ] ផងដែរ ( នៅនាទី ២:៥៣ នៅលើគេហទំព័រ ChurchofJesusChrist.org ) ដើម្បីជួយសមាជិកក្នុងថ្នាក់មើលឃើញនូវគំរូផ្សេងទៀតនៃគុណលក្ខណៈរបស់ព្រះអង្គសង្គ្រោះ ។

តើគុណលក្ខណៈអ្វីខ្លះរបស់ព្រះអង្គសង្គ្រោះដែលអ្នកកោតសរសើរបំផុត ? ហេតុអ្វី ?

អ្នកដឹកនាំការពិភាក្សា ៖ សូមពន្យល់ថា នៅក្នុងមេរៀននេះ សមាជិកក្នុងថ្នាក់នឹងមានឱកាសរៀនសូត្រអំពីសារៈសំខាន់នៃការស្វែងរកគុណលក្ខណៈដូចជាព្រះគ្រីស្ទ នៅក្នុងកិច្ចការអ្នកផ្សព្វផ្សាយសាសនា ។ សូមអញ្ជើញពួកគេឲ្យស្វែងរកការណែនាំមកពីព្រះវិញ្ញាណបរិសុទ្ធ ដើម្បីដឹងថាតើគុណលក្ខណៈណាដែលព្រះអម្ចាស់នឹងឲ្យពួកគេខិតខំអភិវឌ្ឍនៅក្នុងជីវិតរបស់ពួកគេផ្ទាល់ ។ សូមចែកចាយសេចក្តីណែនាំខាងក្រោម ៖

សូមអាន « សេចក្ដីណែនាំ » និង « ស្វែងរកព្រះយេស៊ូវគ្រីស្ទ » នៅក្នុងជំពូកទី ៦ នៃ ប្រកាសដំណឹងល្អរបស់យើង ( ទំព័រ ១២៣–១២៤ ) ។ សូមរំលេចនូវពរជ័យដែលទាក់ទងនឹងការអភិវឌ្ឍគុណលក្ខណៈដូចជាព្រះគ្រីស្ទ ។

អ្នកដឹកនាំការពិភាក្សា ៖ អ្នកក៏អាចពិចារណាសិក្សា គោលលទ្ធិ និងសេចក្ដីសញ្ញា ៤ រួមគ្នា ដូចដែលបានរៀបរាប់នៅក្នុងប្រអប់ « ការសិក្សាផ្ទាល់ខ្លួន » ( ប្រកាសដំណឹងល្អរបស់យើង ទំព័រ ១២៣ ) ។

សូមអញ្ជើញសមាជិកក្នុងថ្នាក់ឲ្យពិភាក្សាពីអ្វីដែលលេចធ្លោចំពោះពួកគេអំពីអ្វីដែលពួកគេបានសិក្សា ។ សំណួរខាងក្រោមនេះអាចប្រើក្នុងការពិភាក្សានេះបាន ៖

តើការខិតខំប្រឹងប្រែងដើម្បីក្លាយដូចជាព្រះយេស៊ូវគ្រីស្ទ ជួយអ្នកឲ្យក្លាយជាអ្នកផ្សព្វផ្សាយសាសនាកាន់តែប្រសើរឡើងដោយរបៀបណា ?
តើព្រះអង្គសង្រ្គោះដើរតួយ៉ាងណានៅក្នុងការជួយអ្នកឲ្យក្លាយកាន់តែដូចជាទ្រង់ ?

អ្នកដឹកនាំការពិភាក្សា ៖ នៅពេលអ្នកពិភាក្សាអំពីសំណួរមុនៗ សូមពិចារណាអញ្ជើញសិស្សឲ្យអានផ្នែក « អំណោយទានមកពីព្រះ » និង « ដំណើរការសន្សឹមៗ » ( ប្រកាសដំណឹងល្អរបស់យើង ទំព័រ ១២៤ ) ។ សូមអញ្ជើញពួកគេឲ្យស្វែងរកពាក្យ ឬឃ្លាមកពីផ្នែកទាំងនេះ ដែលអាចជួយពួកគេយល់កាន់តែច្បាស់អំពីតម្រូវការរបស់ពួកគេក្នុងការពឹងផ្អែកលើព្រះអង្គសង្គ្រោះ ក្នុងការអភិវឌ្ឍគុណលក្ខណៈដូចជាព្រះគ្រីស្ទ ។

តើអ្វីខ្លះបានជួយអ្នកឲ្យរីកចម្រើន ដើម្បីប្រែក្លាយឲ្យកាន់តែដូចជាព្រះអង្គសង្រ្គោះ ?

អនុវត្ត

អ្នកដឹកនាំការពិភាក្សា ៖ ផ្នែកនៃមេរៀននេះមានគោលបំណង ដើម្បីជួយសិស្សកំណត់ថា តើគុណលក្ខណៈមួយណារបស់ព្រះអង្គសង្គ្រោះដែលពួកគេចង់អភិវឌ្ឍ ។ សូមដាក់បង្ហាញសេចក្តីណែនាំដូចខាងក្រោម ។

បំពេញ « សកម្មភាពអំពីគុណលក្ខណៈ » នៅចុងបញ្ចប់នៃជំពូកទី ៦ នៃ ប្រកាសដំណឹងល្អរបស់យើង ( ទំព័រ ១៣៦–១៣៨ ) ។
ដោយផ្អែកលើការឆ្លើយតបរបស់អ្នក សូមជ្រើសរើសគុណលក្ខណៈដូចជាព្រះគ្រីស្ទដែលអ្នកចង់យល់កាន់តែច្បាស់ និងចង់អភិវឌ្ឍ ។
សូមស្វែងរក និងសិក្សាផ្នែកស្តីពីគុណលក្ខណៈ ដែលអ្នកបានជ្រើសរើសនៅក្នុង ជំពូកទី ៦ នៃ ប្រកាសដំណឹងល្អរបស់យើង ។

អ្នកដឹកនាំការពិភាក្សា ៖ បន្ទាប់ពីទុកពេលវេលាគ្រប់គ្រាន់ហើយ សូមអញ្ជើញសមាជិកក្នុងថ្នាក់ឲ្យចែកចាយជាមួយដៃគូថា តើគុណលក្ខណៈមួយណាដែលពួកគេបានជ្រើសរើសដើម្បីសិក្សា ដោយរួមជាមួយនឹងសេចក្តីសង្ខេបខ្លីៗអំពីអ្វីដែលពួកគេបានរៀន ។

ដាក់គោលដៅមួយ

អ្នកដឹកនាំការពិភាក្សា ៖ ផ្តល់ពេលវេលាឲ្យសមាជិកក្នុងថ្នាក់ជញ្ជឹងគិតពីអ្វីដែលពួកគេបានរៀន និងដាក់គោលដៅ ។ អ្នកអាចបង្ហាញសេចក្តីណែនាំខាងក្រោមនេះដើម្បីជួយពួកគេ ៖

សូមបង្កើតផែនការមួយពីរបៀបដែលអ្នកនឹងស្វែងរកការអភិវឌ្ឍគុណលក្ខណៈដូចជាព្រះគ្រីស្ទដែលអ្នកបានសិក្សា ។ អ្នកអាចប្រើការផ្ដល់យោបល់នៅក្រោមចំណងជើង « គំរូសម្រាប់ការប្រែក្លាយកាន់តែដូចជាព្រះគ្រីស្ទ » ( ប្រកាសដំណឹងល្អរបស់យើង ទំព័រ ១៣៤ ) ដើម្បីជួយអ្នក ។ សូមកុំបារម្ភឡើយ ប្រសិនបើអ្នកមិនល្អឥតខ្ចោះនៅក្នុងគុណលក្ខណៈនេះ ។ សូមបន្តព្យាយាម ហើយព្រះអង្គសង្រ្គោះនឹងជួយអ្នក ។

គោលដៅរបស់ខ្ញុំ

ខ្ញុំនឹង … ( សកម្មភាពដែលអ្នកនឹងធ្វើ ) ។
ខ្ញុំនឹងសម្រេចគោលដៅរបស់ខ្ញុំដោយ … ( ផែនការសាមញ្ញមួយ ) ។

អ្នកដឹកនាំការពិភាក្សា ៖ ប្រសិនបើសិស្សមានក្រុមមិត្តភក្តិដើម្បីចែកចាយគោលដៅរបស់ពួកគេជាមួយពេញមួយវគ្គសិក្សា សូមទុកពេលឲ្យពួកគេដើម្បីចែកចាយពីរបៀបដែលពួកគេនឹងគាំទ្រ ឬរំឭកគ្នាទៅវិញទៅមកពីមុនថ្នាក់បន្ទាប់ ។

ពេលក្រោយ

អ្នកដឹកនាំការពិភាក្សា ៖ ប្រសិនបើអ្នកត្រៀមខ្លួនរួចរាល់ដើម្បីបង្រៀន មេរៀនទី ១១ នៅក្នុងថ្នាក់បន្ទាប់ សូមពិចារណាអញ្ជើញសមាជិកក្នុងថ្នាក់ឲ្យសិក្សា ជំពូកទី ១១ នៃ ប្រកាសដំណឹងល្អរបស់យើង ក្នុងការរៀបចំ ។ អ្នកក៏អាចផ្ញើការរំឭកឲ្យពួកគេផងដែរ ។