Maileia i se ‘Autu

Ata na tusia e David Green

I le galue ai o se faufautua i le faatoaga i ni nai tausaga ua mavae i saute o Casa Grande, Arisona, ISA, sa ou vaaia ai se solofanua fafine i le ogatotonu o se fanua laauiti o alfalfa.

“E le tatau ona i ai ni solofanua i o,” sa ou fai ifo ai te a’u lava. A o ou tietie faalatalata atu, sa ou maua ai se tama’i solofanua ua pa’u ma mau mai totonu o se ‘autu simā e lata ane i ai. O le tama’i solofanua, sa na o se aso pe lua foi aso le matua, sa matuā laitiiti lava, lea sa le mafai ai ona oso ese mai le ’autu. Sa mau ma saisaitia o ia.

A o ou latalata atu ia te ia, sa amata ona le to’a ma le solofanua fafine sa i le fanua. Sa ou oso i totonu o le ‘autu mago ma talanoa filemu atu i lana tama’i, milimilii ia te ia, piki o ia i luga, ma tuu o ia i luga o le auvai o ‘autu.

Nai lo le alu i lona tina, sa ia toe oso i totonu o le ’autu. Sa ou mau atu ia te ia i lona vae taumatau pito i tua, ma toe sii mai o ia i fafo o le ‘autu, ma faasino atu o ia i lona tina. Sa vave ona faliu o ia ma taumafai e toe alu i totonu o le ‘autu.

Sa ou uumauina o ia mo le taimi lona tolu ma toe talanoa lemu atu ia te ia a o ou aveina atu o ia agai atu i lona tina. Ina ua ou tuua o ia ma amata ona toe foi ese, sa ia mulimuli mai ia te a’u!

“Leai,” sa ou fai atu ai a o ou toe faasino atu o ia i lona tina, “e tatau ona e alu i lou tina.”

Ona tupu ai lea o se mea ofoofogia. Na tagi leotele mai lona tina. I le taimi lava lena, na iloa ai e le tama’i solofanua lona leo ma tamo’e mulimuli atu ia te ia. Ona taufetuli atu lea o i laua i fafo mai le fanua ma agai atu i le toafa.

A o ou tomanatu i lenei aafiaga, sa ou mafaufau pe toafia i tatou ua pa’uū atu i se ‘autu lea ua le mafai ona tatou o ese mai i fafo pe faaauau pea ona toe pauu atu i ai i totonu. Atonu o se ‘autu o le agasala po o vaisū po o le masalosalo.

Na aoao mai Peresitene Russell M. Nelson, “E ao ona tatou faalogo i afioga a le Alii, logona ia mea, ma usitai i mea ua Ia faatonu ai i tatou!” Sa ia fai mai, tatou te faalogo i le siufofoga o le Alii i tusitusiga paia ma le malumalu, i upu a perofeta ma aposetolo o aso e gata ai, ma e ala mai i musumusuga a le Agaga Paia.

Sa faasaoina le tama’i solofanua ina ua valaau atu lona tina ia te ia. Sa ia iloaina lona leo ma mulimuli atu ia te ia.

O loo valaau mai le Leoleo Mamoe Lelei ia i tatou. A o tatou faalogo atu i Lona siufofoga ma mulimuli ia te Ia (tagai i le Alema 5:37, 41), o le a Ia siitia i tatou pe a tatou pa’uū, faamalolo i tatou, ma taitai atu i tatou i le aiga.