មេរៀនទី ៩

ប្រើអានុភាពនៃព្រះគម្ពីរមរមន

ប្រកាសដំណឹងល្អរបស់យើង ជំពូកទី ៥

« ព្រះគម្ពីរមរមនត្រូវបានប្រមូលផ្ដុំជាមួយនឹងព្រះវិញ្ញាណ គឺជាប្រភពដ៏មានឥទ្ធិពលបំផុតរបស់អ្នកក្នុងការផ្លាស់សាសនា » ( ប្រកាសដំណឹងល្អរបស់យើង ៖ មគ្គុទេសក៍ចែកចាយដំណឹងល្អនៃព្រះយេស៊ូវគ្រីស្ទ [ ឆ្នាំ២០២៣ ] ទំព័រ ១១៣ ) ។ ព្រះគម្ពីរមរមនថ្លែងទីបន្ទាល់អំពីព្រះយេស៊ូវគ្រីស្ទ និងជាឧបករណ៍មួយដែលព្រះបានរៀបចំឡើង ដើម្បីប្រមូលផ្តុំអ៊ីស្រាអែលនៅថ្ងៃចុងក្រោយ ។ នៅពេលយើងសិក្សាព្រះគម្ពីរមរមន និងអនុវត្តតាមការបង្រៀនរបស់ព្រះគម្ពីរនេះ នោះយើងអាចខិតទៅកាន់តែជិតព្រះ ។

ពិនិត្យមើល និង តាមដាន

អ្នកដឹកនាំការពិភាក្សា ៖ អញ្ជើញសិស្សឲ្យគិតអំពីកិច្ចខិតខំប្រឹងប្រែងថ្មីៗរបស់ពួកគេ ដើម្បីអនុវត្តអ្វីដែលពួកគេកំពុងរៀននៅក្នុងថ្នាក់នេះ ។ អ្នកអាចអញ្ជើញពួកគេឲ្យចែកចាយកិច្ចខិតខំប្រឹងប្រែងមួយចំនួនរបស់ពួកគេជាមួយដៃគូ ឬរួមគ្នាជាថ្នាក់ ។

ជម្រើសសកម្មភាពសិក្សា

អ្នកដឹកនាំការពិភាក្សា ៖ សូមជ្រើសរើសជម្រើស ការរៀនសូត្រ( នានា )ប្រកបដោយការអធិស្ឋាន ដែលនឹងមានអត្ថប្រយោជន៍បំផុតសម្រាប់ថ្នាក់របស់អ្នក ។ សូមប្រាកដថាទុកពេលវេលាឲ្យបានច្រើនសម្រាប់ការហាត់ និងការអនុវត្ត ។

ជម្រើស ក ៖ ហេតុអ្វីបានជាព្រះគម្ពីរមរមនគឺជាឧបករណ៍ដ៏សំខាន់ក្នុងការចែកចាយដំណឹងល្អ ?

សិក្សា

អ្នកដឹកនាំការពិភាក្សា ៖ សូមសួរសិស្សឲ្យគិតអំពីឧបករណ៍មួយដែលពួកគេប្រើជាញឹកញាប់ ។ អ្នកក៏អាចពិភាក្សាសំណួរដូចខាងក្រោមនេះផងដែរ ៖

តើឧបករណ៍នេះធ្វើឲ្យជីវិតរបស់អ្នកកាន់តែងាយស្រួលដោយរបៀបណា ?
តើព្រះបានប្រទានឲ្យយើងនូវឧបករណ៍អ្វីខ្លះ ដើម្បីធ្វើការងាររបស់ទ្រង់ ?

អ្នកដឹកនាំការពិភាក្សា ៖ សូមអញ្ជើញសមាជិកក្នុងថ្នាក់រៀនម្នាក់អានឲ្យឮៗ នូវកថាខណ្ឌទីមួយនៅក្នុងជំពូកទី ៥ នៃ ប្រកាសដំណឹងល្អរបស់យើង ( ទំព័រ ១១៣ ) ។ សូមឲ្យសិស្សធ្វើតាម ហើយរកមើលឧបករណ៍មួយដែលព្រះទ្រង់ប្រើដើម្បីជួយមនុស្សឲ្យមករកទ្រង់ ។ អ្នកក៏អាចប្រើសេចក្តីថ្លែងការណ៍ខាងក្រោមធ្វើជាផ្នែកមួយនៃការពិភាក្សានេះផងដែរ ។

អែលឌើរ ដេវីឌ អេ បែដណា បានបង្រៀនថា ៖

ព្រះគម្ពីរមរមនគឺជាសក្ខីបទមួយទៀតអំពីព្រះយេស៊ូវគ្រីស្ទ ហើយជាឧបករណ៍ដ៏អស្ចារ្យនៃការប្រែចិត្តជឿនៅថ្ងៃចុងក្រោយនេះ ។ ( « ដោយព្រះចេស្ដានៃព្រះដោយសិរីល្អដ៏អស្ចារ្យ » លីអាហូណា ខែវិច្ឆិកា ឆ្នាំ២០២១ ទំព័រ ២៨–៣០ )

អែលឌើរ អូលីសេស សូរ៉េសបានថ្លែងទីបន្ទាល់ថា ៖

ព្រះគម្ពីរមរមនគឺជាឧបករណ៍របស់ព្រះ ដើម្បីនាំមកនូវការប្រមូលផ្ដុំនៃអ៊ីស្រាអែលនៅក្នុងជំនាន់របស់យើង ហើយជួយមនុស្សឲ្យមកស្គាល់ព្រះរាជបុត្រារបស់ទ្រង់គឺព្រះយេស៊ូវគ្រីស្ទ ។ ( « The Coming Forth of the Book of Mormon » Liahona ខែឧសភា ឆ្នាំ២០២០ ទំព័រ ៣៣ )

អ្នកដឹកនាំការពិភាក្សា ៖ សូមពិចារណាសរសេរប្រយោគដែលមិនពេញលេញដូចខាងក្រោមនៅលើក្តារខៀន ៖ ព្រះគម្ពីរមរមនគឺជាឧបករណ៍ដ៏សំខាន់បំផុតមួយ សម្រាប់ការចែកចាយដំណឹងល្អរបស់ព្រះអង្គសង្គ្រោះ ពីព្រោះ …

អញ្ជើញសិស្សឲ្យបញ្ចប់ប្រយោគនេះ ។ សូមសរសេរចម្លើយរបស់ពួកគេនៅលើក្តារខៀន ។ បន្ទាប់មក សូមចែកចាយសេចក្តីណែនាំដូចខាងក្រោម ៖

ជ្រើសរើសផ្នែកមួយមកពី ជំពូកទី ៥ នៃ ប្រកាសដំណឹងល្អរបស់យើង ( ទំព័រ ១១៣–១២២ ) ដើម្បីសិក្សា ។ នៅពេលដែលអ្នកអានជំពូកនេះ សូមរកមើលហេតុផលបន្ថែមទៀត ដែលព្រះគម្ពីរមរមន គឺជាឧបករណ៍ដ៏សំខាន់មួយ ឬជាគ្រឿងសម្រាប់ការចែកចាយដំណឹងល្អរបស់ព្រះអង្គសង្គ្រោះ ។

អ្នកដឹកនាំការពិភាក្សា ៖ បន្ទាប់ពីសិស្សបានបញ្ចប់ការសិក្សារួចរាល់ហើយ សូមអញ្ជើញពួកគេឲ្យចែកចាយរបៀបបន្ថែមដែលពួកគេអាចបំពេញប្រយោគនេះនៅលើក្តារខៀន ។ សិស្សក៏អាចពិភាក្សាអំពីសំណួរមួយ ឬទាំងពីរខាងក្រោមផងដែរ ។ ប្រសិនបើពួកគេលើកឡើងពីខគម្ពីរជាក់លាក់ណាមួយមកពីព្រះគម្ពីរមរមននៅក្នុងចម្លើយរបស់ពួកគេចំពោះសំណួរណាមួយ សូមពិចារណាអានខគម្ពីរទាំងនេះជាមួយគ្នាជាថ្នាក់ ។

តើអ្នកមានបទពិសោធន៍អ្វីខ្លះក្នុងការចែកចាយសេចក្តីពិតចេញពីព្រះគម្ពីរមរមនជាមួយមនុស្សដទៃ ?
តើអ្នកបានមើលឃើញសេចក្តីពិតនៃព្រះគម្ពីរមរមនជួយអ្នក ឬមនុស្សដទៃឲ្យមកជិតព្រះយេស៊ូវគ្រីស្ទដោយរបៀបណា ?

អ្នកដឹកនាំការពិភាក្សា ៖ សូមពិចារណាចែកចាយចម្លើយផ្ទាល់ខ្លួនរបស់អ្នកចំពោះសំណួរមុនៗ ។ អ្នកក៏អាចបង្ហាញវីដេអូ « Shaquille’s Story about the Book of Mormon ផងដែរ ( នៅនាទី ១:២៨ នៅលើគេហទំព័រ ChurchofJesusChrist.org ) ។ សូមពិភាក្សាអំពីរបៀបដែលព្រះគម្ពីរមរមនបានជួយឆ្លើយសំណួរ និងការប្រែចិត្តជឿរបស់គាត់ទៅលើព្រះយេស៊ូវគ្រីស្ទ ។

អនុវត្ត

អ្នកដឹកនាំការពិភាក្សា ៖ សូមពន្យល់ថា ហេតុផលមួយដែលព្រះគម្ពីរមរមនគឺជាធនធានដ៏សំខាន់មួយសម្រាប់ការចែកចាយដំណឹងល្អគឺថា វាមាននូវចម្លើយចំពោះសំណួរសំខាន់ៗដ៏អស់កល្បជានិច្ច ។ សកម្មភាពខាងក្រោមអាចជួយសិស្សអនុវត្តការប្រើប្រាស់ព្រះគម្ពីរមរមនដើម្បីស្វែងរក និងចែកចាយចម្លើយចំពោះសំណួរទាំងនេះ ។ សូមដាក់បង្ហាញសេចក្តីណែនាំដូចខាងក្រោម ៖

ស្វែងរកផ្នែកដែលមានចំណងជើងថា « ព្រះគម្ពីរមរមន ដោះស្រាយសំណួរនៃព្រលឹង » នៅក្នុងជំពូកទី ៥ នៃ ប្រកាសដំណឹងល្អរបស់យើង ( ទំព័រ ១១៧–១១៨ ) ។
ជ្រើសរើសសំណួរមួយមកពីផ្នែកដែលអ្នកចង់ផ្តោតលើ ។
អានបទគម្ពីរដែលពាក់ព័ន្ធ ហើយគិតអំពីរបៀបដែលបទគម្ពីរទាំងនោះអាចជួយឆ្លើយសំណួរដែលអ្នកបានជ្រើសរើស ។
សូមរៀបចំចែកចាយខគម្ពីរមួយដែលអ្នកបានសិក្សា និងពន្យល់ពីរបៀបដែលវាឆ្លើយសំណួរ ។

អ្នកដឹកនាំការពិភាក្សា ៖ សូមបែងចែកសិស្សក្នុងថ្នាក់ជាដៃគូ ។ អញ្ជើញសមាជិកក្នុងថ្នាក់រៀនម្នាក់ៗឲ្យចែកចាយអ្វីដែលពួកគេបានរៀបចំសម្រាប់ជំហានទី ៤ ជាមួយដៃគូរបស់ពួកគេ ។ បន្ទាប់ពីដៃគូបញ្ចប់ការបង្រៀនគ្នាទៅវិញទៅមកហើយ អ្នកអាចពិចារណាចាត់ចែងពួកគេជាមួយដៃគូផ្សេងទៀត ដូច្នេះពួកគេអាចអនុវត្តការបង្រៀនម្តងទៀត ។

សម្រាប់ការអនុវត្តបន្ថែម អ្នកអាចប្រើ ការអនុវត្តជំនាញទី ១ ៖ « ណែនាំព្រះគម្ពីរមរមនដល់មនុស្ស » ។

ដាក់គោលដៅមួយ

អ្នកដឹកនាំការពិភាក្សា ៖ សូមទុកពេលឲ្យសមាជិកក្នុងថ្នាក់រៀនដើម្បីជញ្ជឹងគិតពីអ្វី ដែលពួកគេបានរៀននៅថ្ងៃនេះ និងដាក់គោលដៅ ។ របៀបមួយដែលអ្នកអាចធ្វើបានគឺដោយចែកចាយសេចក្តីថ្លែងការណ៍ខាងក្រោមដោយអែលឌើរ រ៉ូណល អេ រ៉ាសបាន និងការអញ្ជើញខាងក្រោមនោះ ៖

ខ្ញុំសូមអញ្ជើញបងប្អូននៅថ្ងៃនេះ ឲ្យជូនព្រះគម្ពីរមរមនទៅមិត្តភក្ដិ និងគ្រួសារ មិត្តភក្តិធ្វើការជាមួយគ្នា គ្រូបង្វឹកបាល់ទាត់ ឬអ្នកលក់ដូរនៅផ្សាររបស់បងប្អូន ។ ពួកគាត់ត្រូវការព្រះបន្ទូលនៃព្រះអម្ចាស់ដែលមាននៅក្នុងព្រះគម្ពីរនេះ ។ ពួកគាត់ត្រូវការចម្លើយចំពោះសំណួរជីវិតប្រចាំថ្ងៃ និងជីវិតដ៏អស់កល្បជានិច្ចនាពេលខាងមុខ ។ ពួកគាត់ត្រូវតែស្គាល់ផ្លូវនៃសេចក្ដីសញ្ញាដែលលាតសន្ធឹងនៅចំពោះមុខពួកគាត់ និងសេចក្ដីស្រឡាញ់ដ៏ឋិតថេររបស់ព្រះអម្ចាស់ចំពោះពួកគាត់ ។ វាមានទាំងអស់នៅក្នុងព្រះគម្ពីរមរមន ។

នៅពេលបងប្អូនជូនព្រះគម្ពីរមរមនទៅពួកគាត់ បងប្អូនកំពុងបើកគំនិត និងដួងចិត្តរបស់ពួកគាត់ឲ្យទទួលយកព្រះបន្ទូលរបស់ព្រះហើយ ។ បងប្អូនមិនចាំបាច់យកព្រះគម្ពីរដែលបានបោះពុម្ពតាមខ្លួនបងប្អូននោះទេ ។ បងប្អូនគ្រាន់តែចែកចាយវាចេញពីទូរសព្ទដៃរបស់បងប្អូន ពីផ្នែកព្រះគម្ពីរក្នុងកម្មវិធីបណ្ណាល័យដំណឹងល្អប៉ុណ្ណោះ ។ ( « ថ្ងៃនេះ » លីអាហូណា ខែវិច្ឆិកា ឆ្នាំ២០២២ ទំព័រ ២៧ )

សូមពិចារណាដោយការអធិស្ឋានគិតអំពីនរណាម្នាក់ដែលអ្នកអាចចែកចាយព្រះគម្ពីរមរមនជាមួយ ។ សូមកំណត់ពីអ្វីដែលអ្នកអាចបង្រៀនពួកគេអំពីព្រះគម្ពីរមរមន និងពីអ្វីផ្សេងទៀតដែលអ្នកអាចនិយាយ ។ សូមកត់ត្រាផែនការរបស់អ្នក ។

គោលដៅរបស់ខ្ញុំ

ខ្ញុំនឹង … ( សកម្មភាពដែលអ្នកនឹងធ្វើ ) ។
ខ្ញុំនឹងសម្រេចគោលដៅរបស់ខ្ញុំដោយ … ( ផែនការសាមញ្ញមួយ ) ។

អ្នកដឹកនាំការពិភាក្សា ៖ ប្រសិនបើសិស្សមានក្រុមមិត្តភក្តិដើម្បីចែកចាយគោលដៅរបស់ពួកគេពេញមួយវគ្គសិក្សា សូមទុកពេលឲ្យពួកគេដើម្បីចែកចាយពីរបៀបដែលពួកគេនឹងគាំទ្រ ឬរំឭកគ្នាទៅវិញទៅមកពីមុនថ្នាក់បន្ទាប់ ។