Nikotemo: Saili ia Iloa le Upumoni a Keriso

Saunia e Kimmy Badal

Mekasini a le Ekalesia

Atonu tatou te lē iloa lava i lenei olaga pe na faapefea le faaiuga o le tala a Nikotemo, ae e mafai ona tatou maua ni malamalamaaga mai ana fegalegaleaiga ma le Faaola a o tatou sauniuni mo le Eseta.

I tulaga o se tala o le olaga, o faamatalaga auiliili e uiga ia Nikotemo ua taape solo i le Feagaiga Fou. Ua tatou iloa o Nikotemo sa fai ma Faresaio ma o se “faipule o Iutaia” (Ioane 3:1 Sa agavaa o ia e auai i le Saneterini ma sa foliga mai sa maumea. O nei vaega na faailogaina ai se tulaga maualuga i le faapotopotoga o tagata Iutaia. E ui i lea, o le loloto o lona avea ma soo e tumau pea le ufiufiina.

Pe o ia o se soo faalilolilo pe leai? Pe na talitonu o ia o Iesu o le Mesia? Pe na taofia o ia e maunu o le tino ma ana uo faalelalolagi mai le taliaina o le avea ma soo? E le o ta’ua mai e tusitusiga paia, ae i le avea ai ma soo o Keriso i ona po nei, e mafai ona tatou maua ni malamalamaaga mai faatinoga a Nikotemo a o tatou sailia Iesu Keriso i lenei vaitau o le Eseta.

O Se Feiloaiga ma Iesu

O le taimi muamua na lavea mai ai Nikotemo i le faamatalaga o le Talalelei, e feiloai faalilolilo o ia ma Iesu i le po. Sa fememea’i o ia i le tautinoga a le Faaola e faapea “afai e le toe fanau le tagata, e le mafai ona iloa e ia o le malo o le Atua” (Ioane 3:3). Ua fesiligia e Nikotemo lenei faamatalaga, i le vaaiga moni o le aoaoga. Ua aoai lemu o ia e Iesu, ma taumafai e faaali atu le uiga faaleagaga o Ana afioga ma le matafaioi o se Mesia. Na muta le feiloaiga e aunoa ma le faaalia mai pe ua malamalama Nikotemo i le aoaoga a le Faaola.

Ua iloa e Nikotemo i lona loto na afio mai Iesu mai le Tama Faalelagi (tagai i le Ioane 3:2), ae atonu e le mafai ona ia iloa le eseesega o le savali faafaatusa a Iesu mai mea moni faalelalolagi ma ona lava talitonuga faalelotu. O lenei vaaiga atonu o le taunuuga lea o le olaga atoa o tu ma aga faatulafonoina a Iutaia.

I o tatou olaga, e faafia ona tatou sailia tali mai le Tama Faalelagi a o taofiofi mamau pea i o tatou talitonuga i le ala e tatau ona galue ai le lalolagi? E faafia ona tatou sailia le Faaola e aunoa ma le manao e suia o tatou mausa po o le lamatia o o tatou tulaga?

Sa le mafai e Nikotemo ona malamalama atoatoa i le savali a le Faaola i lena po, ae e ala i le feiloai ma Ia, sa ia faia ai se laasaga agai atu i le malamalama, ma e taulia lena laasaga o se vaega taua. “O le a faamanuiaina i tatou i lo tatou naunau e faia mea lelei, e tusa lava pe tatou te taumafai moni lava ia avea ai,” o le saunoaga lea a Peresitene Jeffrey R. Holland, Sui Peresitene o le Korama a Aposetolo e Toasefululua.

Tu Atu mo le Mea Moni

E ui atonu e le’i malamalama atoatoa Nikotemo i aoaoga uma a Keriso, ae sa ia taofi mau i upumoni sa ia iloa. O se taunuuga, ina ua faapotopoto ma tausalaina e faitaulaga sili ma le au Faresaio le Matai, e na o Nikotemo le tagata sa lagolagoina le Faaola.

“Pe faasalaina ea se tagata i la tatou tulafono, ao lei muai faalogologo ia te ia, ma iloa ana mea ua fai?” O le fesili lea a Nikotemo. Ua tautala o ia e ui lava ina iloa e lamatia o ia mai ana uo. “E te se Kalilaia foi oe?” o la latou taufaifai lea. “Ia e saili ma ia e iloa, e le tu mai lava se perofeta mai Kalilaia” (Ioane 7:51–52).

E pei o Nikotemo, atonu tatou te feagai ma mea faafeagai pe a tatou tutu atu mo upumoni ua tatou iloa e sa’o. Ae e taua lo tatou tutu pea, aemaise lava pe a oo mai i a tatou molimau ia Iesu Keriso.

O Se Taulaga o le Eseta

O nisi taimi, e sili atu ai le leotetele o faatinoga nai lo upu. Ina ua mavae le Faasatauroga tiga o Keriso, sa fesoasoani Nikotemo i le falelauasiga. Na ia aumaia le muro taugata ma le aloe e faamamalu ai le Faaola ua maliu ma saunia ai Lona tino e tanumia (tagai i le Ioane 19:39–40). E le o ta’ua i tusitusiga paia ia Nikotemo i talaatu o lenei faamatalaga, ma ua tatou te le iloa lava pe na mulimuli ma le loto atoa o ia ia Keriso.

Peitai, a o tatou saunia i lenei vaitau o le Eseta e faamanatu ai Iesu Keriso ma mea uma na Ia faia mo i tatou, e mafai ona tatou faalatalata atu ia te Ia i taulaga a ō tatou lava loto—loto naunautai ma agaga salamo. E mafai ona tatou faafouina o tatou manaoga ia malamalama po o ai le Faaola ma tu i mea uma ua tatou iloa e moni. A o tatou faia lena mea, o le a avea le Eseta ma se taimi e manatua ai Keriso o le “faitotoa i le olioli silisili o le olaga ma le pulupasama i faanoanoaga sili ona faigata o le olaga.”