O Se Meaalofa o Vaaiga i Tamaiti Aoga i Papua Niu Kini

O tamaiti e tauivi e vaai i upu i se tusifaitau o le a tauivi foi e aoao. Ae faafetai i se foai mai Le Ekalesia a Iesu Keriso o le Au Paia o Aso e Gata Ai, e oo i le lima afe tamaiti aoga i Papua Niu Kini o le a mauaina ni matatioata faitautusi e ala i le Faalapotopotoga a le Laila.

O le Faalapotopotoga a le Laila e faafetauia matatioata i tamaiti aoga e i ai toatuga o le vaai e faigata ai ona faitau. O matatioata e saunia mai e se faalapotopotoga e le faapisinisi a le Charity Vision, lea e foa‘ia sapalai mo le tausiga o mata i le 35 atunuu.

O Le Ekalesia a Iesu Keriso o le Au Paia o Aso e Gata Ai, e ala i lana matagaluega o Auaunaga Alofa i Tagata, o loo taulimaina le tau o matatioata ma lo latou tufatufaga. O le fuafuaga mo se taimi umi, e mo tamaiti i Papua Niu Kini atoa ia maua le siaki fuaina o mata, ma se fuafaatatau e 2500 i le 5000 tamaiti aoga e tatau ona maua a latou mata faitautusi muamua i le tausaga muamua.

Sa amatalia lenei polokalama i le aso 9 o Oketopa 2025, i le Aoga Maualuga a Gordon i le laumua o Port Moresby, ma sa faasalalauina e le aufaasalalau o talafou i le lotoifale. 

I le taimi o lea gaoioiga, sa mafai e tamaiti aoga ona siaki o latou mata, ma afai na tatau ai, sa maua matatioata na muai tuufaatasia mo tulaga patino o o latou mata.

I le silia ma le ono masina na sosoo ai, na tuuina atu ai foi e le Ekalesia ia masini feaveai e siaki ai mata i nofoaga mamao i le salafa o le atunuu.

Sa fesoasoani le Minisita o le Soifua Maloloina o Papua Niu Kini, lana Afioga ia Elias Kapavore,—i le tilivaina o matatioata i tamaiti aoga i le Aoga Maualuga a Gordon—ma faafetai ai i le Ekalesia a Iesu Keriso mo lana lagolago.

“E le lava a‘u upu i le uiga o lenei foai mo o matou tupulaga talavou i Papua Niu Kini. E ala i lenei galuega o le a mafai e se augatupulaga atoa o tamaiti aoga ona taunuu i le atoaga o lo latou gafatia mo le penefiti ma faamanuiaga o Papua Niu Kini uma. E tuuina atu la matou faafetai o‘oo‘o i Le Ekalesia a Iesu Keriso o le Au Paia o Aso e Gata Ai mo lo latou sao limafoai ua tino mai ai lenei polokalama.”

O Alexander Quiocho o se tasi o tamaiti aoga ua manuia mai lenei polokalama. Toe tasi le tausaga ona faauu lea mai le Aoga Maualuga a Gordon, ae i lona olaga atoa sa tauivi ai o ia e faitau mai laupapa i luma o le vasega. Fai mai a ia, sa sili ona faigata lana vaaiga latalata a o laitiiti o ia, ae fai mai ona faiaoga e le o faalogo o ia.

I le mauaina ai o ana matatioata, na ia fai mai, “Ua ou fiafia ua tupu lenei mea i tupulaga talavou i vaega uma o Papua Niu Kini. O le a fatuina ai se avanoa mo tagata uma e fiafia ai e aoao, ma e taua tele lena mea.”