Mai le AM Faalevaiaso
I Lenei Eseta, Tu ma Mafaufau i Lili
A o tatou sailia Keriso, o le a tatou iloa ai o Lona filemu e mafai ona fai mo tatou i taimi uma.
Ata pue mai le Adobe Stock
I Ona aso mulimuli i le olaga nei, sa faamautinoa atu ai e Iesu Keriso i Ona soo, "Ou te tuuina atu ia te outou le manuia, o lo’u manuia ou te avatu ai ia te outou; ou te le avatu ia te outou faapei ona avatu e le lalolagi" (Ioane 14:27).
I le taimi o le Eseta, pe a tatou faamanatuina Lona manumalo faaiu i le agasala ma le oti—Lona Toetu—o lenei folafolaga e faapitoa le mamana. Ae e ui lava o loo avanoa pea le filemu o le Faaola ia i tatou, atonu e i ai taimi tatou te tauivi ai e lagonaina.
E mafai faapefea la ona tatou maua pea Lona filemu, faamoemoe, ma le olioli faatasi ma i tatou?
Ua ou mauaina e ala i le sailia malosi o Ia.
Saili le Filemu e ala ia Keriso
O se tasi o auala ou te sailia ai le filemu e ala ia Keriso o le tusia lea o solo. Ou te ola ma manava i le fatuga o solo, o lea la mo le lua tausaga ua mavae, ua ou mulimuli ai i galuega a le Faaola e ala i le tusia o se solo mo aso taitasi o le Vaiaso Paia.
O le tausaga muamua, sa musuia a’u e tusi ni solo e faaali atu ai lo’u alofa ma le lotofaafetai i le Faaola ma aoao atili ai e uiga i Ana galuega. Sa aoga lenei mea, ae sa le o se mea na patino ia te a’u lava. Sa tele ina ou tusia e pei o loo ou faamatalaina Ana galuega.
O le tausaga na sosoo ai, sa ou tusia ai ni solo e saili ai le filemu i le Faaola ma ona sa ou manao e mulimuli i le fautuaga a le Au Peresitene Sili ina ia fai le Eseta ia sili atu le taua i lo’u olaga. Sa faalolotoina moni lava lo’u sootaga ia Keriso ona sa ou sailia o Ia. Sa ou tusia mai le vaaiga a i latou o e na molimauina Ana galuega ma aoaoga. Sa matuai faagaeetia lava ma matuai patino lava.
O lona uiga o le faaupuina pe faape’i le olaga mo se tasi na leai se mea e foai atu ae o o latou lava tagata. Po o se tasi e lei mafatia i se ma’i faaletino po o se faatagataotauaina, ae sa sauaina faaleagaga ma saisaitia. Po o se tasi e lei faaalia moni mai lava le alofa ma sa taia i le tautinoga a Iesu e uiga i le ituaiga alofa silisili.
O le mafaufau loloto i nei mea uma ma le tele o mea na fesoasoani ia te a’u ia sili atu ai le lotofaafetai mo, ma le maofa faamaualalo i le soifuaga matagofie ma atoatoa o le Faaola.
Ola i Auiliiliga
A o ou mafaufau i auiliiliga o faatinoga a le Faaola, sa ou iloa ai sa latalata tele mai o Ia ia te au. Ou te iloa ou te lei i ai iina e faalogo i upu "Lasalo e, ina sau ia i fafo" (Ioane 11:43), ou te lei vaai foi ia te Ia o tutulu, ae a ou mafaufau loloto ma tusitusi, sa ou lagonaina e pei sa ou i ai i le tuugamau i fafo atu o Petania.
I nisi itu o le lalolagi, tatou te faaaoga ai le faaupuga "tu ma sogisogi i rosa" e faamanatu atu ai i tagata e faifai lemu pe a latou popole tele ma atuatuvale e vaai i vaega lelei o le olaga. Ae faapefea pe afai, nai lo o lena, tatou te tutu ma "mafaufau i lili" (Mataio 6:28), e pei ona aoao mai Keriso? Ae faapefea pe afai tatou te sailia ma le loto i ai le fiafia, faamalieina, ma le filemu ua Ia ofo mai?
Ou te manatu o le ki o le tuuina mai ia i tatou lava o le taimi e ola ai i auiliiliga o Ana galuega alofa ma afioga. Vaai faalemafaufau e faapea, o loo e i ai i Ierusalema anamua, o tali atu i aoaoga a Keriso. Mo se faataitaiga, taumafai e vaai faalemafaufau o loo e latalata atu i le satauro ma faalogo atu i le Faaola o ole atu i le Tama Faalelagi e faamagalo i latou o e sa faasatauroina o Ia (tagai i le Luka 23:34). O le a faapefea ona e aafia i lena mea?
Po o lenei: Ua faatoa folafola mai e le Faaola ia te oe le filemu e le pei o soo se mea na e lagonaina (tagai i le Ioane 14:27). Ae sa e manatu sa tatau ona aumaia e le Mesia le filemu e ala i le faasaolotoina o Isaraelu mai tagata Roma, ae e lei faia e Ia lena mea. O le a la le ituaiga filemu sa Ia aoao mai ai?
Po o lenei: Sa e mulimuli ia Keriso mo le tele o tausaga. Ae sa maliu o Ia. Sa e alu e tapena Lona tino ma maua ai na o se tuugamau avanoa. O le a sou lagona? (Tagai i le Ioane 20:1–13.)
O le a la se mea na ou faia e maua ai le filemu ia Iesu Keriso? I la’u lava ala, sa ou mafaufau ai i lili. Sa ou faaaluina le taimi e saili ai mo Lona alofa i tala o Lona soifuaga, ma sa ou mauaina. O le vaega aupito sili ona ofoofogia o le, sa i ai o Ia iina ma faatalitali mai, o Ona aao sa faaloaloa mai.
Afai tatou te mafaufau i lili, o le a tatou iloa ai o le filemu ia te Ia e le fai mo tatou i na o taimi e uma ai puapuaga. E mafai ona fai mo tatou i taimi uma.
Tau ina ia i ai le filemu ia Keriso mo outou i lenei Eseta, e pei ona sa i ai mo a’u.