Toomaga e Ala ia Iesu Keriso: O Le Mana o le Anapogi

A o ou laitiiti, sa tauivi lo’u aiga ina ia maua mea mo lo matou tausiga, ma ou te manatua le mauaina o meaai mai le faleteuoloa a epikopo. Sa mafai ona mauaina na mea e ala i taulaga anapogi limafoai a isi Au Paia. O la latou osigataulaga na saofaga i le faamanuiaina o a’u ma lo’u aiga i se taimi faigata. Ua ou lagona le faamanuiaina i le mauaina o le avanoa i le taimi nei e anapogi ai ma saofaga atu i isi o loo manaomia le fesoasoani.

O se avanoa ma se faamanuiaga e mafai ona tatou tuuina atu se mea, e tusa lava po o le a le laitiiti, e fesoasoani ai i isi o loo manaomia le fesoasoani. Ma i le faagasologa, tatou te maua ai lo tatou lava toomaga ia Iesu Keriso.

Na aoaoina i tatou e le Faaola e ala i Lana perofeta e uiga i faamoemoega mamana ma faamanuiaga o le anapogi:

“E le o lenei ea le anapogi ou te loto i ai? ina ia tatalaina fusi na faia i le amio leaga, e tatala fusi o le amo, e tuuina atu ia saoloto ē ua faasauaina, ma ia outou gausia amo uma lava?

“E le o lenei ea ona ia tofitofi au mea e ai i lē ua fia ai, ia au mai i lou fale ē ua matitiva ma faasauaina? a e iloa lē ua lē lavalavā e te faaofuina o ia, ’aua foi e te lafi ia i latou o lou lava aiga?”

Tatou te maua le avanoa e anapopogi ai e le aunoa, faatasi i masina taitasi i le Aso Sa anapogi, ma foai atu se taulaga anapogi e fesoasoani ai ia i latou e le tagolima. E mafai ona tatou “tuuina atu se taulaga ia lē itiiti ifo ma le tau aofa’i o ‘aiga lea o le a lē taumafaina.” Ua “fautuaina foi i tatou ina ia limafoai ma foai ia sili atu nai lo le tau o nei ‘aiga pe afai tatou te mafaia.”

Na aoao mai Elder Joseph B. Wirthlin (1917-2008) o le Korama a Aposetolo e Toasefululua “E na’o le tasi lava le faamoemoega e faaaoga ai taulaga anapogi: ia faamanuia ai olaga o i latou e manaomia le fesoasoani. O talā uma e tuuina atu i le epikopo o se taulaga anapogi, e alu e fesoasoani ai i e matitiva. Pe a sili atu foai nai lo manaoga i le lotoifale, e pasi atu i latou e faataunuu ai manaoga i se isi nofoaga.”

Pe a tatou anapopogi, tatou te faamaualaloina ma le agaga tatalo i tatou lava i luma o le Alii ma filifili e aloese mai le aai ma inu mo ’aiga e lua po o se periota e 24 itula. Afai e le faatagaina e le soifua maloloina o se tasi le anapogi masani, ua fautuaina i tatou e Peresitene Nelson e “filifili po o le a le mea o le a avea ma taulaga mo oe, a o e manatuaina le taulaga silisili na faia e le Faaola mo oe.”

Keriso o loo tatalo i le Faatoaga o Ketesemane, saunia e Hermann Clementz

O le anapogi e fesootai i le ositaulaga, ma o le ositaulaga o se faatusa o lo tatou Alii ma le Faaola, o Iesu Keriso, ma Lana Togiola. Ua tatou maua le avanoa e mafaufau ai ma le migao i Lana taulaga a o tatou sailia musumusuga ia iloa le faamoemoega e anapogi ai ma mea e anapogi mai ai. E mafai foi ona tatou mafaufau i le Faaola i la tatou anapogi atoa. Ua ou aoaoina e faamoemoe le Alii mo i tatou e aoao e uiga ia te Ia ma faalatalata atili atu ia te Ia e ala i lenei aafiaga agaga tatalo.

I le Ekalesia a le Alii, e uunaia foi i tatou e anapopogi pe a tatou manaomia se fesoasoani faalelagi.

Ou te manatua se tasi o taumafanafana sa ou le mautonu ai ma tiga i se feeseeseaiga ma se tagata o le aiga. O nisi o tagata o le aiga, e aofia ai le tagata na faapopoleina a’u, na filifili e o mai faatasi ma fefautuaai e uiga i ai. Sa ou tatalo faatauanau ma anapogi ia iloa le mea e tatau ona ou fai atu ai pe faia. Sa ou manaomia le poto ma le alofa sili atu nai lo le mea sa ia te a’u.

Ina ua matou feiloai i lena afiafi, sa faamalūlūina ma le alofa mutimutivale e le Agaga o le Alii o matou loto. Ou te manatua sa aoaoina au i upu sa ou tautala atu ai; sa foliga mai e le o ni a’u lava. Sa faatumulia i latou i le alofa, manino, mana, ma le Agaga. Sa ou tagi a o ou lagonaina ma le mama e alofa le Atua i lo’u aiga ma finagalo e faamalolo i matou. Sa ou molimauina le mana, faamalologa, ma faaaliga a le Alii e oo mai e ala i le tatalo faatauanau ma le anapogi. Sa matala tele pupuni o le lagi i lena afiafi.

O lenei aafiaga na faamanatu mai ai ia te au faamanuiaga o le anapogi tatou te aoaoina i le Isaia:

“Ona e valaau lea, ae tali mai ai Ieova; e te alaga atu, ae fetalai mai o ia, O a’u lenei. …

“E taitaiina foi oe e le aunoa e Ieova; e faamalie foi o ia ia te oe pe a oge vai, … e avea foi oe e pei se fanua ua faasūsūina, e pei o le punavai foi e le mate ona suavai.

“O ē e tutupu mai ia te oe, latou te atiae mea ua faatafunaina mai anamua; e te faatuina faavae o lea tupulaga ma lea tupulaga; e igoa ai oe, O lē ati ae i solo, O le faaola i magāala i mea e nonofo ai.”

O Iesu Keriso o “lē ati ae i solo, O le faaola i magāala.” Sa Ia faia se auala e faamalolo ai faanoanoaga ma lototiga uma ma faatoilalo vaivaiga uma ma agasala. E mafai ona Ia toefuatai, fonofonoina, ma faamalosia a o tatou liliu atu ia te Ia i le tatalo malosi ma le anapogi.

E tele naua manaoga maoae i le lalolagi, o le tele lava atonu e foliga mai e lofituina. Atonu e te mafaufau, o le a se mea e mafai ona ou faia e faatino ai se eseesega moni i le avea ai ma se tamaitai o le feagaiga? O se tasi o mea e mafai ona tatou faia o le ola ma le loto i ai ma fiafia i le tulafono o le anapogi ma foai atu se taulaga anapogi limafoai mo i latou e manaomia le fesoasoani.

A o tatou faia, ou te iloa o le a aumai e le Alii Lona toomaga faaleagaga ma faaletino ia te oe ma a’u—ma i Ana fanau o loo manaomia le fesoasoani. Ma o le a tatou tuputupu ae i lo tatou malamalama i Ona ala ma lo tatou alolofa mo le Atua ma o tatou tuaoi. Tau ina ia tatou saili e faia se tautinoga faafouina e ola i lenei poloaiga faamanuiaina ma mamana.