Faalautele Lau Eseta i le Auauna Atu ma le Ositaulaga

Saunia e Zoey Diede

Mekasini a le Ekalesia

O se faamanatuga e silia ma se vaiaso po o se faaiuga o se vaiaso, e mafai ona avea le Eseta ma se vaitau faaumiumi o le faasoaina atu o le malamalama o Keriso ma le olioli o le fesoasoani atu i isi.

O Keriso o loo aapa atu i le tagata o loo nofo i le palapala

O le faalauteleina o a tatou faamanatuga o le Eseta e mafai ona aumaia ai le olioli sili atu ma fesoasoani ia i tatou e latalata atili atu ai ia Iesu Keriso. “Ua uunaia i tatou e siitia atu i se faamanatuga maualuga atu ma paia atu o le Eseta,” o le saunoaga lea a Elder Gary E. Stevenson o le Korama a Aposetolo e Toasefululua.

I le O Le Ekalesia a Iesu Keriso o le Au Paia o Aso e Gata Ai, ua poloaiina i tatou e ofo atu “se loto momomo ma se agaga salamo” o se taulaga (3 Nifae 9:20) ma ia tauivi e salamo, mulimuli ia Iesu Keriso, ma faaogatusa o tatou olaga ma Ana poloaiga. O le ositaulaga ma le auauna atu i isi e mafai ona fesoasoani ia i tatou e faamanatu atili ai le Faaola i le vaitau o le Eseta.

O Nisi o Auala e Auauna Atu Ai ma Foai Atu

Mafaufau i fautuaga nei e faalautele ai faatosinaga a Keriso i lou olaga ma faalautele ai le vaitau o le Eseta, pe fatu ai sau lava fuafuaga.

Tuu atu le taimi ma le malosi e auauna atu ai i lou valaauga. “Pe a outou auauna atu i o outou uso a tagata, ua na’o lo outou auauna atu lava lea i lo outou Atua” (Mosaea 2:17).
Tuu le faitio. “Faia mea uma lava ma le le muimui ma le le fefinauai” (Filipi 2:14).
Foai atu tupe i se faamoemoega lelei. “Ma e tusa ai ma la outou faasoa atu o a outou mea i e matitiva, ia outou faia i [le Alii]” (Mataupu Faavae ma Feagaiga 42:31).
Tuuina atu meaai mo se tasi o loo manaomia le fesoasoani. “Auā na ou fia ’ai, ona outou avane ai lea ni mea ou te ’ai ai” (Mataio 25:35).
Faatino le tulafono o le anapogi e ala i le anapogi ma le tatalo ma foai atu se taulaga anapogi mo i latou e le tagolima. O le a e latalata atili atu ai i le Alii o Iesu Keriso. “E tusa ai ma lo outou faia o lenei mea, e a outou le atoatoa o le lalolagi” (Mataupu Faavae ma Feagaiga 59:16).
Filifili se tasi e auauna atu i ai. “Auauna le tasi i le tasi i le alofa” (Kalatia 5:13).
Fatu se lisi o musika paia ma faasoa atu i isi. “Ia faatumuina outou i le Agaga; ia outou fetautalatalai i salāmo ma pese, ma siva faaleagaga” (Efeso 5:18–19).
Tapuai soo i le malumalu. “Auā o le a Ou faatu mai mo aʼu se nuu mamā, o e e auauna mai ia te aʼu i le amiotonu” (Mataupu Faavae ma Feagaiga 100:16).
Galue e atiina ae se uiga auaumama fou faaKeriso ia te oe lava ia (alofa mama, alofa, malamalama, onosai, tali-tiga, agalelei, agaalofa). “Ia outou amoina la’u amo, ma ia outou faaa’oa’o ia te a’u; auā o a’u le agamalu ma le loto maulalo: ona maua lea e outou o le malologa mo outou agaga” (Mataio 11:29).
Faamagalo se tasi. “Ia outou faamagaloina atu, e faamagaloina mai ai outou” (Luka 6:37).
Volenitia i vaega e tufatufaina atu meaai po o le lotoifale. Asiasi i le JustServe.org mo avanoa. “Ia tatou agalelei i tagata uma lava” (Kalatia 6:10).
Taunuu vave i le lotu e saunia mo le faamanatuga. “Faia ma le manatu tasi i lo’u mamalu—e faamanatu ai i le Tamā lo’u tino sa fai ma taulaga mo outou, ma lo’u toto sa faamaligiina mo le faamagaloina o a outou agasala” (Mataupu Faavae ma Feagaiga 27:2).
Suesue e uiga i le Toetu. “Ua i ai se oti ua ta’ua o le oti faaletino; ma o le maliu o Keriso o le a tatalaina fusi o lenei oti faaletino, o le a faatutu mai ai tagata uma mai lenei oti faaletino” (Alema 11:42).

Ua Toetu o Ia, saunia e Dan Wilson, e lē mafai ona kopiina

O Ia o le Olioli

Afai tatou te mulimuli i le faataitaiga a Iesu Keriso o le ositaulaga ma le faasalalauina o le malamalama, o le a tatou latalata atili atu ia te Ia ma fiafia atili. “O le olioli e sau mai ia te Ia ma ona o Ia,” o le saunoaga lea a Russell M. Nelson. “O Ia o le puna o le olioli uma.”