“Faamaloloina o Loto I Augatupulaga: Folafolaga o le Galuega o Talafaasolopito o Aiga,” Liahona, Fep. 2026.
Faamaloloina o Loto I Augatupulaga: Folafolaga o le Galuega o Talafaasolopito o Aiga
O le mana filemu o le aoao e uiga i tuaa e mafai ona suia ai lou olaga. O laasaga nei e tolu o le a fesoasoani.
Ina ua maliu lo’u tama, sa siomia a’u e le faavauvau mo le tele o vaiaso ma sa toe foi faafuasei mai, mai lea taimi i lea taimi mo ni masina. I lena vaitaimi o le faanoanoa, na avea ai talafaasolopito o aiga ma se punavai faate’ia o le faamafanafanaga.
Pau lava le mea na ou faia o le utaina i luga o ata ma manatuaga pupu’u i le FamilySearch.org. O le tele, sa mo tagata e ese mai lo’u tama. O lenei galuega na aumaia ai le faamafanafanaga, o se vaaiga e faavavau, ma se molimau malosi atu i le fuafuaga o le faaolataga a le Tama Faalelagi ma le Togiola a Iesu Keriso. O talafaasolopito o aiga na aumaia ia te a’u le malosi ma le faamalologa.
Ou te fia faasoa atu ni manatu se tolu e maua ai le toomaga ma le maufetuunai e ala i galuega o talafaasolopito o aiga.
1. Iloa Folafolaga o le Galuega o Talafaasolopito o Aiga
Aisea tatou te faia ai sailiiliga o talafaasolopito o aiga? Na aoao mai Peresitene Dallin H. Oaks, Fesoasoani Muamua i le Au Peresitene Sili, “E finagalo lo tatou Tama Faalelagi i Ana fanau uma ia toe foi atu i le malo selesitila, lea o loo afio ai le Atua ma lo tatou Faaola.” Tatou te fesoasoani ia tupu lenei mea e ala i le aoina mai o igoa o aiga ma le faatinoina o sauniga o le malumalu mo ō tatou tuaa.
“Pe a faatonuina i tatou e le Atua e fai se mea se tasi, e masani lava ona tele ni Ona faamoemoega i le mafaufau,” na matauina ai e Elder Dale G. Renlund o le Korama a Aposetolo e Toasefululua. “O talafaasolopito o aiga ma galuega o le malumalu e le mo na o tagata ua maliliu ae ua faamanuiaina ai foi ē o loo soifua.” E tele folafolaga e fesootai ma le faia o galuega o talafaasolopito o aiga e aafia ai o tatou olaga faaletino. O nei mea e aofia ai se molimau faateleina ia Iesu Keriso, mana sili atu e tetee atu ai i faaosoosoga, faamalologa mo oe lava ma lou aiga, ma le tele o isi (tagai i le pa i autafa o loo avatu faatasi ai “Faamanuiaga Faamalolo na Folafola mai e Perofeta ma Aposetolo”).
Afai e te manaomia ni vavega po o ni faamanuiaga, e mafai ona fesoasoani talafaasolopito o aiga ia te oe. O Sam ma Betsy (ua suia igoa) na oo i se vavega faapena i lo la aiga. Sa i ai se la tama sa valavala mai ia i laua mo le tele o tausaga. I le musuia ai i le lauga “Galuega o Talafaasolopito o Aiga ma le Malumalu: Faamauga ma le Faamalologa” na saunia e Elder Renlund, sa la filifili ai e tuuto atu le taimi i Aso Sa taitasi e galulue ai i talafaasolopito o aiga. Ina ua mavae le tele o masina, sa toe faatasia i laua ma le la tama ma ua toefausia le latou mafutaga. Sa faamautu atu e le Agaga ia i laua o lenei vavega na oo mai ona sa la mulimuli i le valaaulia a Elder Renlund e fai le galuega o talafaasolopito o aiga.
O lo la aafiaga o se tasi o le tele o loo molimau atu i vavega filemu e fesootai ma galuega o le malumalu ma talafaasolopito o aiga. O lou aafiaga atonu e le pei o i laua. O le Alii, i Lona poto, o le a faamanuiaina oe i le ala sa’o i le taimi sa’o.
Ata pu‘e mai le Getty Images
2. Fai Ni Laasaga Laiti mo Taui Tetele
O folafolaga o talafaasolopito o aiga e le manaomia ai ni tomai maualuga atu po o ni itula uumi o galuega. Amata faigofie ma faufau mai ai iina. Talanoa e uiga i olaga o ou matua po o matua matutua i le taumafataga o le afiafi. Faitau manatuaga o tuaa i luga o le FamilySearch.org po o le polokalama i telefoni feaveai. Fatu se tusi o manatuaga e uiga i lau fanau, lou olaga, po o olaga o isi.
O le aoao e uiga i tagata o le aiga e mafai ona suia ai oe. Talu ai nei sa ou faitau ai i tala mai olaga o tuaa o lo’u toalua ma o latou tauiviga e ola a o eliina le masima i Iuta tutotonu. Sa ou faaaluina le tele o itula i o latou talafaasolopito o le olaga. Sa ou iloaina sa sili atu nei vaega nai lo na o ni tala faafiafiaina o olaga o tuaa. O ni lesona i le tulaga o le maufetuuna’i. O lo latou malosi i le feagai ai ma faigata na faaosofia ai se vaega loloto i totonu ia te a’u, ma faatumulia ai a’u i le lotofaafetai mo tofotofoga sa ou feagai ai i lo’u lava olaga. O lo latou faatuatua lē maluelue na faamalosia ai la’u molimau. O a latou tala na faamanatu mai ai ia te a’u o i tatou uma o se vaega o se mea e faavavau, o se mea e sili atu nai lo i tatou lava.
Na aoao mai Elder Neil L. Andersen o le Korama a Aposetolo e Toasefululua: “O lenei [malaga faaletino] ua na o se vaega o se malaga e faavavau, ma o i latou sa nonofo faatasi ma i tatou muamua, o loo latou ola pea. Ma o i latou na soifua i seneturi ua mavae, o loo latou ola pea. Ma o i latou o e mulimuli mai ia i tatou, o le a latou ola.”
3. Aoao Atili i le RootsTech
A o tuputupu a’e la’u fanau ma amata o latou lava aiga, sa masani ona ou mafaufau pe faapefea ona faasoa atu lo’u fiafia i talafaasolopito o aiga—aemaise lava ia i latou e foliga mai e lē fiafia i ai. Sa ou manao ia latou lagonaina le maufetuuna’i, malosi, ma le olioli ua tuuina mai e talafaasolopito o aiga ia te a’u i le aluga o tausaga. I se tasi tausaga, sa ou auai ai i le RootsTech ma faalogo i le fasifuaitau “tuu atu o aano i ivi” o o matou tuaa. O le ki lea na ou manaomia. O lena tausaga sa ou auai ai i vasega lea sa ou aoaoina ai ni fautuaga ma ni metotia mo le feiloai atu i tagata o lo’u aiga i lo latou tulaga fiafia.
E tuuina mai e leRootstech.org le faitau selau o vitio o aoaoga mauafua. O vasega e faasolo mai lava i le amataina o mataupu faavae e oo atu i sailiiliga maualuga atu. E mafai ona e matamata i vasega e faatatau i nofoaga patino o le faataatiaga faafaafanua, tusia o se talafaasolopito patino, sailiiliga DNA, ma le tele o isi mea. Faaopoopo sauniga talu ai i lau faatulagaga ma matamata i ai i soo se taimi.
A o e auai i galuega o malumalu ma talafaasolopito o aiga, o le a e iloa ai e sili atu ona faamanuiaina nai lo ou tuaa. E mafai ona e maua ai le mafanafana i taimi o le faanoanoa ma le atuatuvale, faamalosia ai lou aiga, ma faalolotoina ai lau molimau i le Tama Faalelagi ma Iesu Keriso.