មេរៀនទី ៣

បំពេញគោលបំណងជាអ្នកផ្សព្វផ្សាយសាសនារបស់អ្នក

ប្រកាសដំណឹងល្អរបស់យើង ជំពូកទី ១

ពួកអ្នកផ្សព្វផ្សាយសាសនាផ្សព្វផ្សាយដំណឹងល្អ

គោលបំណងរបស់អ្នកផ្សព្វផ្សាយសាសនាគឺដើម្បី « អញ្ជើញមនុស្សដទៃមកកាន់ព្រះគ្រីស្ទ ដោយការជួយពួកគេឲ្យទទួលយកដំណឹងល្អដែលបានស្ដារឡើងវិញ តាមរយៈសេចក្ដីជំនឿនៅលើព្រះយេស៊ូវគ្រីស្ទ និងដង្វាយធួនរបស់ទ្រង់ ការប្រែចិត្ត ពិធីបុណ្យជ្រមុជទឹក ការទទួលអំណោយទាននៃព្រះវិញ្ញាណបរិសុទ្ធ និងការកាន់ខ្ជាប់ដរាបដល់ចុងបំផុត » ( ប្រកាសដំណឹងល្អរបស់យើង [ ឆ្នាំ២០២៣ ] ទំព័រ ១ ) ។ ការយល់ និងការអនុវត្តគោលបំណងនេះចំពោះគ្រប់ទិដ្ឋភាពនៃកិច្ចការអ្នកផ្សព្វផ្សាយសាសនា អាចលើកកម្ពស់របៀបដែលយុវវ័យគិត រៀបចំ និងបម្រើបេសកកម្ម ។

ពិនិត្យមើល និង តាមដាន

អ្នកដឹកនាំការពិភាក្សា ៖ អញ្ជើញសិស្សឲ្យគិតអំពីកិច្ចខិតខំប្រឹងប្រែងថ្មីៗរបស់ពួកគេ ដើម្បីអនុវត្តអ្វីដែលពួកគេកំពុងរៀននៅក្នុងថ្នាក់នេះ ។ អ្នកអាចអញ្ជើញពួកគេឲ្យចែកចាយកិច្ចខិតខំប្រឹងប្រែងមួយចំនួនរបស់ពួកគេជាមួយដៃគូ ឬរួមគ្នាជាថ្នាក់ ។

ជម្រើសសកម្មភាពសិក្សា

អ្នកដឹកនាំការពិភាក្សា ៖ ដោយការអធិស្ឋាន សូមជ្រើសរើសជម្រើសសិក្សា ឬជម្រើសដែលនឹងផ្តល់អត្ថប្រយោជន៍ច្រើនបំផុតដល់ថ្នាក់របស់អ្នក ។ សូមប្រាកដថាទុកពេលវេលាឲ្យបានច្រើនសម្រាប់ការហាត់ និងការអនុវត្ត ។

ជម្រើស ក ៖ តើអ្វីទៅជាគោលបំណងរបស់អ្នកផ្សព្វផ្សាយសាសនា ?

សិក្សា

អ្នកដឹកនាំការពិភាក្សា ៖ សូមពិចារណាចែកចាយសាច់រឿងខាងក្រោម ដើម្បីចាប់ផ្តើមការពិភាក្សាអំពីគោលបំណងរបស់អ្នកផ្សព្វផ្សាយសាសនា ។

សូមស្រមៃថាអ្នកមានមិត្តម្នាក់ ដែលមិនមែនជាសមាជិកសាសនាចក្រ ។ ពេលមិត្តភក្តិរបស់អ្នកសួរថា តើថ្ងៃនេះអ្នកមានផែនការអ្វីខ្លះ អ្នកប្រាប់ថា អ្នកនឹងទៅចូលរួមថ្នាក់ការរៀបចំខ្លួនធ្វើជាអ្នកផ្សព្វផ្សាយសាសនា ។ បន្ទាប់មកមិត្តភក្តិរបស់អ្នកសួរថា « តើពួកអ្នកផ្សព្វផ្សាយសាសនាធ្វើអ្វីខ្លះ ? »

អ្នកដឹកនាំការពិភាក្សា ៖ សូមអញ្ជើញសិស្សឲ្យគិត ឬចែកចាយពីអ្វីដែលពួកគេនឹងនិយាយ ។ សូមពន្យល់ថា ខណៈដែលមានវិធីជាច្រើនដើម្បីឆ្លើយសំណួរនេះ គោលបំណងចម្បងរបស់អ្នកផ្សព្វផ្សាយសាសនាមានសង្ខេបនៅខាងដើម ជំពូកទី ១ នៃ ប្រកាសដំណឹងល្អរបស់យើង ។ សូមដាក់បង្ហាញសេចក្តីណែនាំដូចខាងក្រោម ។ សូមទុកពេលឲ្យសិស្សដើម្បីសិក្សា និងពិភាក្សាជាមួយដៃគូ ឬជាក្រុមតូច ។

សូមអាន « គោលបំណងរបស់អ្នក » ( ប្រកាសដំណឹងល្អរបស់យើង ទំព័រ ១ ) និងសេចក្តីថ្លែងការណ៍ខាងក្រោមមកពីអែលឌើរ ឌី ថត គ្រីស្តូហ្វឺសិន ។

សូមកុំព្រងើយកន្ដើយនឹងជំពូកទី ១ នៃ ប្រកាសដំណឹងល្អរបស់យើង និងសំណួររបស់វាថា « តើអ្វីជាគោលបំណងរបស់ខ្ញុំក្នុងនាមជាអ្នកអ្នកផ្សព្វផ្សាយសាសនា ? » វិភាគស៊ីជម្រៅអំពីគោលបំណងនៃការនាំមនុស្សមករកព្រះគ្រីស្ទ តាមរយៈគោលការណ៍ និងពិធីបរិសុទ្ធនៃដំណឹងល្អដែលបានស្ដារឡើងវិញ នោះអ្នកនឹងយល់ថា ការចែកចាយដំណឹងល្អមិនមែនជាកម្មវិធីមួយទេ ។ វាជាបុព្វហេតុមួយ—ជាបុព្វហេតុនៃព្រះវរបិតា ព្រះរាជបុត្រា និងព្រះវិញ្ញាណបរិសុទ្ធ ។ ( ឌី ថត គ្រីស្តូហ្វឺសិន « Why We Need Jesus Christ » Ensign ខែសីហា ឆ្នាំ២០១៤ ទំព័រ ៣៦ )

សូមពិភាក្សាអំពីរបៀបដែលការវិភាគស៊ីជម្រៅលើគោលបំណងនេះអាចមានឥទ្ធិពលដល់ចំណុចដូចខាងក្រោមនេះ ៖

របៀបដែលអ្នករៀបចំសម្រាប់បេសកកម្ម
សកម្មភាពរបស់អ្នកក្នុងនាមជាអ្នកផ្សព្វផ្សាយសាសនា

អ្នកដឹកនាំការពិភាក្សា ៖ ដើម្បីជួយឲ្យសមាជិកក្នុងថ្នាក់យល់កាន់តែច្បាស់អំពីគោលបំណងអ្នកផ្សព្វផ្សាយសាសនា សូមបង្ហាញការណែនាំដូចខាងក្រោម ។ អ្នកអាចចាត់ឲ្យសិស្សពាក់កណ្តាលថ្នាក់ពិភាក្សាអំពីចំណុចទីមួយ និងសិស្សពាក់កណ្តាលថ្នាក់ទៀតពិភាក្សាអំពីចំណុចទីពីរ ។

សូមអាន « សិទ្ធិអំណាចរបស់អ្នកដើម្បីបង្រៀនដំណឹងល្អនៃព្រះយេស៊ូវគ្រីស្ទដែលបានស្តារឡើងវិញ » ( ប្រកាសដំណឹងល្អរបស់យើង ទំព័រ ១–២ ) ។ នៅពេលអ្នកសិក្សា សូមគូសចំណាំ៖

ហេតុផល ដែលយើងអញ្ជើញមនុស្សដទៃឲ្យមករកព្រះយេស៊ូវគ្រីស្ទ ។
តើយើងធ្វើអ្វីខ្លះ ដើម្បីជួយមនុស្សដទៃមករកព្រះយេស៊ូវគ្រីស្ទ ។

អ្នកដឹកនាំការពិភាក្សា ៖ សូមអញ្ជើញសមាជិកក្នុងថ្នាក់ឲ្យចែកចាយពីអ្វីដែលពួកគេបានរកឃើញ ។ អ្នកក៏អាចពិភាក្សាសំណួរខាងក្រោមផងដែរ ៖

តើការធ្វើតាមព្រះអង្គសង្គ្រោះបាននាំមកនូវ « សុភមង្គល សេចក្តីសង្ឃឹម ភាពសុខសាន្ត និងគោលបំណងកាន់តែច្រើនជាងមុន » ( ទំព័រ ២ ) ដល់អ្នក ឬមនុស្សដែលអ្នកស្គាល់យ៉ាងដូចម្តេច ?

អ្នកដឹកនាំការពិភាក្សា ៖ ពិចារណាចែកចាយចម្លើយផ្ទាល់ខ្លួនរបស់អ្នកចំពោះសំណួរមុន ។ អ្នកក៏អាចបង្ហាញវីដេអូ « After Searching So Long for It, Hope Appeared Up on Their Doorstep » ( នៅនាទី ២:៤២ បណ្ណាល័យដំណឹងល្អ ) បានផងដែរ ។ អញ្ជើញសមាជិកក្នុងថ្នាក់ឲ្យរកមើលពីរបៀបដែលដំណឹងល្អរបស់ព្រះយេស៊ូវគ្រីស្ទបានប្រទានពរដល់គូស្វាមីភរិយានៅក្នុងវីដេអូ ។

អនុវត្ត

អ្នកដឹកនាំការពិភាក្សា ៖ ចំណាយពេលដើម្បីជួយសិស្សចងចាំ « គោលបំណងរបស់អ្នក »( ប្រកាសដំណឹងល្អរបស់យើង ទំព័រ ១ ) ។ អ្នកអាចសូត្រវាពីរបីដងរួមគ្នាជាថ្នាក់ បន្ទាប់មកអញ្ជើញសិស្សឲ្យអនុវត្តការសូត្រនេះចេញពីការចងចាំជាមួយដៃគូ ។

ពេលអ្នកបង្រៀនវគ្គសិក្សានេះ សូមយោងទៅគោលបំណងអ្នកផ្សព្វផ្សាសាសនាជាញឹកញាប់ ។ អ្នកអាចពិចារណាសូត្រគោលបំណងនោះជាមួយគ្នានៅពេលចាប់ផ្តើមថ្នាក់នីមួយៗ ។

ដាក់គោលដៅមួយ

អ្នកដឹកនាំការពិភាក្សា ៖សូមទុកពេលឲ្យសមាជិកក្នុងថ្នាក់ជញ្ជឹងគិតពីអ្វីដែលពួកគេបានរៀននៅថ្ងៃនេះ និងដាក់គោលដៅ ។ អ្នកអាចបង្ហាញសេចក្តីណែនាំខាងក្រោមនេះដើម្បីជួយពួកគេ ៖

ដាក់គោលដៅទាក់ទងនឹងអ្វីដែលអ្នកបានសិក្សារួចហើយ ។ សូមប្រើប្រាស់គំនិតខាងក្រោមនេះ ឬគំនិតផ្ទាល់ខ្លួនរបស់អ្នក ។

បន្តហាត់ការទន្ទេញអំពីគោលបំណងរបស់អ្នកផ្សព្វផ្សាយសាសនា ។ សូមចែកចាយវាចេញពីការចងចាំនោះជាមួយនឹងសមាជិកគ្រួសារ ឬមិត្តភក្ដិ ។ សូមគិតពីអ្វីដែលអ្នកបានធ្វើរួចហើយ ឬអាចចាប់ផ្តើមធ្វើអ្វីដែលជាផ្នែកមួយនៃគោលបំណងរបស់អ្នកផ្សព្វផ្សាយសាសនា ។
ចូលទៅគេហទំព័រ « ចែកចាយដំណឹងល្អ » នៅលើគេហទំព័រ ChurchofJesusChrist.org ។ រកមើលគំនិតដែលអាចជួយអ្នកចែកចាយដំណឹងល្អជាមួយអ្នកដទៃ ។
ដោយការអធិស្ឋានសូមគិតពីនរណាម្នាក់ ដែលអ្នកចង់ជួយឲ្យខិតមកជិតព្រះយេស៊ូវគ្រីស្ទ និងទទួលបានបទពិសោធន៍ពរជ័យនៃដំណឹងល្អរបស់ទ្រង់ ។ កំណត់ពីអ្វីដែលអ្នកនឹងធ្វើដើម្បីជួយពួកគេ ( ឧទាហរណ៍ « ខ្ញុំនឹងអធិស្ឋានសម្រាប់បុគ្គលម្នាក់នេះ និងអញ្ជើញពួកគេទៅព្រះវិហារនៅថ្ងៃអាទិត្យនេះ » ) ។

គោលដៅរបស់ខ្ញុំ

ខ្ញុំនឹង … ( សកម្មភាពដែលអ្នកនឹងធ្វើ ) ។
ខ្ញុំនឹងសម្រេចគោលដៅរបស់ខ្ញុំដោយ … ( ផែនការសាមញ្ញមួយ ) ។

អ្នកដឹកនាំការពិភាក្សា ៖ ប្រសិនបើសិស្សមានក្រុមដើម្បីចែកចាយគោលដៅរបស់ពួកគេ សូមទុកពេលវេលាឲ្យពួកគេដើម្បីចែកចាយពីរបៀបដែលពួកគេនឹងគាំទ្រ ឬរំឭកគ្នាទៅវិញទៅមកពីមុនថ្នាក់បន្ទាប់ ។

ជម្រើស ក ៖ តើគោលលទ្ធិនៃព្រះគ្រីស្ទផ្លាស់ប្តូរជីវិតយ៉ាងដូចម្តេច ?

សិក្សា

អ្នកដឹកនាំការពិភាក្សា ៖ សូមពិចារណាសរសេរឃ្លា គោលលទ្ធិនៃព្រះគ្រីស្ទ នៅលើក្តារខៀន ។ សូមអញ្ជើញនរណាម្នាក់ឲ្យអានសេចក្ដីថ្លែងការណ៍ខាងក្រោមមកពីប្រធាន រ័សុល អិម ណិលសុន ៖

គោលលទ្ធិនៃព្រះគ្រីស្ទដ៏បរិសុទ្ធគឺមានអានុភាពណាស់ ។ វាផ្លាស់ប្តូរជីវិតមនុស្សគ្រប់គ្នាដែលយល់អំពីគោលលទ្ធិនេះ ហើយស្វែងរកដើម្បីអនុវត្តតាមគោលលទ្ធិនេះនៅក្នុងជីវិតរបស់គេ ។ ( សេចក្តីពិតដ៏បរិសុទ្ធ គោលលទ្ធិដ៏បរិសុទ្ធ និងវិវរណៈដ៏បរិសុទ្ធ » លីអាហូណា ខែវិច្ឆិកា ឆ្នាំ២០២១ ទំព័រ ៦ )

បើនរណាម្នាក់សួរអ្នកថា តើគោលលទ្ធិរបស់ព្រះគ្រីស្ទគឺជាអ្វី តើអ្នកនឹងឆ្លើយយ៉ាងណា ?

អ្នកដឹកនាំការពិភាក្សា ៖ អញ្ជើញសិស្សឲ្យប្រៀបធៀបចម្លើយរបស់ពួកគេទៅនឹងសំណួរមុន ជាមួយនឹងការពន្យល់នៅក្នុងជំពូកទី ១ នៃ ប្រកាសដំណឹងល្អរបស់យើង ។ ដើម្បីជួយពួកគេធ្វើដូចនេះ សូមចែកចាយសេចក្តីណែនាំខាងក្រោម ៖

ស្វែងរកផ្នែកនៅក្នុងជំពូកទី ១ នៃ ប្រកាសដំណឹងល្អរបស់យើង ដែលមានចំណងជើងថា « ដំណឹងល្អរបស់ព្រះគ្រីស្ទ និងគោលលទ្ធិរបស់ព្រះគ្រីស្ទ » ។ សូមអានកថាខណ្ឌបីដំបូង និងសេចក្តីថ្លែងការណ៍មកពី ហៃរុម ស៊្មីធ ( ទំព័រ ៦ ) ។ សូមរកមើលចម្លើយចំពោះសំណួរទាំងពីរនេះ ៖

តើគោលលទ្ធិរបស់ព្រះគ្រីស្ទគឺជាអ្វី ?
ហេតុអ្វីបានជាបុគ្គលម្នាក់ដែលកំពុងរៀបចំសម្រាប់បេសកកម្មព្យាយាមយល់ និងរស់នៅតាមគោលលទ្ធិរបស់ព្រះគ្រីស្ទ ?

អ្នកដឹកនាំការពិភាក្សា ៖ សូមអញ្ជើញសិស្សឲ្យចែកចាយអ្វីដែលពួកគេបានរៀនមកពី ប្រកាសដំណឹងល្អរបស់យើង ដែលឆ្លើយសំណួរពីមុន ។

សកម្មភាពសិក្សាខាងក្រោមអាចជួយសមាជិកក្នុងថ្នាក់ឲ្យកាន់តែយល់ដឹងអំពីទិដ្ឋភាពផ្សេងៗគ្នានៃគោលលទ្ធិរបស់ព្រះគ្រីស្ទ ។ ប្រសិនបើមានថ្នាក់ធំល្មមគ្រប់គ្រាន់ សូមបែងចែកពួកគេជាប្រាំក្រុម ។ សមាជិកនីមួយៗនៃក្រុមនេះ អាចសិក្សាផ្នែកផ្សេងគ្នានៃគោលលទ្ធិរបស់ព្រះគ្រីស្ទ

ស្វែងយល់បន្ថែមទៀតអំពីគោលលទ្ធិរបស់ព្រះគ្រីស្ទ ដោយសិក្សាផ្នែកខាងក្រោមចេញពីជំពូកទី ១ នៃ ប្រកាសដំណឹងល្អរបស់យើង ( ទំព័រ ៧–៩ ) ៖

« សេចក្ដីជំនឿលើព្រះយេស៊ូវគ្រីស្ទ »
« ការប្រែចិត្ត »
« ពិធីបុណ្យជ្រមុជទឹក »
« ពិធីបញ្ជាក់ និងអំណោយទាននៃព្រះវិញ្ញាណបរិសុទ្ធ »
« ការកាន់ខ្ជាប់ដរាបដល់ចុងបំផុត » ( សូមសិក្សាផងដែរនៅក្នុង នីហ្វៃទី ២ ៣១:១៩–២០ ) ។

នៅពេលអ្នកសិក្សា សូមសង្កត់ធ្ងន់លើពាក្យ និងឃ្លាសំខាន់ៗ ។ សូមពិចារណាអានបទគម្ពីរមួយចំនួនដែលជាប់ទាក់ទងនឹងផ្នែកនេះ ។ សូមរៀបចំខ្លួនចែកចាយអ្វីដែលអ្នកបានរៀនសូត្រ ។

អនុវត្ត

អ្នកដឹកនាំការពិភាក្សា ៖ សូមអញ្ជើញសមាជិកក្នុងថ្នាក់ពន្យល់ដល់ក្រុមរបស់ពួកគេ នូវអ្វីដែលពួកគេបានរៀននៅក្នុងសកម្មភាពមុនៗ ។ សូមដាក់បង្ហាញសេចក្តីណែនាំដូចខាងក្រោម ៖

សង្ខេបផ្នែកគោលលទ្ធិរបស់ព្រះគ្រីស្ទដែលអ្នកបានសិក្សា ។ សូមពិចារណារួមបញ្ចូលចំណុចខាងក្រោមនៅក្នុងសេចក្តីសង្ខេបរបស់អ្នក ៖

សេចក្តីសង្ខេបខ្លីៗពីអ្វីដែលអ្នកបានសិក្សា
របៀបដែលផ្នែកនេះនៃគោលលទ្ធិជួយមនុស្សមករកព្រះគ្រីស្ទ និងទទួលបានព្រះចេស្តាសង្គ្រោះរបស់ទ្រង់
របៀបដែលអ្នក ឬនរណាម្នាក់ដែលអ្នកស្គាល់ត្រូវបានប្រទានពរ ដោយការធ្វើតាមផ្នែកនេះនៃគោលលទ្ធិរបស់ព្រះគ្រីស្ទ

ដាក់គោលដៅមួយ

អ្នកដឹកនាំការពិភាក្សា ៖ សូមទុកពេលដល់សមាជិកក្នុងថ្នាក់ដើម្បីជញ្ជឺងគិតពីអ្វី ដែលពួកគេបានរៀននៅថ្ងៃនេះ និងដាក់គោលដៅ ។ អ្នកអាចបង្ហាញសេចក្តីណែនាំខាងក្រោមនេះដើម្បីជួយពួកគេ ៖

សិក្សា នីហ្វៃទី ២ ៣១ ដោយរកមើលការបង្រៀនរបស់នីហ្វៃអំពីគោលលទ្ធិរបស់ព្រះគ្រីស្ទ ។
ស្វែងរកធាតុមួយនៃគោលលទ្ធិរបស់ព្រះគ្រីស្ទ ដែលអ្នកចង់អនុវត្តកាន់តែពេញលេញនៅក្នុងជីវិតរបស់អ្នក ។ ពិចារណាពីរបៀបដែលអ្នកនឹងធ្វើការណ៍នោះ ។

គោលដៅរបស់ខ្ញុំ

ខ្ញុំនឹង … ( សកម្មភាពដែលអ្នកនឹងធ្វើ ) ។
ខ្ញុំនឹងសម្រេចគោលដៅរបស់ខ្ញុំដោយ … ( ផែនការសាមញ្ញមួយ ) ។

អ្នកដឹកនាំការពិភាក្សា ៖ ប្រសិនបើសិស្សមានក្រុមដើម្បីចែកចាយគោលដៅរបស់ពួកគេ សូមទុកពេលវេលាឲ្យពួកគេចែកចាយពីរបៀបដែលពួកគេនឹងគាំទ្រ ឬរំឭកគ្នាទៅវិញទៅមកពីមុនថ្នាក់បន្ទាប់ ។

ជម្រើស គ ៖ តើអ្វីដែលធ្វើឲ្យអ្នកផ្សព្វផ្សាយសាសនាជោគជ័យ ?

សិក្សា

អ្នកដឹកនាំការពិភាក្សា ៖ សូមពិចារណាសរសេរសំណួរខាងក្រោមនេះនៅលើក្តារខៀនរួមជាមួយនឹងចម្លើយរបស់សិស្ស ៖

តើយើងអាចដឹងថាពួកគេជាអ្នកផ្សព្វផ្សាយសាសនាដែលជោគជ័យដោយរបៀបណា ?

អ្នកដឹកនាំការពិភាក្សា ៖ សកម្មភាពសិក្សាខាងក្រោមអាចជួយអ្នកចូលរួមយល់កាន់តែច្បាស់ ពីរបៀបធ្វើជាអ្នកផ្សព្វផ្សាយសាសនាប្រកបដោយប្រសិទ្ធភាព ៖

សូមអានកថាខណ្ឌប្រាំបួនដំបូងនៃ « អ្នកផ្សព្វផ្សាយដ៏ជោគជ័យ » នៅក្នុងជំពូកទី ១ នៃ ប្រកាសដំណឹងល្អរបស់យើង ( ទំព័រ ១៣ ) ។ សូមផាត់ពណ៌ ឬគូសសម្គាល់លក្ខណៈនៃពួកអ្នកផ្សព្វផ្សាយសាសនាដ៏ជោគជ័យនោះ ។ តាមរបៀបផ្សេងទៀត ( ដូចជាផាត់ពណ៌ផ្សេង ឬគូសបន្ទាត់ពីក្រោម ) សូមកំណត់ចំណាំអ្វីដែលមិនសំខាន់ចំពោះភាពជោគជ័យ ។
មើលលើចំណុចទាំងឡាយនៅផ្នែកខាងលើនៃ ទំព័រ ១៤ ។ សូមជ្រើសយកខគម្ពីរយោងពីរ ឬច្រើនដើម្បីអាន ដោយរកមើលអ្វីដែលពួកគេបង្រៀនអំពីការក្លាយជាអ្នកផ្សព្វផ្សាយសាសនាដ៏ជោគជ័យម្នាក់ ។

អនុវត្ត

អ្នកដឹកនាំការពិភាក្សា ៖ សូមអញ្ជើញសមាជិកក្នុងថ្នាក់ឲ្យប្រើអ្វីដែលពួកគេបានរៀននៅក្នុងសកម្មភាពមុនៗ នៅពេលពួកគេឆ្លើយតបទៅនឹងសាច់រឿងខាងក្រោម ។ សូមពិចារណាចែកសិស្សជាគូៗ ហើយអញ្ជើញពួកគេឲ្យសម្តែងតាមសាច់រឿង ។

ស្រមៃថា អ្នកទទួលបានសារមួយមកពីមិត្តម្នាក់ដែលកំពុងបម្រើបេសកកម្មពេញម៉ោង ។ ពួកគេហាក់ដូចជាមានអារម្មណ៍ថា ពួកគេកំពុងបរាជ័យក្នុងនាមជាអ្នកផ្សព្វផ្សាយសាសនា ព្រោះគ្មាននរណាម្នាក់ដែលពួកគេបានបង្រៀនទទួលបុណ្យជ្រមុជទឹក ហើយពួកគេមិនដែលបានកាន់តំណែងជាអ្នកដឹកនាំទេ ។ ពួកគេកំពុងចាប់ផ្តើមមានអារម្មណ៍ថា ពួកគេកំពុងខ្ជះខ្ជាយពេលវេលារបស់ពួកគេ ។

ផ្អែកលើអ្វីដែលអ្នកបានរៀនមកពី « អ្នកផ្សព្វផ្សាយដ៏ជោគជ័យ » ក្នុងជំពូកទី ១ នៃ ប្រកាសដំណឹងល្អរបស់យើង ( ទំព័រ ១៣–១៤ ) សូមជួយមិត្តភក្តិរបស់អ្នកឲ្យគិតខុសពីនេះអំពីអត្ថន័យនៃការក្លាយជាអ្នកផ្សព្វផ្សាយសាសនាដ៏ជោគជ័យ ។
ចែកចាយពីរបៀបដែលការផ្តោតលើព្រះយេស៊ូវគ្រីស្ទ អាចផ្លាស់ប្តូររបៀបដែលមិត្តភក្តិរបស់អ្នកមានអារម្មណ៍អំពីការបម្រើបេសកកម្មរបស់ពួកគេ ។

អ្នកដឹកនាំការពិភាក្សា ៖ សម្រាប់វិធីមួយទៀតដើម្បីជួយសិស្សស្វែងរក និងពន្យល់ពីលក្ខណៈនៃអ្នកផ្សព្វផ្សាយសាសនាដ៏ជោគជ័យនោះ សូមពិចារណាបង្ហាញវីដេអូ « Missionaries of The Church of Jesus Christ of Latter-day Saints » ( នៅនាទី ៤:៥៦ នៅលើគេហទំព័រ ChurchofJesusChrist.org ) ។ សមាជិកក្នុងថ្នាក់អាចពិភាក្សាអំពីរបៀបដែលពួកអ្នកផ្សព្វផ្សាយសាសនានៅក្នុងវីដេអូនេះបានពិពណ៌នា ឬបង្ហាញពីគោលការណ៍នៃការបម្រើបេសកកម្មប្រកបដោយជោគជ័យ ។

ដាក់គោលដៅមួយ

អ្នកដឹកនាំការពិភាក្សា ៖ សូមទុកពេលឲ្យសមាជិកក្នុងថ្នាក់ជញ្ជឹងគិតពីអ្វីដែលពួកគេបានរៀននៅថ្ងៃនេះ និងដាក់គោលដៅ ។ អ្នកអាចបង្ហាញសេចក្តីណែនាំខាងក្រោមនេះដើម្បីជួយពួកគេ ៖

សូមគិតអំពីនរណាម្នាក់ដែលអ្នកស្គាល់កំពុងបម្រើបេសកកម្ម ។ សូមសរសេរអ៊ីមែល ឬសំបុត្រមួយ ដែលសង្ខេបពីអ្វីដែលអ្នកបានរៀននៅថ្ងៃនេះ អំពីការក្លាយជាអ្នកផ្សព្វផ្សាយសាសនាដ៏ជោគជ័យម្នាក់ ។ អ្នកក៏អាចសួរដល់អ្នកផ្សព្វផ្សាយសាសនាផងដែរថា តើអ្វីខ្លះដែលធ្វើឲ្យពួកគេជាអ្នកផ្សព្វផ្សាយសាសនាដ៏ជោគជ័យ ។
សូមគិតពីអ្វីដែលអ្នកអាចធ្វើបាននៅពេលឥឡូវនេះ ដើម្បីរៀបចំខ្លួនឲ្យក្លាយជាអ្នកផ្សព្វផ្សាយសាសនាដ៏ជោគជ័យម្នាក់នាពេលអនាគត ។

គោលដៅរបស់ខ្ញុំ

ខ្ញុំនឹង … ( សកម្មភាពដែលអ្នកនឹងធ្វើ ) ។
ខ្ញុំនឹងសម្រេចគោលដៅរបស់ខ្ញុំដោយ … ( ផែនការសាមញ្ញមួយ ) ។

ពេលក្រោយ

អ្នកដឹកនាំការពិភាក្សា ៖ ប្រសិនបើអ្នកត្រៀមខ្លួនរួចរាល់ដើម្បីបង្រៀន មេរៀនទី ៤ នៅពេលក្រោយ សូមពិចារណាអញ្ជើញសមាជិកក្នុងថ្នាក់ឲ្យសិក្សា ជំពូកទី ២ នៃ ប្រកាសដំណឹងល្អរបស់យើង ក្នុងការរៀបចំ ។ អ្នកក៏អាចផ្ញើការរំឭកឲ្យពួកគេផងដែរ ។