O A’u Meatotino Sili ona Taua

Saunia e Amy Bucker Bushman, Wisconsin, ISA

O luitau o le tausia ma le tausiga o se fanau e toalua e i ai manaoga faapitoa e mafai ona taufaafefe, ae o Eli ma Hana o se faamanuiaga. La te aumaia ia te a’u le tele o le olioli. O i la’ua o lo’u olioli.

O le ma fanau e toalua, o Eli ma Hana, sa fananau mai ma le tulaga o le i ai o manaoga faapitoa ma luitau o le mafaufau. A o laiti i laua, sa matuai faigata lava. E tatau lava ona ma vaaia lelei i laua i taimi uma. A’o o’u feagai ma le tau fo’ia o le ulavale o le isi, ae ulavale ane le isi. E i ai taimi, sa lofituina ai le tausia o i laua uma.

Ina ua iva tausaga o Eli, sa puapuagatia o ia i le tulaga o le ita tele/faasauā. Sa le mafai ona ma tausia o ia ia saogalemu, ma e aunoa ma se tulaga e mafai ona ma mafaufauina, o le a ia osofaia ai lona tuafafine po o a’u foi ma lo’u toalua, o Troy. Sa tonu ia i ma’ua e faapea, o le faanofo ma togafitiga i fafo atu o le fale sa sili ona lelei mo ia, ae sa tatau ona ma sailia se nofoaga o le a aveina ai o ia.

Na pau lava le nofoaga na mafai ona matou maua i le Iunaite Setete na ma lagonaina e mafai ona fesoasoani ia te ia i ona manaoga faapitoa i le tuputupu a’e ma le tulaga sauā, o se falemai e silia ma le afe maila le mamao mai lo matou fale i Wisconsin.

E leai se tasi e manao e auina ese atu lo la atalii e lē tautala mai le aiga, aemaise lava pe a le malamalama o ia i le mea o loo tupu. Sa ma le mananao e faia lenei mea. Sa lagonaina le lē sa’o o lenei mea. Ae sa ma tatalo e uiga i ai ma iloa e tatau ona ma faia.

Sa Ou Manaomia Lo’u Faaola

Ona o Eli, so’o se taimi e teuina ai atopau e mafaufau ai lava o ia o se tafaoga faaleaiga, sa ia manatu ai o loo matou o i se nofoaga e maua ai le fiafia. Ina ua ma taunuu atu i le falemai ma tuuina atu o ia i totonu, sa ita tele o ia. Sa ia fela’uina i maua, ta gali i maua, ma ta futi o ma ulu. Sa le na ona ma manunu’a faaletino ma Troy mai le tuuina atu o Eli i lea nofoaga; sa o ma manunu’a foi faalelagona.

I lena taimi, sa ou manaomia ai lo’u Faaola. Sa ou mafaufau po o fea sa i ai o Ia i lena tulaga faigata. A o ma tuua le falemai, sa ma savavali atu i le vaega i luma o le ofisa o le falemai agai atu i le isi itu o le auala. Na faafuasei lava ona ma tau atu i se faatusa maamora tele o le faatagata o le Christus na saunia e Bertel Thorvaldsen.

Ou te le’i iloa sa faaaogaina e faalapotopotoga e i fafo atu o la tatou ekalesia lena faatagata. Ina ua ou vaai i ai o tu mai i o’u luma, sa lofituina a’u i se lagona ootia vave ma le malosi. Sa ou lagonaina o Lē Faamalolo, faatasi ai ma Ona aao faaloaloa, sa i ai iina. Sa ou lagonaina o Ia o faamaloloina i ma’ua ma faamalolo lo ma atalii. Sa ou lagonaina le faamautinoaga ua ma faia le faaiuga sa’o. Sa ou lagonaina e finagalo o Ia ia ma iloa sa i ai o Ia iina mo i matou ma sa matou faatasi ai i laasaga uma o le ala.

Taitaiga Faalelagi

Ina ua mavae le lua masina o iloiloga toto’a i se nofoaga faatonutonu o le falemai, sa faailoa mai e le vaega sa togafitiina Eli se faafitauli i le vaega lea e faaliliuina meaai ina ia maua ai le malosi o le tino, o le vaega tonu lea o loo i ai sona saofaga i le tulaga o lona ita/faasauā O le taimi lava na talanoaina ai lenei mea, sa latou faaaogaina ai suesuega faaleamio e fo’ia ai faafituli i ana amioga.

Sa olaola lelei Eli i le falemai. Sa matuā tele le vaavaaia lelei sa ia maua, ma le tulaga mautinoa i aso taitasi—o se mea sa ia moomoo i ai ma o se mea ua matou tuuina atu ia te ia i le taimi nei lea ua toe nofo mau ai o ia i le fale. Ina ua mavae masina muamua e lua o lona nofo ai iina, sa ma aveina o ia i ni malaga pupuu i fafo atu o le falemai, o se taimi e o faatasi ma aso sili ona fiafia o lo’u olaga. Sa ma asiasi atu ia te ia mo se vaiaso i masina taitasi, lea na ma maua ai ni vasega e aoao ai matua. O lona togafitiga sa alu ai le fa masina.

Sa faigata ia Hana ona malamalama i le toesea o Eli, ae sa ma faamautinoa atu ia te ia o Eli o loo tuuina atu ina ia maua se fesoasoani, lea na aumaia ai ia te ia le mafanafana. Ina ua toe foi mai Eli i le fale, sa ma maofa i suiga ia te ia. Sa maofa foi uo, ma fesili mai ia i maua pe na faapefea ona ma iloa ona fai le mea sa ma faia. Sa ma ta’u atu ia i latou sa ma mauaina le taitaiga mai lo ma Tama Faalelagi, lea na taitai atu ai i maua i le togafitiga sa’o mo Eli.

Mana Gafatia

Ou te molimau atu sa i ai le Faaola iina mo i ma’ua i nisi o taimi sili ona pogisa faatasi ma le ma fanau. E mafai ona faigata le olaga, ae ua ma iloa o le a lelei mea uma. Ua ma maua le alofa tunoa e ala i le Togiola a le Faaola—Lona “mana gafatia” lea ua faamalosia ai i maua i o ma luitau.

Pe a tatou i ai i le ogatotonu o taimi pogisa, tatou te mafaufau, “Ia, o le olaga masani lava lenei.” O lea la, e foliga mai e le leaga tele. Ae mulimuli ane, sa ma taumanatunatu, “Na faapefea ona matou savalia mai lena mea?” Tatou te ui mai ai ona sa tauaveina i tatou e le Faaola, ma tuuina mai ia i tatou le fesoasoani tatou te lei iloaina sa tatou mauaina a o tauivi ai i lea aso.

Ona o le togafitiga na maua e Eli, ua matuai saoloto ai nei o ia mai ona faafitauli o le ita/faasauā. Sa mafai ona faau’u o ia mai le aoga. O loo toaga o ia i ana faalopotopoga, o le au faataavale polo ma taalo pesipolo. E i ai foi sana galuega i se umukuka faapisinisi. Ma ua mafai nei ona matou auai faatasi i le lotu o se aiga.

A o laiti ma faigata la’u fanau, sa ou maua le tele o opo ma mata faasesepa mai tagata ese e pei o fai mai, “Talofa e, ia te oe. Ou te faamalie atu ona o na vaega ua tuuina atu ia te oe.” O lena mea sa ou faanoanoa ai lava i taimi uma.

O Eli ma Hana o la’u fanau, o a’u meatotino sili ona taua. Ou te alofa ia i la’ua. E ui lava i luitau o le faafaileleina ma le tausiaina o i la’ua, ae o i la’ua o se faamanuiaga. Ou te le vaai ia i la’ua o se mea lē lelei i lo’u olaga. Ou te vaai atu i vaega sili ona fiafia i ai i la’ua, o ni vaega faafiafiaina mo a’u. La te aumaia ia te a’u le tele o le olioli. O i la’ua o lo’u olioli. Ou te iloa a ou ola faamaoni i le fuafuaga a le Tama Faalelagi, e mafai ona ou tausia i la’ua e faavavau.