Ioane: Le “Soo Ua Alofaina e Iesu”

Saunia e Eric D. Snider

O Mekasini a le Ekalesia

Sa faaauau pea ona a’oa’o Ioane le Talifaaaliga e uiga ia Keriso ina ua mavae Lona Toetu.

O Ioane o se tasi o Aposetolo e Toasefululua a le Faaola. O i laua ma lona uso o Iakopo ma lo la uso a Aposetolo o Peteru sa o se vaega o le lio i totonu a le Alii, sa i ai faatasi ma Ia e tusa lava pe sa le i ai le isi toaiva. E ui lava i le latalata atu o lenei toatolu i le Faaola, ae o le sootaga a Ioane ma Iesu e foliga mai e tulaga ese.

Ua na o ia lava o Aposetolo na tusifaamaumauina na molimauina le Faasatauroga. E silia ma le 90 pasene o lana Evagelia e aofia ai anomea e le o maua i le isi toatolu (e aofia ai le tusi na tusia e Mataio, o se uso a Aposetolo). O Ioane lea sa nofo i autafa ma faalagolago atu lona ulu i luga o Iesu i le taimi o le Tausamaaga Mulimuli (tagai i le Ioane 13:23). O Ioane lea na tofia e le Faaola e tausia Lona tina pe a aluese o Ia (tagai i le Ioane 19:26–27).

Ma o Ioane na faaigoaina o ia lava o le “soo ua alofaina e Iesu” (Ioane 21:7). Ua taumanatunatu tagata kerisiano mo le tele o seneturi i le uiga o le tala lea a Ioane; o le mea moni, e alofa le Alii i tagata uma. Fai mai Elder Karl D. Hirst o le Au Fitugafulu, “Ou te mafaufau o lenei mea ona sa lagona e Ioane le alofagia atoatoa e Iesu.” Sa ia faatusatusaina i le ta’ua e Nifae o “lo’u Iesu” (2 Nifae 33:6; faaopoopo le faamamafa)—o se sootaga loloto ma patino e lagona ai le tulaga ese. Mai lena vaaiga, a o tatou aoao e uiga i le Alii ma ola latalata atili atu ia te Ia, e mafai ona tatou tauivi uma e avea ma “soo ua alofaina e Iesu.”

Alofa Sili Atu

O le alofa o se autu e fai soo i tusitusiga a Ioane. I le gagana Peretania, o le upu alofa e 57 taimi o loo faaali mai ai i le Evagelia a Ioane. E sili atu lena nai lo le tuufaatasiga o isi Evagelia e tolu, i se vaega ona ua sii mai e Ioane le tele o aoaoga a le Faaola e uiga i le alofa nai lo isi. E 48 taimi o loo faaali mai ai le alofa i fuaiupu e 105 o le Tusi Muamua a Ioane. E ese le talafeagai o le “soo ua alofaina e Iesu” o le a faaaogaina le alofa o se autu tutotonu.

Na amata le tulaga o le avea o Ioane ma soo a o lei feiloai o ia ia Iesu. E foliga mai o ia o se soo o Ioane le Papatiso ma sa talitonu i le molimau a le fai Papatisoga ia Iesu (tagai i le Ioane 1:35–40). O Ioane le Aposetolo na mulimuli ane avea o Ioane le Talifaaaliga, na mua’i faauuina e tusi e uiga i le iuga o le lalolagi (tagai i le 1 Nifae 14:20–27). Sa faaalia atu ia te ia mea e toalaiti isi na vaai i ai ma faaauau pea, faatasi ai ma soo sa Nifae e toatolu (tagai i le 3 Nifae 28:4–10), e auauna atu i tagata mo le toeitiiti atoa le 20 seneturi (ma o loo faitau pea). O le malamalama ma le poto masani faaleagaga o Ioane atonu ua toetoe lava a le mafaatusaina.

Ae o lena malamalama sa oo mai i le na o le auaua’i mai. Ina ua muamua atu Ioane ia Peteru i le tuugamau avanoa i le taeao o le Eseta, sa le’i ulu i ai o ia ae “tuu atu i le Aposetolo sinia, o lē na muamua ulu atu i le tuugamau.” O Ioane, i lana saunoaga faaletagata lona tolu, na ia ta’ua ana le oo mai i le taimi lea e le “talitonu” i laua ma Peteru i le Toetu: “Aua o ona po ia e lei iloa ai e i latou le tusi, ia toe tu o ia nai e ua oti” (Ioane 20:8–9).

Afai o Ioane—o se tasi o uo mamae a le Alii ma faufautua sili ona faatuatuaina, o le “soo ua alofaina e Iesu”—sa lei malamalama atoatoa i le misiona a Iesu seia oo ina ia vaai i le tuugamau avanoa, e tatau ona tatou onosai ia i tatou lava pe a tatou le malamalama i se mea. O le soifuaga o Ioane ma lana misiona ua faamanatu mai ai ia i tatou e oo lava i soo—aemaise lava mo soo—o le faagasologa o le iloaina o le Faaola e faifai pea.