O le Ala Fiafia o Feagaiga

Saunia e Elder Patrick Kearon

O Le Korama a Aposetolo e Toasefululua

O le ofoofogia ma le maoae o tagata o le aiga ua fusia faatasi i le afioaga o le Tama ma le Alo e aumaia ai le maofa ma le olioli sili atu i lo’u agaga ma faatumulia ai a’u i se agaga o le lotofaafetai.

Elder Patrick Kearon ma lona faletua, o Jennifer

Ina ua tuua e Isaraelu ma Elisapeta Haven Barlow ia Navu, Ilinoi, mo le Vanu o Sate Leki i le 1848, sa la tuua se pepe tama sa tanumia i se fanuatanu laitiiti i Navu. O James Nathaniel Barlow, le la tama muamua, na maliu ae lei leva ona fanau mai ia Me 1841.

Faatasi ai ma lo latou malaga ese atu mo le Vanu o Sate Leki, atonu sa lei faamoemoeina lava e Isaraelu ma Elisapeta e toe pulatoa atu i le tuugamau o lo la atalii. Ae ina ua valaauina Isaraelu i se misiona i Egelani i ni nai tausaga mulimuli ane, sa ia ui atu i Navu a o malaga o ia i sasae. I le talosaga a Elisapeta, sa tu ai o ia e sue le tuugamau o le la tama ina ia liutofaga atu i le fanuatanu autu, i sasae o le taulaga.

Ina ua mavae se aso o sailiga le manuia, sa sailia e Isaraelu le fesoasoani mai le teufanua i le lotoifale. O le aso na sosoo ai, na latou maua ai le tuugamau, sa i autafa o le tausoga o Iakopo o Maria. O le mea e faanoanoa ai, sa pala ma malepelepe ia pusa maliu. I se tusi i lona toalua, sa tusia ai e Isaraelu, “O lea na ou liliu ese ai ma faia le faaiuga o le a ou tuua i la’ua iina seia oo i le lumanai.”

Sa le’i mamao lana savali ese mai le tuugamau ae ia faalogoina se leo. I le toe tomanatu ai i le aafiaga, sa ia tusia ai, “Sa le’i manino, ae sa matua tumatila lava i lo’u mafaufau sa le mafai ona ou teenaina: ‘Tama, aua e te tuua a’u iinei.’” Sa toe foi atu Isaraelu i le tuugamau, ma fai ai le faaiuga e aveese lona atalii laitiiti. “Sa ou lagonaina se toafilemu uiga ese ma le filemu o le mafaufau lea sa ou le’i lagonaina muamua. Ou te ta’u atu le mea lenei: ou te le’i faia muamua lava se tiute sa sili ona ou malamalama i ai i lo’u olaga.”

I le aso 2 o Setema, 1853, na liutofagaina ai e Isaraelu Barlow ma le teu fanua ia tino o Iakopo ma Maria i le fanuatanu autu a Navu, ma faailoga le nofoaga i “maa i le ulu ma vae o tuugamau.”

Sa ta’u atu e Iakopo ia Elisapeta a o ia i ai i le tuugamau, “Sa ou lagonaina se manao e tuuto atu a’u lava ma mea uma ina ia mafai ona ou ta’ua a’u i aao o le Alii, ina ia mafai ona faitaulia a’u o se e agavaa e o mai faatasi ma [Iakopo] i le taeao o le Uluai Toetu.”

O le tuuto o Isaraelu i le talalelei a Iesu Keriso, faatasi ai ma le faamamaluina o feagaiga paia, ua mafai ai e Keriso ona faia le ola e faavavau—lena faamanuiaga silisili o faamanuiaga uma—e mafai mo ia, o ona tuaa, ma ana fanau.

E moni foi lena mea ia i tatou uma.

Ata na pueina e Jerry Garns, e mafai ona kopiina mo na o le faaaogaina e le Ekalesia

Folafolaga Paia

E alolofa lo tatou Tama Faalelagi ma Lona Alo, o Iesu Keriso, ia i tatou taitoatasi i tua atu o soo se mea e mafai ona tatou mafaufauina. E leai se isi mea e sili atu ona faaalia ai lo La’ua alofa nai lo faamanuiaga folafolaina e o faatasi ma feagaiga ua ofoina mai ia i tatou i le papatisoga ma i le maota o le Alii.

“O se tasi o manatu faavae aupito taua o le ekalesia moni o le manatu lea e uiga i se feagaiga paia,” na aoao mai ai Peresitene Russell M. Nelson. “I le gagana faaletulafono, e masani lava, o se feagaiga o lona uiga o se maliega i le va o ni itu se lua pe sili atu. Ae i se anotusi faalelotu, o se feagaiga o se mea e sili atu ona taua. O se tautoga paia e faia ma le Atua.”

O folafolaga paia uma tatou te faia ma tausia e faamanuiaina ai i tatou. E finagalo le Tama Faalelagi ma lo tatou Faaola, o Iesu Keriso e faalatalata atu i tatou i a i La’ua. E finagalo i La’ua e fesoasoani ia i tatou e aoao ma tuputupu ae i le faatuatua ma le malamalama. E finagalo i La’ua e faaeeina i tatou i le mana faalelagi. E finagalo i La’ua ia tatou maua le faamalologa ma le filemu i se lalolagi o loo fememea’i pea i faamanuiaga faapena. E finagalo i La’ua ia tatou lagonaina le olioli i lenei olaga ma i le olaga a sau. E tafe mai i lenei alofa atoatoa, ua La ofoina mai ai ia i tatou le avanoa e ulu atu ai i se sootaga faalefeagaiga ma i La’ua. Ua tatou maua le faamanuiaga o le toe tuuto atu i na feagaiga i vaiaso taitasi i le taimi o le sauniga faamanatuga.

Tatou te aai ma feinu i le faamanatuga i se agaga o le lotofaafetai aua ua tatou maua le faamanuiaga fiafia o le tauaveina i o tatou luga o le suafa o Iesu Keriso, manatuaina o Ia ma Lona alofa mo i tatou na faaalia e ala i le meaalofa o Lana Togiola—na Ia puapuagatia, afutoto, ma maliu mo i tatou. E faamanuiaina foi i tatou e le faamanatuga i se avanoa faalevaiaso e faaali atu ai lo tatou naunautaiga e tausi Ana poloaiga, faafou a tatou feagaiga, ma osia se feagaiga fou (tagai i le Mataupu Faavae ma Feagaiga 20:77, 79).

“E tele ina ou faalogo i faaupuga tatou te aai i le faamanatuga e faafou ai feagaiga na osia i le papatisoga. E ui e moni lena mea, ae e matuā sili atu i lo lena,” na saunoa ai Peresitene Nelson. “Ua ou osia se feagaiga fou. Ua outou osia ni feagaiga fou. … O le taui la, lea e faia ai [e le Alii] le fetalaiga o le a tatou maua pea Lona Agaga e faatasi ma i tatou. E ma’eu lenei faamanuiaga!”

Pe a tatou salamo ma aai ma feinu i le faamanatuga ma se loto mama, tatou te maua le Agaga Paia ma “faamamaina mai agasala e peiseai ua tatou toe papatisoina. O le faamoemoe ma le alofa mutimutivale lea ua ofoina mai e Iesu ia i tatou taitoatasi.”

E maeu le olioli i le salamo ma le faamagaloina e ala i le alofa togiola o Keriso!

Ata pu’e o le Malumalu a Navu Ilinoi saunia e Jennifer Rose Maddy

O Lona Maota o le Olioli

Talu mai le avea ma Peresitene O Le Ekalesia a Iesu Keriso o le Au Paia o Aso e Gata Ai, sa saunoa soo ai Peresitene Nelson e uiga i le ala o feagaiga, e amata i lana uluai savali faalauaitele i le avea ai ma Peresitene o le Ekalesia. Tatou te ulu atu i lena ala e ala i le “salamo ma le papatisoga i le vai” (2 Nifae 31:17), na ia saunoa ai i se taimi mulimuli ane, “ona tatou ulu atoa atu ai lea i le malumalu.”

E pei lava ona faamanatu mai ia i tatou e le aai ma feinu i le faamanatuga a tatou feagaiga ma o latou faamanuiaga e maua ai, e faapena foi i le faia o galuega sui i le malumalu. A o tatou faatinoina sauniga e ala i le fai ma sui mo i latou o e ua maliliu, tatou te manatuaina folafolaga paia ua tatou osia ma faamanuiaga folafolaina o le a tatou maua.

E ala i le ala o feagaiga, e avea ai i tatou ma suli i faamanuiaga uma na folafola mai ia Aperaamo, Isaako, Iakopo, ma a latou fanau. E ui lava i na faamanuiaga folafolaina, sa lei taitaiina e Aperaamo, Isaako, ma Iakopo ni olaga faigofie, ma e faapena foi i tatou. E pei o i latou, tatou te feagai ma faigata, aoaiga, ma le leiloa pe a “tofotofoina i tatou i mea uma” (Mataupu Faavae ma Feagaiga 136:31; tagai foi i le 101:4–5). Ae e pei o perofeta ma le Au Paia amiotonu o anamua, ua tatou iloa le tagata e mafai ona tatou faatuatuaina (tagai i le 2 Nifae 4:19).

O lo tatou olaga faaletino ua na o se taimi i lo tatou olaga, ae o lena taimi—o nisi taimi e faigata tele—e faavavau le taua. Ioe, e finagalo lo tatou Tama Faalelagi ia tatou aoao ma tuputupu ae. Ma, ioe, o lena tuputupu ae e i ai taimi e manaomia ai le le fiafia ma le mafatia. Ae e finagalo o Ia ia matagofie ma ia iai se famoemoe o o tatou olaga. I lena iuga, ma le faafilemuina o la tatou malaga e toe foi atu ia te Ia, ua Ia saunia ai se Faaola, “o lē ua faamaonia” a tatou feagaiga ma Lona Tama. E ala i le Togiola a Iesu Keriso, ua faataunuu ai e le Tama folafolaga na faia i Ana fanau i totonu o le malumalu.

E ala i Lona alofa ma le taulaga togiola, ua taulima ai e lo tatou Faaola ma faamalolo mea uma o le a tatou fetaiai i le olaga. Ma ona o Lona maota paia—Lona maota o le olioli—o le a lelei mea uma e ui lava i faigata. O le pulupasama o le tausia o feagaiga e tafi ese ai le faanoanoa, tiga, faavauvau, ma le le fiafia. E le manaomia ona tatou popole pe fefefe. Ae, e mafai ona tatou olioli ona ua totogiina le tau o lo tatou togiolaina (tagai i le 1 Korinito 6:20) ma ua faataatia le ala o feagaiga i le ola e faavavau.

O le ala o feagaiga o se ala moni lea o le alofa togiola. A o tatou faamamaluina feagaiga tatou te osia i le malumalu, tatou te maua faamanuiaga o le mana sili atu, alofa sili atu, alofa mutimutivale sili atu, malamalama sili atu, ma le faamoemoe sili atu. O le ofoofogia ma le maoae o faamauga i le malumalu—o tagata o le aiga ua fusia faatasi i le alofa mo le faavavau atoa—e aumaia ai le maofa ma le olioli sili atu i lo’u agaga ma faatumulia ai a’u i se agaga o le lotofaafetai.

“Soo se taimi lava e tulai mai ai soo se ituaiga o faalavelave i lou olaga, o le nofoaga sili ona saogalemu faaleagaga e tatau ona i ai o le ola i totonu o au feagaiga o le malumalu!” Na fautua mai ai Peresitene Nelson. Ou te iloa mai lo’u lava aafiaga faaletino manaia ma i nisi taimi e oona le moni o na upu.

O James Nathaniel Barlow, o le atalii muamua o Isaraelu ma Elisapeta Barlow, na maliu a o lei leva ona fanau mai ia Me 1841. I ni tausaga mulimuli ane, sa faamauina o ia e ala i le fai ma sui i ona matua i le Malumalu o Logan Iuta.

Ata na tusia e Allen Garns

Faapotopoto i Latou i le Aiga

Ina ua uma ona toe faatofa tasi atu Isaraelu Barlow i lona atalii laitiiti, sa ia tusi atu i lona toalua, “O mafaufauga o lo’u aluese mamao mai, e le toe i ai se isi mea i le olaga e toe foi atu ai i le tuugamau o [Iakopo], na tautau ai le fasi filo mulimuli o le alofa sa ia te au seia oo ina motu i loimata i lona tuugamau.”

Ou te manatu e tele loimata—loimata o le olioli i le taimi lea—na maligi i le aso 4 o Tesema, 1889. I lena aso, sa faamauina ai James Nathaniel Barlow i ona matua i le Malumalu o Logan Iuta. E oo atu i le taimi lena, ua maliu Isaraelu, o lea na tutu ai isi e fai ma sui mo ia ma Iakopo.

Ua i ai ia i maua ma Sister Kearon se lagona maaleale faapitoa ma le agaalofa tele mo Isaraelu ma Elisapeta. O le ma tama muamua, o se tamaitiiti e igoa ia Sean, na maliu i le taimi o le taotoga o le fatu ina ua faatoa tolu vaiaso lona matua. O se tiga sili lenei mo ma’ua. I lena taimi, sa ma mafaufau pe mafai ona ma toe manuia mai ai. Sa ma tanumia o ia i se tuugamau laitiiti tiga i Egelani. I le sefululima tausaga mulimuli ane, sa talosagaina ai lo matou aiga e siitia ese mai lo matou aiga i le Malo Aufaatasi e auauna atu i le taimi atoa i le Ekalesia, ma sa matou tuua ai lena tuugamau laitiiti.

E le’i maliu le ma pepe i le savaliga sopo i sisifo, ma ma te le’i mafatia i faigata le mafaamatalaina o le au Barlow, ae ua ma maua le amataga o se malamalamaaga i mea na latou oo i ai. O le tuugamau o le ma pepe e matua mamao lava, ae e pei o le au Barlow, ua tatou maua le faatuatua tumau i le Toetu o Iesu Keriso ma le natura e faavavau o lo tatou aiga e ala i le feagaiga paia o le faamauga.

E tofu uma i tatou ma tuaa ma isi e pele i tua atu o le tuugamau o loo fai mai ia i tatou, “Aua e te tuua a’u iinei.” Ona o feagaiga o le malumalu, e leai se tasi e manaomia ona tuua. O lo tatou valaauga o le alofa ia i latou, auauna atu ia i latou, ma fesoasoani e faapotopoto mai i latou i le aiga.

E alofa lo tatou Tama Faalelagi ia i tatou, oe ma a’u. Ua Ia tuuina mai ia i tatou malumalu ina ia “fusifusia i le lagi soo se mea [tatou te] fusifusia i le lalolagi” (Mataupu Faavae ma Feagaiga 128:8; tagai foi i le Mataio 18:18). Na Ia auina mai Lona Alo e motusia noataga o le oti, asaina le ala mo sootaga e faavavau ma faatasiga faaleaiga e faavavau.

O le mafuaaga lena ua i ai a tatou sauniga. O le mafuaaga lena tatou te osia ai feagaiga. O le mafuaaga lena ua tatou fausia ai malumalu. O le mafuaaga lena tatou te tuuto atu ai i tatou lava i le galuega ma le mamalu o le Atua (tagai Mose 1:39). Ma o le mafuaaga lena na maligi ai loimata o le olioli, ma le iloaina o loo faatalitali mai se faatasiga e faavavau mo i tatou ma ē pele ia i tatou i le afioaga o le Tama ma le Alo.

Tau ina ia tatou maua le olioli ma le filemu a o tatou tausia a tatou feagaiga ma auai faatasi ma le Alii i Lana galuega faaola mamalu.