Maria le Makatala: Alofa ma Fesili

O se tasi o mea muamua na mātau i lenei tala o le “vave,” na sau o Maria i le tuugamau, a o lei oso a’e le la (tagai i le Ioane 20:1). E le o fai mai Ioane pe aisea na i ai Maria iina. O tala a Mareko ma Luka o loo ta’u mai ai sa mananao Maria ma nai isi tamaitai e u’u le tino o Iesu ae sa tatau ona faatali seia mavae le Sapati (tagai i le Mareko 16:1; Luka 23:55–56; 24:1). O Mataio sa na ona ia ta’ua lava sa latou o atu “e vaai i le tuugamau” (Mataio 28:1).

Po o le a lava le mafuaaga, e foliga mai sa mananao Maria ma ana soa ia oo atu iina i se taimi vave lava. O le vaavaai atu i lona Alii pele o puapuagatia ma maliu i luga o le satauro, i ni nai aso na muamua atu, atonu sa tiga. Atonu na foliga mai sa lē mautonu, pogisa, ma taufaafefe le lumanai. Ae sa le’i nofoa’i Maria i lona pogisa. Sa ia iloa o Iesu o lona punavai o le malamalama—Sa Ia laveaiina o ia mai le pouliuli muamua (tagai i le Luka 8:2)—o lea sa ia alu atu ai ma le naunautai i le mea e tasi faalelalolagi na totoe e uiga ia te Ia: O Lona tuugamau. Ma, i se tulaga faafaatusa, sa le’i faatali o ia mo le pogisa e alu ese ma le malamalama e susulu atu ai i luga o lona ala. Sa ia faia laasaga o le faatuatua i le pogisa.

I le taimi muamua, o le o mai i le tuugamau e lei maua ai se malamalama atoatoa o Maria. O le mea moni, o le mea sa ia vaaia iina na tulai mai ai le tele o le fesili, le tele o le fenumia’i. Na faapefea ona aveesea le maa? Aisea na le i ai ai le tino o Iesu i le tuugamau? O fea sa i ai o Ia?

Ia i tatou, i le taimi nei, ua manino ma mamalu tali. Ae ia Maria e le’i manino na tali—e le’i oo i ai. I se taumafaiga e malamalama i mea sa ia vaaia, sa faaiu ai e Maria, “Ua latou aveeseina le Alii i le tuugamau, matou te le iloa foi le mea ua latou tuuina ai o ia” (Ioane 20:2). Ona ia tamoe atu lea ia Peteru ma Ioane e lipoti atu i ai le gaoiga.

Faatasi ai ma lena manatu faigata o loo i ai pea i lona mafaufau, sa toe foi atu ai Maria i le tuugamau. O iina sa ia vaai ai i ni agelu se toalua o saofafai i le mea na taoto ai Iesu—o se faamaoniga manino o loo tupu se mea faalelagi. Ae sa faaauau pea ona faailoa atu e Maria lona manatu sese faapea ua gaoia le tino o Iesu. (Tagai i le Ioane 20:11–13.)

Peitai, i se tulaga faagaeetia, sa le’i tuua e Maria le tuugamau. E oo lava i lona lē mautonu, e oo lava i ana fesili uma e le’i taliina, sa nofo o ia—tagi, ma vaavaai, ma faaauau pea ona fai atu fesili (tagai i le Ioane 20:10–11). Sa nofo o ia, e le faapea ona sa malamalama o ia i mea uma ae ona sa alofa o ia i lona Alii. E ui lava i lona lē mautonu, ae sa tumau pea o se mea moni e faapea, sa alofa Maria i le Faaola. O le alofa, ae le o le malamalama, lea na aumaia ai o ia i le tuugamau, ma sa faatumauina ai o ia iina i le alofa.

Ma ona sa nofo o ia, sa i ai o ia i le nofoaga sa’o i le taimi sa’o e maua ai tali sa ia manaomia ina ua iu ina oo mai.

Na faasolosolo malie ona oo mai le malamalama. Sa vaai Maria i le Faaola toetu o tu i le faatoaga; sa ia talanoa atu ia te Ia, ma sa Ia fetalai atu ia te ia. Ae na te le’i iloaina muamua o Ia. Ana le oo lava ina fetalai Iesu ma ta’u le igoa o Maria o lena na ia iloa ai po o ai o Ia. (Tagai i le Ioane 20:14–16 Aisea na faapea ai? O le a le mea e faatatau i le ta’uina atu e le Faaola o le igoa o Maria, lea, i se tulaga moni, na avea o se molimau e sili atu ona mamana ia te ia nai lo mea na vaai i ai ona mata ma mea na faalogoina e ona taliga? Sa iloa e Maria foliga o Iesu. Sa ia iloa le leo o Lona siufofoga. Ae o lana sootaga ma le Faaola sa sili atu ona loloto nai lo lena. Sa ia iloa o Ia. Sa ia fausia se sootaga patino ma Ia i le aluga o tausaga—mulimuli ia te Ia, faalogo ia te Ia, sa faamaloloina e Lona mana. O lena mea, e foliga mai, o le mafuaaga lea na iu ai ina ia iloaina o Ia.

Atonu e tatau ia i tatou uma ona avea atili e faapei o Maria. Tatou te manaomia uma lava le lototele e faia ai laasaga o le faatuatua pe a “pogisa lava.” Pe a tatou oo i ni mea faigata, pe a oo atu fesili i nisi fesili, pe a tuua i tatou e o tatou mafaufauga faalelalolagi e tauaso faaleagaga, e mafai ona tatou pipii atu i lo tatou alolofa mo Iesu Keriso, e pei ona sa faia e Maria. E mafai ona tatou fausia se sootaga ma Ia lea e matua malosi tele lea tatou te faatuatuaina ai o Ia e sili atu nai lo le tatou faatuatuaina o o tatou sane faaletino. Atonu o lo tatou alolofa mo le Faaola e mafai ona faalatalata atu ai i tatou ia te Ia, e tusa lava po o le a—seia iu ina oso a’e le la ma tatalaina o tatou mata, e pei o Maria.